ദേശീയ-സംസ്ഥാന പാതയോരത്തെ 110 മദ്യ ഔട്ട്ലെറ്റുകള് ഒരു മാസത്തിനകം മാറ്റി സ്ഥാപിക്കും
ദേശീയ, സംസ്ഥാന പാതകളില് മദ്യവില്പനശാലകള് പ്രവര്ത്തിപ്പിക്കുന്നതിനു സുപ്രീം കോടതി നിരോധനമേര്പ്പെടുത്തിയ പശ്ചാത്തലത്തില് സംസ്ഥാനത്ത് ഇത്തരം പാതകള്ക്കു സമീപം പ്രവര്ത്തിക്കുന്ന 110 ഔട്ട്ലെറ്റുകള് മാറ്റി സ്ഥാപിക്കാന് ബവ്റിജസ് കോര്പറേഷന് (ബവ്കോ) നടപടി തുടങ്ങി. ഒരു മാസത്തിനകം എല്ലാ ഔട്ട്ലെറ്റുകളും മാറ്റി സ്ഥാപിക്കുമെന്ന് ബവ്റിജസ് കോര്പറേഷന് എംഡി എച്ച്.വെങ്കിടേഷ് അറിയിച്ചു. സുപ്രീംകോടതിയുടെ വിധിപ്പകര്പ്പ് സര്ക്കാര് നിയമവകുപ്പിനു കൈമാറിയതിനു പിന്നാലെയാണ് ഈ നീക്കം.
ഇതിന്റെ ഭാഗമായി പാലക്കാട് കൊടുവായൂരിലെ ഔട്ട്ലെറ്റ് എട്ടന്നൂരിലേക്കു മാറ്റി. പാതയോരത്തെ ഔട്ട്ലെറ്റുകള് മാറ്റുന്നത് പ്രായോഗികമല്ലാത്തതിനാല് വിധിക്കെതിരെ സര്ക്കാര് പുനപരിശോധനാ ഹര്ജി നല്കണമെന്നു കാട്ടി സമ്മര്ദ്ദം ചെലുത്താന് നേരത്തെ ബവ്കോ ശ്രമിച്ചിരുന്നു.
ബവ്കോയുടെ 270 മദ്യവില്പന കേന്ദ്രങ്ങളില് പാതയോരത്തെ 110 മദ്യശാലകള് മാറ്റി സ്ഥാപിക്കുക പ്രായോഗികമല്ലെന്നും ഇതിനായി അബ്കാരി ചട്ടം ഭേദഗതി ചെയ്യേണ്ടി വരുമെന്നും കാട്ടി സമ്മര്ദ്ദം ചെലുത്താനായിരുന്നു നീക്കം. ചെറിയ സംസ്ഥാനമെന്ന നിലയില് കേരളത്തില് ഈ വിധി നടപ്പാക്കുക പ്രായോഗികമല്ലെന്നു കാട്ടി പുനപരിശോധന ഹര്ജിയിലൂടെ കോടതിയെ ബോധ്യപ്പെടുത്തണമെന്നും കോര്പറേഷന് ആവശ്യപ്പെട്ടിരുന്നു. എന്നാല് വിധിക്ക് അനുകൂലമായ നിലയില് സംസ്ഥാന സര്ക്കാരില് നിന്ന് നീക്കമുണ്ടായ സാഹചര്യത്തിലാണ് ഔട്ട്ലെറ്റുകള് മാറ്റിസ്ഥാപിക്കാന് കോര്പ്പറേഷന് ഒരുങ്ങുന്നത്.
നിലവില് ദേശീയപാതയോരങ്ങളില് പ്രവര്ത്തിക്കുന്ന മദ്യവില്പന കേന്ദ്രങ്ങള് മാറ്റിസ്ഥാപിക്കാനായി പകരം സ്ഥലം കണ്ടെത്താന് ഉദ്യോഗസ്ഥര്ക്കു ബവ്കോ നിര്ദേശം നല്കിക്കഴിഞ്ഞു. പുതിയ കേന്ദ്രങ്ങള് കണ്ടെത്തുന്നതിനു മിക്ക സ്ഥലത്തും പ്രാദേശിക എതിര്പ്പുള്ളതു കോര്പറേഷനു പ്രതികൂല ഘടകമാണ്. ഉചിത സ്ഥലം ലഭിച്ചില്ലെങ്കില് പല മദ്യശാലകളും പൂട്ടേണ്ടിവരുമെന്നും സൂചനയുണ്ട്. ബവ്കോയ്ക്കു പുറമേ കണ്സ്യൂമര്ഫെഡിന്റെ 36 മദ്യവില്പന കേന്ദ്രങ്ങളില് പകുതിയിലേറെയും മാറ്റിസ്ഥാപിക്കേണ്ടതായി വരും. നാനൂറോളം ബീയര്-വൈന് പാര്ലറുകളെയും പത്തു പഞ്ചനക്ഷത്ര ഹോട്ടലുകളിലെ ബാറുകളെയും വിധി ബാധിക്കും. ബീയര്-വൈന് പാര്ലറുകള് പലതും പൂട്ടിപ്പോകാനാണു സാധ്യതയെന്ന് എക്സൈസ് അധികൃതര് പറഞ്ഞു. മാറ്റിസ്ഥാപിക്കേണ്ട മുഴുവന് മദ്യവില്പന കേന്ദ്രങ്ങളുടെയും പട്ടിക ഉടന് തയാറാക്കി നല്കാന് എക്സൈസ് കമ്മിഷണര്ക്കു സര്ക്കാര് നിര്ദേശം നല്കിയിട്ടുണ്ട്.
ദേശീയ, സംസ്ഥാന പാതയോരത്തെ മദ്യശാലകള്ക്ക് അടുത്ത മാര്ച്ച് 31നു ശേഷം ലൈസന്സ് പുതുക്കിനല്കരുതെന്നാണ് സുപ്രീംകോടതി ചീഫ് ജസ്റ്റിസ് ടി.എസ്.ഠാക്കൂര് അധ്യക്ഷനായ ബെഞ്ച് സംസ്ഥാനങ്ങളോട് വിധിയിലൂടെ നിര്ദ്ദേശിച്ചത്. ദേശീയ, സംസ്ഥാന പാതകളുടെ വശങ്ങളിലുള്ള മദ്യവില്പനശാലകള് നിര്ത്തലാക്കുന്നതു സംബന്ധിച്ചു ദേശീയപാതാ അതോറിറ്റി ഇറക്കിയ സര്ക്കുലറും വിവിധ ഹൈക്കോടതികളുടെ ഉത്തരവുകളും ചോദ്യംചെയ്തുള്ള ഹര്ജികള് പരിഗണിച്ചായിരുന്നു കോടതിയുടെ നടപടി.
https://www.facebook.com/Malayalivartha
