സംസ്ഥാന സ്‌കൂള്‍ കലോല്‍സവം ജനുവരി പതിനാറിന്, വേദികള്‍ക്ക് നദികളുടെ പേരുകള്‍
കണ്ണൂരില്‍ ജനുവരി പതിനാറിന് തുടങ്ങുന്ന അമ്പത്തിയേഴാമത് സംസ്ഥാനസ്‌കൂള്‍ കലോല്‍സവവേദികള്‍ക്ക് നദികളുടെ പേരുകള്‍. കണ്ണൂര്‍ പൊലീസ് മൈതാനം പ്രധാനവേദിയാക്കി ഇരുപത് വേദികളും പരിപാടിക്രമങ്ങളും സംഘാടക സമിതി നിശ്ചയിച്ചു. കലോല്‍സവത്തിന്റെ ഭാഗമായി സ്‌റ്റേഡിയം കോര്‍ണറില്‍ എല്ലാ ദിവസവും വൈകുന്നേരം സാംസ്‌കാരിക പരിപാടികളും ഒരുക്കിയിട്ടുണ്ട്.
പ്രധാനവേദിയായ പൊലീസ് മൈതാനത്തിന്റെ പേര് നിള. നെയ്യാര്‍, പമ്പ, കരമന, പെരിയാര്‍ എന്നിവയില്‍ തുടങ്ങി ഉത്തരമലബാറിന്റെ ജലസാന്നിധ്യമായ മയ്യഴി,ചന്ദ്രഗിരി, വളപട്ടണം കാര്യങ്കോട് , കവ്വായി എന്നിവയാണ് മറ്റുവേദികളുടെ പേരുകള്‍. പൊലീസ് മൈതാനം , കലക്ടറേറ്റ് മൈതാനം , ടൗണ്‍ സ്‌ക്വയര്‍ , ജവഹര്‍ സ്‌റ്റേഡിയം, മുനിസിപ്പല്‍ സ്‌കൂള്‍ എന്നീ പ്രധാനവേദികളെല്ലാം അടുത്തുതന്നെയാണന്നത് മല്‍സരാര്‍ഥികള്‍ക്കും കാണികള്‍ക്കും സൗകര്യമാകും. മറ്റു വേദികളെല്ലാം പ്രധാനവേദിയില്‍ നിന്ന് ഒന്നര കിലോമീറ്റര്‍ ചുറ്റളവിലാണ്. സംഘാടകസമിതി ഓഫിസ് മുനിസിപ്പല്‍ ഹൈസ്‌കൂളിലും പ്രോഗ്രാം കമ്മിറ്റി ഓഫിസ് ജൂബിലി ഹാളിലുമാണ്. ഗവ. ട്രെയിനിങ് സ്‌കൂളിലാണു ഭക്ഷണശാല പ്രവര്‍ത്തിക്കുക.
ഉദ്ഘാടനസമ്മേളനവും സമാപനസമ്മേളനവും ഉള്‍പ്പെടെ മേളയുടെ ഗ്ലാമര്‍ ഇനങ്ങളായ മോഹിനിയാട്ടം , കുച്ചിപിടി, ഒപ്പന, ഭരതനാട്യം, സംഘനൃത്തം തുടങ്ങിയ ഇനങ്ങളും ഒന്നാം വേദിയായ പൊലീസ് മൈതനത്തിലാണ്. അറബിക് കലോല്‍സവം സെന്റ് മൈക്കിള്‍സ് ആംഗ്ലോ ഇന്ത്യന്‍ ഹയര്‍ സെക്കന്‍ഡറി സ്‌കൂളിലും സംസ്‌കൃതോല്‍സവം തളാപ്പ് മിക്‌സ്ഡ് യുപി സ്‌കൂള്‍, സെന്റ് മൈക്കിള്‍സ് സ്‌കൂള്‍ എന്നിവിടങ്ങളിലും നടക്കും. യാത്രാസൗകര്യവും താമസസൗകര്യവും ഉള്‍പ്പെടെയുള്ള പരിമിതികള്‍ പരിഹരിക്കാന്‍ നടപടികള്‍ പുരോഗമിക്കുകയാണെന്നും സംഘാടകര്‍ പറഞ്ഞു.
https://www.facebook.com/Malayalivartha
