കേരളപ്പിറവിയുടെ അറുപതാം വാര്‍ഷികം ഒരു വര്‍ഷം നീണ്ടുനില്‍ക്കുന്ന പരിപാടികളോടെ വിപുലമായി ആഘോഷിക്കാന്‍ മന്ത്രിസഭായോഗം തീരുമാനിച്ചു. 'ഐക്യകേരളത്തിന്റെ അറുപത് വര്‍ഷം നവോത്ഥാനത്തില്‍ നിന്ന് നവകേരളത്തിലേക്ക്' (വജ്രകേരളം) എന്ന പേരില്‍ നടത്തുന്ന പരിപാടികള്‍ക്ക് കേരളപ്പിറവി ദിനമായ നവംബര്‍ ഒന്നിന് തുടക്കമാകും.

അന്നേ ദിവസം തിരുവനന്തപുരത്ത് സാമൂഹികസാംസ്‌കാരിക രംഗത്തേതടക്കം സമൂഹത്തിന്റെ നാനാതുറകളിലുളള പ്രമുഖരെ പങ്കെടുപ്പിച്ചുകൊണ്ട് വിപുലമായ ആഘോഷ പരിപാടി സംഘടിപ്പിക്കും. ഇന്‍ഫര്‍മേഷന്‍ ആന്റ് പബ്ലിക് റിലേഷന്‍സ്, ടൂറിസം, സാംസ്‌കാരികം വകുപ്പുകളുടെ ആഭിമുഖ്യത്തിലാണ് പരിപാടി. സംസ്ഥാനതലത്തിലും പ്രാദേശികതലത്തിലുമായി സംഘടിപ്പിക്കുന്ന പരിപാടികളില്‍ മുഴുവന്‍ വകുപ്പുകളും സ്വയംഭരണ സ്ഥാപനങ്ങളും പഞ്ചായത്തീരാജ് സ്ഥാപനങ്ങളും പങ്കാളികളാകും.