പൂജപ്പുരയില്‍ ആശുപത്രിയിലേക്ക് പോകും വഴി യുവതി കടത്തിണ്ണയില്‍ പ്രസവിച്ചു. ചാടിയറ സ്വദേശിനിയായ യുവതിക്കാണ് കടത്തിണ്ണയില്‍ പ്രസവിക്കേണ്ട അവസ്ഥയുണ്ടായത്. ബുധനാഴ്ച ഉച്ചയ്ക്ക് ഒന്നരയ്ക്കാണ് സംഭവം. പെണ്‍കുഞ്ഞിന് ജന്മം നല്‍കിയ യുവതിയെ ഉടന്‍തന്നെ ആംബുലന്‍സില്‍ തൈക്കാട് ആശുപത്രിയിലെത്തിച്ചു.

പൂര്‍ണ്ണ ഗര്‍ഭിണിയായ യുവതി പ്രസവവേദനയെ തുടര്‍ന്ന് തൈക്കാട് ആശുപത്രിയിലെത്താനാണ് പൂജപ്പുര ജംഗ്ഷനിലെത്തിയത്. സ്ഥലത്തില്ലാത്ത ഭര്‍ത്താവിനെ ഫോണില്‍ വിവരമറിയിച്ചിരുന്നു. എന്നാല്‍ പൂജപ്പുരയിലെത്തിയ യുവതിക്ക് പ്രസവവേദന കടുത്തു. തുടര്‍ന്ന് ജംഗ്ഷനിലെ കടത്തിണ്ണയിലിരുന്നു. പ്രസവവേദനയെ തുടര്‍ന്ന് അവശയായ യുവതിയെ അവിടെയുണ്ടായിരുന്ന മറ്റ് സ്ത്രീകള്‍ ആശുപത്രിയിലെത്തിക്കാന്‍ ശ്രമിച്ചെങ്കിലും സാധിച്ചില്ല.

സ്ഥലത്തുണ്ടായിരുന്നവര്‍ വിവരമറിയിച്ചതിനെ തുടര്‍ന്ന് പൂജപ്പുര പൊലീസ് സ്‌റ്റേഷന് എതിര്‍വശത്തെ സര്‍ക്കാര്‍ ആശുപത്രിയില്‍ നിന്ന് ഒരു ഡോക്ടറും നഴ്‌സും സ്ഥലത്തേക്ക് പാഞ്ഞെത്തി പ്രസവത്തിന് സൗകര്യമൊരുക്കി. യുവതി കിടന്ന സ്ഥലത്ത് തുണികെട്ടിമറച്ചാണ് പ്രസവം നടത്തിയത്. പ്രസവത്തിന് തൊട്ടുമുമ്ബ് യുവതിയുടെ ഭര്‍ത്താവും സ്ഥലത്തെത്തി. ഔദ്യോഗിക ആവശ്യങ്ങള്‍ക്ക് പാങ്ങോട് മിലിട്ടിറി ക്യാമ്ബിലെത്തി വിഴിഞ്ഞം ഹാര്‍ബറിലേക്ക് മടങ്ങുകയായിരുന്ന കോസ്റ്റ് ഗാര്‍ഡിന്റെ ആംബുലസില്‍ യുവതിയെ ഡോക്ടര്‍റും നഴ്‌സുമടങ്ങുന്ന സംഘം ഉടന്‍ തൈക്കാട് ആശുപത്രിയിലെ ലേബര്‍ റൂമിലെത്തിച്ച് ചികിത്സ നല്‍കി.