മലയാളികളുടെ വിലകളയാന്‍ ഇങ്ങനെയും കുറെ പേര്‍ കേരളത്തില്‍ ജീവിക്കുന്നു. നമ്മള്‍ ബംഗാളികളെയും മറ്റ് അന്യസംസ്ഥാനക്കാരെയും കുറ്റം പറയുമ്പോള്‍ ഇവിടെയുള്ളവര്‍ കാണിക്കുന്നതും അത് തന്നെയെന്ന് ഒരു നിമിഷം ആലോചിക്കേണ്ടിയിരിക്കുന്നു. ഇവര്‍ ആലോചിക്കുന്നുണ്ടോ നാളെ നമ്മുടെ സഹോദരി അല്ലെങ്കില്‍ അമ്മ ഇതുപോലെ ഒറ്റയ്ക്ക് ട്രെയിനില്‍ യാത്ര ചെയ്യുമ്പോള്‍ അവര്‍ക്കും ഇങ്ങനെയുള്ള ദുരനുഭവങ്ങള്‍ സംഭവിക്കാമെന്ന്.

ട്രെയിന്‍ യാത്രയ്ക്കിടെ യുവതിക്ക് നേരെ മലയാളി യുവാക്കളുടെ പീഡനശ്രമം. മേഘാലയ സ്വദേശിനിയായ യുവതിക്ക് നേരെയാണ് ഗോഹട്ടി തിരുവനന്തപുരം എക്‌സ്പ്രസില്‍ ഫെബ്രുവരി 17ന് പീഡനശ്രമം ഉണ്ടായത്. സംഭവത്തില്‍ മേഘാലയ സ്വദേശിനിയായ യുവതി തമ്ബാനൂര്‍ പോലീസില്‍ പരാതി നല്‍കി.

തിരുവനന്തപുരത്തെ ഒരു കോളജ് പ്രൊഫസറുടെ വീട്ടില്‍ ജോലിക്കുനില്‍ക്കുന്ന യുവതിയാണ് പരാതിക്കാരി. ഗുവാഹത്തിയില്‍നിന്ന് തിരുവനന്തപുരത്തേക്കു വരുമ്‌ബോഴാണ് പീഡനശ്രമമുണ്ടായത്. യാത്രാമധ്യേ സെക്കന്‍ഡ് എസി കംപാര്‍ട്‌മെന്റില്‍ ഉറങ്ങുകയായിരുന്ന യുവതിയുടെ പുതപ്പുമാറ്റിയ സഹയാത്രികരായ മൂന്നു യുവാക്കള്‍ കടന്നുപിടിച്ചുവെന്നാണ് പരാതി.

മൂവരും മലയാളികളാണ്. ഉറക്കത്തില്‍നിന്നുണര്‍ന്ന യുവതി ബഹളം വച്ചെങ്കിലും മറ്റു സഹയാത്രികര്‍ ആരും സഹായത്തിനെത്തിയില്ലെന്നും പരാതിയില്‍ പറഞ്ഞിട്ടുണ്ട്. തുടര്‍ന്ന് ജോലി ചെയ്യുന്ന വീട്ടിലെത്തിയ യുവതി വീട്ടുകാരുടെ സഹായത്തോടെ തമ്ബാനൂര്‍ പോലീസ് സ്‌റ്റേഷനില്‍ പരാതി നല്‍കുകയായിരുന്നു.

ഉപദ്രവിച്ച യുവാക്കള്‍ സഞ്ചരിച്ച ബെര്‍ത്ത് നമ്ബര്‍ ഉള്‍പ്പെടെയാണ് പരാതി നല്‍കിയിരിക്കുന്നത്. ഇവര്‍ എറണാകുളത്ത് ഇറങ്ങിയതായും പരാതിയില്‍ പറയുന്നു. കഴിഞ്ഞദിവസം കൊച്ചിയില്‍ പ്രമുഖ നടിയെ ഒരു സംഘം ഗുണ്ടകള്‍ തട്ടിക്കൊണ്ടുപോയി പീഡിപ്പിക്കാന്‍ ശ്രമിച്ച വാര്‍ത്തകള്‍ പുറത്തുവരുന്നതിനിടെയാണ് മറ്റൊരു പീഡനവാര്‍ത്തകൂടി വന്നിരിക്കുന്നത്.