ബിവറേജസ് കോര്‍പറേഷന്റെ മദ്യവില്‍പ്പനശാലകളില്‍ ക്യൂവില്‍നിന്നു മദ്യം വാങ്ങുന്ന രീതി അവസാനിപ്പിക്കണമെന്നാണു എംഡിയുടെ ഉത്തരവ്. സ്റ്റാന്‍ഡിങ് ക്യൂവിനു പകരം ഇനി മുതല്‍ സിറ്റിങ് ക്യൂ മാത്രമേ പാടുള്ളൂവെന്നും ജില്ലകളിലെ മാനേജര്‍മാര്‍ക്ക് ഇന്നലെ ലഭിച്ച ഉത്തരവില്‍ പറയുന്നു. ബസ് സ്‌റ്റോപ്പുകളില്‍ ഏര്‍പ്പെടുത്തിയിരിക്കുന്ന രീതിയിലുള്ള ഇരിപ്പു സംവിധാനമാണു ഇനി മദ്യവില്‍പനശാലകള്‍ക്കു മുന്നില്‍ ഒരുക്കുക.

മദ്യവില്‍പനശാലകളോടനുബന്ധിച്ച് ശുദ്ധജല വിതരണത്തിനുള്ള സൗകര്യവും ശുചിമുറികളും സജ്ജമാക്കണമെന്നും ഉത്തരവില്‍ പ്രത്യേകം പറഞ്ഞിട്ടുണ്ട്. മദ്യം വാങ്ങാനെത്തുന്നവരുടെ ബുദ്ധിമുട്ടുകള്‍ കണക്കിലെടുത്ത് കൂടുതല്‍ സൗകര്യങ്ങളേര്‍പ്പെടുത്തണമെന്നു സംസ്ഥാന മനുഷ്യാവകാശ കമ്മിഷന്‍ കോര്‍പറേഷനു നിര്‍ദേശം നല്‍കിയിരുന്നു. ഇതേ തുടര്‍ന്നാണു ബിവറേജസ് കോര്‍പറേഷനില്‍ പുതിയ ഉത്തരവിറക്കിയിരിക്കുന്നത്. എന്നു മുതല്‍ പുതിയ പരിഷ്‌കാരം നടപ്പാക്കണമെന്നു എംഡിയുടെ ഉത്തരവില്‍ പറഞ്ഞിട്ടില്ല.