നടിയുടെ മൊഴി അടിസ്ഥാനമാക്കിയുള്ള ചോദ്യങ്ങള്ക്കു മുന്നില് പതറി സുനി...
ആക്രമിക്കപ്പെട്ട നടി കോടതി മുന്പാകെ നല്കിയ മൊഴികളില് പരാമര്ശിച്ച രണ്ടു കാര്യങ്ങളില് ഊന്നി പൊലീസ് നടത്തിയ ചോദ്യം ചെയ്യലില് മുഖ്യപ്രതി സുനില്കുമാര് പതറി. അതിക്രമിച്ചു നടിയുടെ കാറില് കയറിയ ശേഷം സുനില്കുമാര് പറഞ്ഞ വാചകം ഇതാണ്. ''ഒരു ക്വട്ടേഷനാണ്, കുറച്ചു ദൃശ്യങ്ങള് പകര്ത്തണം സഹകരിച്ചാല് രണ്ടു മൂന്നു മിനിറ്റു കൊണ്ട് വിട്ടയയ്ക്കാം.''
എന്തായിരുന്നു ക്വട്ടേഷന്?, ആരാണ് ക്വട്ടേഷന് നല്കിയത്? എന്നീ ചോദ്യങ്ങള്ക്കു മുന്നില് ആദ്യം ഉത്തരം മുട്ടിയെങ്കിലും അതു നടിയെ ഭയപ്പെടുത്താന് പറഞ്ഞതാണെന്നായിരുന്നു മൊഴി. സഹകരിച്ചാല് എല്ലാം വേഗം തീര്ക്കാമെന്നും അല്ലെങ്കില് തമ്മനത്തെ ഫ്ലാറ്റിലേക്കു കൊണ്ടുപോകുമെന്നും അവിടെയുള്ളവര് എന്തു ചെയ്യുമെന്ന് തനിക്കു പോലും പറയാന് കഴിയില്ലെന്നും സുനില് ഭീഷണിപ്പെടുത്തി എന്നാണ് നടിയുടെ മൊഴി. ''ലഹരി മരുന്നു കുത്തിവച്ചു കാര്യം സാധിക്കാനാണ് എന്നോടു പറഞ്ഞിട്ടുള്ളത്. ഞാനതു ചെയ്യുന്നില്ല, സഹകരിക്കണം'' എന്നും സുനില് പറഞ്ഞു.
എന്നാല്, ഇങ്ങനെ പറഞ്ഞിട്ടില്ലെന്നാണ് സുനില്കുമാറിന്റെ മൊഴി. ഇന്നലെ ഒപ്പം പിടിക്കപ്പെട്ട വിജീഷ് അടക്കം അറസ്റ്റിലായ മറ്റു പ്രതികളെയും സുനിലിനെയും പ്രത്യേകം മുറികളിലാണു ചോദ്യം ചെയ്യല് പുരോഗമിക്കുന്നത്. മറ്റു പ്രതികള് സമാനമായി പറഞ്ഞ പല കാര്യങ്ങള്ക്കും വിരുദ്ധമായ മൊഴികളാണു സുനില് പറയുന്നത്.
ഇന്ന് ഉച്ചയ്ക്ക് ഒരു മണിക്കു മുന്പ് രണ്ടു പ്രതികളെയും മജിസ്ട്രേട്ട് മുന്പാകെ ഹാജരാക്കി റിമാന്ഡ് ചെയ്യണം. അതിനു മുന്പു കുറ്റകൃത്യം സംബന്ധിച്ച പരമാവധി വിവരങ്ങള് പുറത്തു കൊണ്ടുവരാനാണ് പൊലീസിന്റെ ശ്രമം. പ്രതിയെ കസ്റ്റഡിയില് വാങ്ങാന് പൊലീസ് അപേക്ഷ സമര്പ്പിക്കും. ഇന്നു കോടതി അവധിയായതിനാല് കസ്റ്റഡി അപേക്ഷ ശനിയാഴ്ച പരിഗണിക്കാനാണു സാധ്യത. പ്രതികളെ മജിസ്ട്രേട്ടിന്റെ വസതിയിലാകും ഹാജരാക്കുക.
https://www.facebook.com/Malayalivartha
