അനശ്വരയുടെ മൃതദേഹം സിപിഐഎം ചെറുതന ഓഫീസ് പരിസരത്ത് സംസ്ക്കരിക്കും
സാമ്പത്തിക ബുദ്ധിമുട്ടില് മനംനൊന്ത് ജീവനൊടുക്കിയ കാരിച്ചാല് സ്വദേശിനിയും പ്ലസ് വണ് വിദ്യാര്ഥിനിയുമായ അനശ്വരയുടെ മൃതദേഹം സിപിഐഎം ചെറുതന ലോക്കല് കമ്മറ്റി ഓഫീസ് പരിസരത്ത് സംസ്ക്കരിക്കും. ഇന്ന് ഉച്ചയ്ക്ക് 12നാണ് സംസ്കാരം. ഹരിപ്പാട് ആയാപറമ്പ് പുതുമനയില് ബൈജുശ്രീലതാകുമാരി ദമ്പതികളുടെ മകളായ അനശ്വര കഴിഞ്ഞദിവസമാണ് ആത്മഹത്യ ചെയ്തത്. വീയപുരം ഹയര്സെക്കന്ററി സ്ക്കൂളിലെ പ്ലസ്വണ് വിദ്യാര്ഥിനിയായ അനശ്വര സ്കൂളില് നിന്ന് വീട്ടിലേക്ക് മടങ്ങുമ്പോള് പാലത്തിന്റെ മുകളില് നിന്നും ആറ്റിലേക്ക് ചാടുകയായിരുന്നു. ആശുപത്രിയില് എത്തിച്ചെങ്കിലും മരിക്കുകയായിരുന്നു.
വെള്ളിയാഴ്ച ആലപ്പുഴ മെഡിക്കല് കോളേജ് ആശുപത്രിയില് പോസ്റ്റ്മോര്ട്ടം നടത്തി ബന്ധുക്കളും നാട്ടുകാരും മൃതദേഹം ഏറ്റുവാങ്ങി. എന്നാല് സംസ്കരിക്കാന് ഇടമില്ലാത്തതിനാല് ഹരിപ്പാട് സ്വകാര്യാശുപത്രി മോര്ച്ചറിയില് സൂക്ഷിച്ചിരിക്കുകയായിരുന്നു. വിവരം അറിഞ്ഞ് സിപിഐഎം നേതാക്കള് മാതാപിതാക്കളെ സമീപിച്ച് ആശ്വസിപ്പിക്കുകയും സംസ്കാരത്തിന് പാര്ട്ടി ഓഫീസ് വളപ്പില് സൗകര്യം ഒരുക്കാമെന്ന് അറിയിക്കുകയുമായിരുന്നു. ചെറുതന ലോക്കല്കമ്മിറ്റി ഓഫീസിനോടു ചേര്ന്നാണ് അനശ്വരയുടെ വാടകവീട്.
https://www.facebook.com/Malayalivartha
