ലഹരി പദാര്‍ത്ഥങ്ങള്‍ ഉപയോഗിക്കുന്നതില്‍ കേരളം ഒട്ടും പിന്നിലല്ല. കുട്ടികളില്‍ പോലും ലഹരിയുടെ രുചി അവര്‍ പോലും അറിയാതെ അവരെ തേടിയെത്തുന്നു. പല രൂപത്തില്‍ പല നിറത്തിലെന്ന് മാത്രം. കുട്ടികള്‍ അറിയുന്നില്ല ഇതില്‍ ലഹരി പദാര്‍ത്ഥങ്ങള്‍ ചേര്‍ത്താണ് കഴിക്കുന്നതെന്ന കാര്യം.

ലഹരി ഉപയോഗവുമായി ബന്ധപ്പെട്ട് കേരളത്തെ കുറിച്ച് എക്‌സൈസ് അധികൃതര്‍ ഞെട്ടിപ്പിക്കുന്ന വെളിപ്പെടുത്തലാണ് അടുത്തിടെ പുറത്ത് വിട്ടത്. ലഹരി ഉപയോഗത്തില്‍ കേരളം ഒന്നാംസ്ഥനത്ത് എത്തികൊണ്ടിരിക്കുന്നുവെന്നതാണ് കണക്കുകള്‍ വ്യക്തമാക്കുന്നത്. പഞ്ചാബിലായിരുന്നു ഏറ്റവും വലിയ ലഹരി ഉപഭോക്താക്കളും വില്‍പ്പനക്കാരും എന്നാണ് ഇതുവരെ കരുതിയിരുന്നതെങ്കിലും പഞ്ചാബിനെ നമ്മള്‍ കടത്തിവെട്ടാന്‍ അധികം സമയമൊന്നും വേണ്ടി വന്നേക്കില്ല എന്നാണ് എക്‌സൈസ് കമ്മീഷണര്‍ അടക്കമുള്ളവര്‍ ചൂണ്ടിക്കാട്ടുന്നത്.

പരിശോധനയില്‍ പോലും കണ്ടെത്താന്‍ കഴിയാത്ത നാക്കിനടയില്‍ ഒട്ടിച്ച് വെക്കുന്ന മയക്ക് മരുന്ന് പോലും ഇന്ന് നമ്മുടെ വിദ്യാര്‍ഥികള്‍ക്കിടയിലും മറ്റും സജീവമായി കൊണ്ടിരിക്കുന്നു. അതിനൊപ്പം പലതരം ഗുളികകളും എത്തുന്നുണ്ട്.ഇത് കുട്ടികളുടെ ജീവനെ തെറ്റ് വഴിതെറ്റിക്കും.

അന്യ സംസ്ഥാനങ്ങളില്‍ നിന്നുമെത്തുന്ന ഗുളികകളും മറ്റു ലഹരി ഉപയോഗത്തിനായി കേരളത്തില്‍ ആവശ്യക്കാരിലേക്ക് യഥേഷ്ടം എത്തുമ്പോള്‍ അതിന് തടയിടാന്‍ കഴിയാതെ നമ്മള്‍ നമ്മുടെ വിദ്യാര്‍ഥികളെയും യുവാക്കളെയും ബലി കൊടുക്കുകയും ചെയ്യുന്നു. ഈയൊരു സാഹചര്യത്തില്‍ എന്താണ് പോംവഴിയെന്ന് വ്യക്തമാക്കുകയാണ് എക്‌സൈസ് കമ്മീഷണര്‍ ഋഷിരാജ് സിങ്.

വിദ്യാര്‍ത്ഥികളില്‍ ലഹരി ഉപയോഗം വര്‍ധിച്ചിട്ടുണ്ട്. 12 വയസ്സിന് താഴെ പ്രായമുള്ള കുട്ടികളില്‍ 70 ശതമാനം പേരും ലഹരി ഒരു തവണയെങ്കിലും ഉപയോഗിച്ചവരാണന്നും അധ്യാപകര്‍ക്ക് വിദ്യാര്‍ത്ഥികളെ ഇതില്‍ നിന്ന് പിന്തിരിപ്പിക്കാന്‍ വലിയ ഒരളവുവരെ സാധിക്കുമെന്നും അദ്ദേഹം പറഞ്ഞു.
രക്ഷിതാക്കളും, അധ്യാപകരും, ഉദ്യോഗസ്ഥരും ഒത്തുപിടിച്ചാല്‍ ലഹരി വിപത്തിനെ തടയാനാകുമെന്നും ലഹരി വ്യാപനത്തിനെതിരെ ശക്തമായ നിലപാട് എക്‌സൈസ് വകുപ്പിന്റെ ഭാഗത്തുനിന്നും ഉണ്ടാവണമെന്നും അദ്ദേഹം പറയുന്നു.

എട്ടു മുതല്‍ 15 വയസുവരെയുള്ള 70 ശതമാനം കുട്ടികളും ഒരു പ്രാവശ്യമെങ്കിലും ഏതെങ്കിലും തരത്തിലുള്ള ലഹരി രുചിച്ചുനോക്കിയിട്ടുണ്ടെന്നാണ് കണക്കുകള്‍ വ്യക്തമാക്കുന്നതെന്ന് ഋഷിരാജ് സിംഗ് പറഞ്ഞു. പ്രധാനമായും രണ്ട് മേഖലകളിലൂടെയാണ് ലഹരിയുടെ ഉപയോഗം വര്‍ധിക്കുന്നത്.

70 ലക്ഷം വരുന്ന കുട്ടികളിലൂടെയും 30 ലക്ഷം വരുന്ന അന്യസംസ്ഥാനതൊഴിലാളികളിലൂടെയുമാണ് ലഹരിയുടെ വ്യാപനം നടക്കുന്നത്. ഒരു വര്‍ഷത്തിനിടയില്‍ മുപ്പതിനായിരത്തോളം കേസുകള്‍ ലഹരിക്കെതിരെ എടുത്തിട്ടുണ്ട്.

25000 പേര്‍ ലഹരി കേസുകളില്‍ ജയില്‍ ശിക്ഷ അനുഭവിക്കുന്നുണ്ട്. കഴിഞ്ഞ ഒരു വര്‍ഷത്തിനുള്ളില്‍ 400 ടണ്‍ പാന്‍മസാല നശിപ്പിച്ചിട്ടുണ്ടെന്നും എക്‌സൈസ് കമ്മീഷണര്‍ പറഞ്ഞു. കുട്ടികളില്‍ മൊബൈല്‍ ഫോണിന്റെ ഉപയോഗം മറ്റൊരു ലഹരിയായി മാറിക്കൊണ്ടിരിക്കുന്നു.