ടിവി ഷോയ്ക്കിടെ ഭിന്നലിംഗക്കാരായവരെ അപമാനിച്ച നടി ഗീതയ്‌ക്കെതിരെ പ്രതിഷേധം ഉയരുന്നു. തെലുങ്കു ടിവി ചാനലിലെ പരിപാടിയ്ക്കിടെയാണ് സംഭവം. 20 വയസുകാരിയായ യുവതിയും സ്ത്രീയില്‍ നിന്ന് പുരുഷനായി മാറിയ 23കാരനുമായിരുന്നു ഷോയില്‍ പങ്കെടുത്തത്. ഒക്ടോബര്‍ 31ന് സംപ്രേക്ഷണം ചെയ്ത എപ്പിസോഡില്‍ തങ്ങള്‍ക്ക് പരസ്പരം വിവാഹം ചെയ്യാനുള്ള ആഗ്രഹം ഇവര്‍ തുറന്ന് പറഞ്ഞിരുന്നു. എന്നാല്‍ പരിപാടിയുടെ അവതാരകയായിരുന്ന നടി ഗീത ഇവരുടെ വൈംഗികതയെ പറ്റിയും ലിംഗഭേദത്തെ പറ്റിയും പറഞ്ഞ് അവരെ അപമാനിക്കുകയായിരുന്നു. കൂടാതെ അവര്‍ പരസ്പരം സ്‌നേഹിക്കുന്നതും അവരുടെ സ്വത്വവും പാപമാണെന്ന് പ്രഖ്യാപിക്കുകയും ചെയ്തു. കുടുംബങ്ങള്‍ക്കിടയിലെ പ്രശ്‌നങ്ങള്‍ ചോദിച്ചറിഞ്ഞ് പരിഹാരം കാണുന്ന തരം പരിപാടിയാണ് ഇത്. ചോദ്യം ചോദിക്കുന്നതും വിധി പ്രസ്താവിക്കുന്നതും എല്ലാം ഷോയുടെ അവതാരകയാണ്.
ഷോയില്‍ ചുരുക്കി അവതരിപ്പിച്ച ശേഷം ആദ്യം യുവാവിനേയും പിന്നീട് യുവതിയേയും വിളിക്കുകയായിരുന്നു. കൂടാതെ ഇവരുടെ മാതാപിതാക്കള്‍, മനശാസ്ത്ര വിദഗ്ധന്‍, ഒരു വക്കീല്‍ എന്നിവരും ഷോയില്‍ ഉണ്ടായിരുന്നു. മക്കളെ എങ്ങനെ നേര്‍വഴിയ്ക്ക് കൊണ്ടുവരാം എന്ന് മാതാപിതാക്കളോട് പറയുകയും, മനശാസ്ത്ര വിദഗ്ധനും വക്കീലിനുമൊപ്പം മുഴുവന്‍ ഭിന്നലിംഗക്കാരെയും സ്വവര്‍ഗാനുരാഗികളെയും ശകാരിക്കുകയും ചെയ്തു അവതാരക. അവരുടെ സദാചാരരഹിതവും അച്ചടക്കമില്ലാത്തതുമായ പെരുമാറ്റത്തിനായിരുന്നു ശകാരം.സ്ത്രീയില്‍ നിന്ന് പുരുഷനായി മാറിയ യുവാവ് തന്റെ ജീവിതത്തില്‍ സംഭവിച്ച കാര്യങ്ങള്‍ തുറന്ന പറയുമ്പോള്‍ വളരെ മോശമായ രീതിയിലാണ് ഗീത പരിപാടിയില്‍ സംസാരിച്ചത്. കൂടാതെ യുവാവിനെ എപ്പോഴും അവള്‍ എന്നാണ് വിശേഷിപ്പിച്ചത്.
ജീവിതകാലം മുഴുവന്‍ നിങ്ങള്‍ക്ക് നല്ല സുഹൃത്തുക്കളായിക്കൂടെ, പാര്‍ക്കില്‍ പോയും സിനിമയ്ക്ക് പോയുമുള്ള ഈ നാണക്കേടാണ്, എന്നെല്ലാമായിരുന്നു ഗീതയുടെ വാദങ്ങള്‍. നിങ്ങള്‍ എങ്ങനെ ലൈംഗികബന്ധത്തില്‍ ഏര്‍പ്പെടും എന്ന് പോലും ഒരുഘട്ടത്തില്‍ ഗീത ചോദിച്ചു.
ഒപ്പമുള്ള യുവതിയെ താന്‍ തന്റെ ജീവിതപങ്കാളിയായാണ് കാണുന്നത് എന്ന് യുവാവ് പറയുമ്പോള്‍ ക്യാമറ ഗീതയുടെ മുഖത്തേക്ക് സൂം ചെയ്യുകയും സീരിയലുകളിലെ സംഭ്രമജനകമായ രംഗങ്ങളിലേതു പോലുള്ള പശ്ചാത്തലസംഗീതം കേള്‍പ്പിക്കുകയും ചെയ്തതും ഭിന്നലിംഗക്കാരോടുള്ള ഷോയുടെ നിലപാട് തുറന്ന് പറയുന്നതാണ്.
ഗീതയുടെ യുവതിയോടുള്ള സംസാരവും വളരെ മോശമായിരുന്നു. നിനക്ക് നാണമില്ലേ എന്നാണ് ഗീത ചോദിച്ചത്. കൂടാതെ, നിന്നെ ചെരിപ്പൂരി അടിക്കും എന്ന ഭീഷണിയും ഉണ്ടായിരുന്നു. യുവതിയുടെ മാതാപിതാക്കളോട് ഇവളെ വീട്ടില്‍ കെട്ടിയിടണമെന്നും കല്യാണം കഴിപ്പിച്ച് എങ്ങോട്ടെങ്കിലും അയക്കണമെന്നും പറഞ്ഞു ഗീത.