500, 100, 50 രൂപ നോട്ടുകളുടെ ദൗര്‍ലഭ്യം രൂക്ഷമായി തുടരുകയാണ്. മിക്ക എടിഎമ്മുകളും കാലിയാണിപ്പോള്‍. തീരുന്ന മുറയ്ക്കു പണം നിറയ്ക്കണമെന്നു റിസര്‍വ് ബാങ്ക് എല്ലാ ബാങ്കുകള്‍ക്കും നിര്‍ദേശം നല്‍കിയിട്ടുണ്ടെങ്കിലും ചെസ്റ്റുകളില്‍ ആവശ്യത്തിനു പണമില്ല. ചലച്ചിത്രമേളയില്‍ പങ്കെടുക്കുന്നതിനായി പതിനായിരങ്ങള്‍ തമ്ബടിക്കുന്ന തലസ്ഥാനത്താണു നോട്ടു ക്ഷാമം അതിരൂക്ഷം.

മൂന്നു ദിവസം ബാങ്ക് അവധിയാണെന്നിരിക്കെ 2000 രൂപയുടെ നോട്ട് മാത്രമാണ് മിക്ക എടിഎമ്മുകളിലുമുള്ളത്. ചില എടിഎമ്മുകളില്‍ മാത്രമാണ് 500, 100 നോട്ടുകള്‍ ലഭിക്കുന്നത്. കോഴിക്കോട്, കൊച്ചി, തിരുവനന്തപുരം നഗരങ്ങളില്‍ ബാങ്കുകളോട് ചേര്‍ന്നുള്ള എടിഎമ്മുകളില്‍ മാത്രമാണ് പണമുള്ളത്. ഇവിടെയാകട്ടെ അധികവും 2000 രൂപ നോട്ടുകള്‍ മാത്രവും.

എടിഎമ്മുകള്‍ കാലിയാകുന്നതനുസരിച്ച് നിറയ്ക്കുന്നതില്‍ അധികവും 2000 നോട്ടുകളാണ്. ശനി, ഞായര്‍, തിങ്കളാഴ്ച്ച നബിദിന അവധിയും കാരണം മിക്കവാറും എടിഎമ്മുകളില്‍ പണം നിറച്ചെങ്കിലും മണിക്കൂറുകള്‍ക്കുള്ളില്‍ അതെല്ലാം കാലിയായതായി ബാങ്കധികൃതര്‍ വ്യക്തമാക്കുന്നു.

പണം നിറയ്ക്കുമെന്ന് ബാങ്കധികൃതര്‍ പറയുമ്‌ബോഴും 2000 നോട്ടില്‍ക്കുറഞ്ഞൊന്നും പ്രതീക്ഷയ്ക്കും വകയില്ല. ചെറുകിട പട്ടണങ്ങളിലും ഗ്രാമപ്രദേശങ്ങളിലുമുള്ള എടിഎമ്മുകള്‍ അടഞ്ഞുകിടക്കുക തന്നെയാണ്.