നെടുമ്പാശ്ശേരിയില്‍ നിന്ന് സംസ്ഥാനജില്ലാ നേതാക്കള്‍ക്കൊപ്പം കേന്ദ്രമന്ത്രി കണ്ണന്താനം പാര്‍ട്ടി പ്രവര്‍ത്തകന്‍ തമ്പലക്കാട് പാലയ്ക്കല്‍ രവീന്ദ്രന്റെ വസതിയിലെത്തി. ചുറ്റുംകൂടിയവരോട് കുശലംപറഞ്ഞ് ഇളംമഞ്ഞ നിറമുള്ള ജൂബയുടെ പോക്കറ്റില്‍ നിന്ന് ഫോണെടുത്ത് സമയം നോക്കി. തൊട്ടുപിന്നാലെ വി.എസ്. വിഷയത്തില്‍ പ്രതികരണം ആരാഞ്ഞ് മാദ്ധ്യമപ്രവര്‍ത്തകരുമെത്തി. എല്ലാവര്‍ക്കും വേണ്ടതൊക്കെ' നല്‍കിയ ശേഷം ഒരു ചിരിയും പാസാക്കി നേരെ ഊണു മുറിയില്‍. കൈകഴുകി മഞ്ഞക്കരയന്‍ മുണ്ടിന്റെ അറ്റത്ത് തുടച്ച ശേഷം തൂശനിലയില്‍ നിരത്തിവച്ചിരുന്ന ശര്‍ക്കരവരട്ടിയെടുത്ത് കടിച്ചു. ഇഷ്ടപ്പെട്ട മട്ടില്‍ തൊടുകറികളോരോന്നും രുചിച്ചു നോക്കുമ്പോഴേക്കും തൊട്ടടുത്ത് കുമ്മനം രാജശേഖരനും വി. മുരളീധരനും അടക്കമുള്ള നേതാക്കള്‍ ഇടംപിടിച്ചിരുന്നു.
ചൂട് ചോറില്‍ പപ്പടവും പരിപ്പും ചേര്‍ത്തിളക്കി കഴിക്കുമ്പോള്‍ തനിനാട്ടുമ്പുറത്തുകാരനായി കണ്ണന്താനം. ഒടുവില്‍ മധുരം കിനിയുന്ന അടപ്രഥമന്‍ ആസ്വദിച്ചു കുടിച്ച ശേഷം അല്പം വിശ്രമിച്ചാണ് സ്വീകരണ സ്ഥലമായ കാഞ്ഞിരപ്പള്ളിയിലേയ്ക്ക് പോയത്. കാഞ്ഞിരപ്പള്ളി പേട്ടക്കവലയും പരിസരവും പ്രവര്‍ത്തകരെക്കൊണ്ട് നിറഞ്ഞിരുന്നു. മുദ്രാവാക്യംവിളികളുടെ അകമ്പടിയില്‍ കണ്ണന്താനം വേദിയിലേയ്ക്ക്.

നൂറു കണക്കിന് ബൈക്കുകളുടെ അകമ്പടിയില്‍ ആരംഭിച്ച റോഡ് ഷോ മെല്ലെ നീങ്ങുമ്പോഴും തുറന്ന വാഹനത്തില്‍ താരമായി നില്‍ക്കുന്ന കണ്ണന്താനത്തെ കാണാനായിരുന്നു എല്ലാവര്‍ക്കും തിടുക്കം. കൂരാലിയിലെ സ്വീകരണം കഴിഞ്ഞ് ജില്ലാ പ്രസിഡന്റ് എന്‍. ഹരിയുടെ നാടായ പള്ളിക്കത്തോട്ടെത്തുമ്പോള്‍ മറ്റൊരു സസ്‌പെന്‍സും ഒരുക്കിയിരുന്നു. എസ്.എഫ്.ഐ മുന്‍ ജില്ലാ പ്രസിഡന്റ് കെ.എം. ഹിലാല്‍ ബി.ജെ.പിയില്‍ ചേരാനെത്തിയിരുന്നു. മണിമലയിലെത്തുമ്പോഴേയ്ക്കും ഇരുട്ട് വീണിരുന്നു.