1200 പേര്‍ക്ക് പിരിച്ചുവിടല്‍ നോട്ടീസ്; 10,000 രൂപയില്‍ താഴെ വരുമാനമുള്ള റൂട്ടുകള്‍ റദ്ദാക്കും; ജീവനക്കാരുടെ അനുപാതം വെട്ടികുറച്ചും കെ എസ് ആര്‍ ടി സിയെ രക്ഷിക്കാന്‍ രാജമാണിക്യം
കേരളം സ്റ്റേറ്റ് റോഡ് ട്രാന്‍സ്പോര്‍ട് കോര്‍പറേഷനെ രക്ഷിക്കാന്‍ ഉറപ്പിച്ചു രാജമാണിക്യം രംഗത്ത്. കെ എസ് ആര്‍ ടി സി എംഡിയായി ചുമതലയേറ്റതുമുതല്‍ കൂടുതല്‍ കടുത്ത നടപടികളിലേക്ക് അദ്ദേഹം പോവുകയാണ്. ജീവനക്കാരുടെ അവധികള്‍ക്ക് നിയന്ത്രണം ഏര്‍പ്പെടുത്താനാണ് തീരുമാനം. കെ എസ് ആര്‍ ടി സിയെ ഏതു വിധേനയും ലാഭത്തിലെത്തിക്കാണ് രാജമാണിക്യത്തിന്റെ ശ്രമം. ഗണേശ് കുമാര്‍ കെ എസ് ആര്‍ ടി സി മന്ത്രിയായിരുന്നപ്പോള്‍ പൊതു മേഖലാ ബസ് കമ്ബനി ലാഭത്തിലായിരുന്നു. മാത്യു ടി തോമസിനും നേട്ടമുണ്ടാക്കാന്‍ മന്ത്രിസ്ഥാനത്തിലൂടെ കഴിഞ്ഞു.
അതുകൊണ്ട് തന്നെ കെ എസ് ആര്‍ ടി സിയെ പരിഷ്‌കരണത്തിലൂടെ ലാഭത്തിലേക്ക് കൊണ്ടു വരാന്‍ കഴിയുമെന്നാണ് രാജമാണിക്യത്തിന്റെ പ്രതീക്ഷ. ഇതിനായുള്ള കടുത്ത നടപടികളുടെ ഭാഗമായി മതിയായ കാരണങ്ങളില്ലാതെ തുടര്‍ച്ചയായി 89 ദിവസത്തിലധികം ജോലിക്കു ഹാജരാകാത്തവരെ പിരിച്ചുവിടാന്‍ നിര്‍ദ്ദേശം നല്‍കി. 1200 പേര്‍ക്ക് കാരണം കാണിക്കല്‍ നോട്ടിസും നല്‍കി. ജീവനക്കാരുടെ അനുപാതം കുറയ്ക്കാനും പെന്‍ന്മഷന്‍ നല്‍കാന്‍ സര്‍ക്കാരിനെയും എല്‍.െഎസി പോലെയുള്ള സ്ഥാപനങ്ങളെയും ഉള്‍പ്പെടുത്തി പെന്‍ഷന്‍ ഫണ്ട് ട്രസ്റ്റ് രൂപീകരിക്കാനും ആലോചിക്കുന്നുണ്ട്.
പതിനായിരം രൂപയില്‍ താഴെ വരുമാനമുള്ള മുഴുവന്‍ സര്‍വീസുകളും ജനുവരിയോടെ അവസാനിപ്പിക്കണമെന്നും എംഡി രാജമാണിക്യം കര്‍ശന നിര്‍ദ്ദേശം നല്‍കി. യൂണിറ്റ് ഓഫിസര്‍മാര്‍ക്ക് 89 ദിവസംവരെ ജീവനക്കാര്‍ക്ക് അവധി അനുവദിക്കാം. ഈ ആനുകൂല്യം മുതലെടുത്ത് ഓരോ 89 ദിവസം കഴിയുമ്‌ബോഴും മെഡിക്കല്‍ സര്‍ട്ടിഫിക്കറ്റ് ഹാജരാക്കി ഒട്ടേറെപ്പേര്‍ മറ്റ് ജോലികള്‍ക്കു പോകുന്നുണ്ടെന്നാണു കണ്ടെത്തല്‍. ശമ്ബളം കിട്ടിയില്ലെങ്കിലും ആനുകൂല്യങ്ങള്‍ നഷ്ടപ്പെടില്ല. യൂണിയന്റെകൂടി ഒത്താശയോടെയാണ് പലയിടത്തുമിതു നടക്കുന്നത്. ഇത്തരത്തില്‍ നിരന്തരം അവധിയിലായ 1200 പേര്‍ക്കാണ് കാരണം കാണിക്കല്‍ നോട്ടിസ് അയച്ചിരിക്കുന്നത്.
ഡിസംബര്‍ ഒന്നിന് വൈകിട്ട് അഞ്ചിന് മുമ്ബ് നേരിട്ട് ഹാജരായി മതിയായ കാരണം ബോധിപ്പിക്കാത്തവരെ പിരിച്ചുവിടാനാണു നിര്‍ദ്ദേശം. യൂണിറ്റ് ഓഫിസര്‍മാര്‍ക്ക് അനുവദിക്കാവുന്ന അവധി 15 ദിവസമായി നിജപ്പെടുത്തിയിട്ടുമുണ്ട്. അതില്‍ കൂടുതല്‍ വേണ്ടവര്‍ എംഡിയുടെ ഓഫിസില്‍ നിന്ന് പ്രത്യേക അനുമതി വാങ്ങണം. നാല്‍പത് ശതമാനത്തോളം സര്‍വീസുകളും രണ്ടുമാസത്തിനുള്ളില്‍ ലാഭകരമായ തരത്തില്‍ പുനഃക്രമീകരിക്കണമെന്നും നിര്‍ദേശിച്ചിട്ടുണ്ട്.
https://www.facebook.com/Malayalivartha
