സംസ്ഥാനത്ത് ഹൈക്കോടതിയിലും ജില്ലാ കോടതികളിലും മാധ്യമ പ്രവര്‍ത്തകരെ തടഞ്ഞതിനെക്കുറിച്ച് പ്രസ് കൗണ്‍സില്‍ ഓഫ് ഇന്ത്യ വിശദീകരണം തേടി. ചീഫ് സെക്രട്ടറിയോടും ഹൈക്കോടതി രജിസ്ട്രാറോടുമാണ് വിശദീകരണം തേടിയിട്ടുള്ളത്. ഡോ. സെബാസ്റ്റ്യന്‍ പോള്‍ നല്കിയ പരാതിയുടെ അടിസ്ഥാനത്തിലാണിത്.പ്രശ്‌നം പ്രഥമദൃഷ്ട്യാ മാധ്യമ സ്വാതന്ത്ര്യത്തെ ബാധിക്കുന്നതാണെന്ന് പ്രസ് കൗണ്‍സില്‍ സെക്രട്ടറിയുടെ കത്തില്‍ ചൂണ്ടിക്കാട്ടുന്നു. മാധ്യമ സ്വാതന്ത്ര്യം സംരക്ഷിക്കാന്‍ പ്രസ് കൗണ്‍സില്‍ ബാധ്യസ്ഥമാണ്.

പ്രസ് കൗണ്‍സിലിന്റെ ചെയര്‍മാന്‍ ആവശ്യപ്പെട്ടതനുസരിച്ചാണ് പ്രശ്‌നത്തില്‍ ഇപ്പോഴത്തെ വിവരം ആരായുന്നത്. രണ്ടാഴ്ചയ്ക്കകം സ്റ്റാറ്റസ് റിപ്പോര്‍ട്ട് നല്‍കണമെന്നാണ് കത്തില്‍ ആവശ്യപ്പെട്ടിട്ടുള്ളത്.
ജൂലായ് 19നു ശേഷം കേരള ഹൈക്കോടതിയിലും വഞ്ചിയൂര്‍ എറണാകുളം കോടതികളിലും മറ്റുമായി മാധ്യമ പ്രവര്‍ത്തകര്‍ക്കു നേരെ അക്രമം നടന്നതായി ശ്രദ്ധയില്‍പ്പെട്ടിട്ടുണ്ടെന്ന് കത്തിലുണ്ട്. ഹൈക്കോടതിയിലും മറ്റും വാര്‍ത്ത ശേഖരിക്കാന്‍ അച്ചടി, ദൃശ്യമാധ്യമ പ്രവര്‍ത്തകര്‍ക്ക് ജൂലായ് 19ന് ശേഷം പ്രവേശിക്കാനാവുന്നില്ലെന്നും അറിയുന്നു.

സുപ്രീം കോടതിയിലെ ജസ്റ്റിസ് കുര്യന്‍ ജോസഫ് പ്രശ്‌നത്തില്‍ ഇടപെട്ടതായി അറിഞ്ഞു. മുഖ്യമന്ത്രി അഡ്വക്കേറ്റ് ജനറല്‍ അധ്യക്ഷനായ സമിതിയെ നിയോഗിച്ച കാര്യവും കത്തില്‍ എടുത്തു പറയുന്നുണ്ട്.