ജനിച്ച് ദിവസങ്ങള്‍ക്കുള്ളില്‍ ആ പെണ്‍കുഞ്ഞിന് വിധി മറ്റൊന്നായിരുന്നു. മരണം ആ പെണ്‍കുഞ്ഞിനെ തേടിയെത്തുമെന്ന് പ്രതീക്ഷിച്ചിരുന്നില്ല. പുതപ്പിക്കാന്‍ തുണിയില്ലാതെ അവള്‍ വിറച്ച് മരിച്ചപ്പോഴും അമ്മയ്ക്ക് നോക്കി നില്‍ക്കാനെ കഴിഞ്ഞോള്ളൂ. ഞെട്ടിപ്പിക്കുന്ന സംഭവം റാന്നിയിലാണ് നടന്നത്.

കൊടും തണുപ്പില്‍ ശബരിമല പൂങ്കാവനത്തില്‍ ആദിവാസി യുവതിയുടെ നവജാത ശിശു മരിച്ചു. ചാലക്കയം ടോള്‍ ഗേറ്റിനു സമീപം താമസിച്ചിരുന്ന മലമ്ബണ്ടാര വിഭാഗത്തില്‍പ്പെട്ട ആദിവാസികുടുംബത്തിലെ യുവതിക്കാണ് പ്രസവിച്ച് ദിവസങ്ങള്‍ക്കകം കുഞ്ഞിനെ നഷ്ടമായത്. ആദിവാസി ക്ഷേമത്തിനു ചുമതലപ്പെട്ട ഉദ്യോഗസ്ഥര്‍ ഈ സംഭവം മൂടിവെക്കാനുള്ള ശ്രമത്തിലായിരുന്നു.

കൊടും കാട്ടില്‍ ഇക്കഴിഞ്ഞ ആറിനാണ് മഞ്ജുവിന് പെണ്‍കുഞ്ഞ് ജനിച്ചതെന്നു പറയപ്പെടുന്നു. മഴ തിമിര്‍ത്തുപെയ്ത ദിവസങ്ങളില്‍ വനത്തിലെ ഷെഡില്‍ പുതപ്പിക്കാന്‍ തുണി പോലും ഇല്ലാതെ കഴിഞ്ഞ കുഞ്ഞ് കടുത്ത തണുപ്പു മൂലം മരിക്കുകയായിരുന്നെന്നാണു വിവരം. തുടര്‍ന്ന് താമസിച്ചിരുന്ന ഷെഡിനുള്ളിലെ തറയില്‍ മൃതദേഹം വച്ച് അതിനു മുകളിലേക്ക് ഷെഡ് മറിച്ചിട്ട് ആചാരപ്രകാരമുള്ള 'സംസ്‌കാരം' നടത്തിയതിനു ശേഷം കുടുംബം അവിടെ നിന്ന് താമസംമാറ്റി.

മരണം സ്ഥിരീകരിക്കാനോ കുഞ്ഞിന്റെ മൃതദേഹം കണ്ടെത്തി തുടര്‍നടപടി സ്വീകരിക്കാനോ ഉദ്യോഗസ്ഥ തലത്തില്‍ നടപടിയുണ്ടായില്ല. കൊടുംവനത്തില്‍നിന്നു പുറത്തെത്തിയവരാണ് കുഞ്ഞിന്റെ മരണ വിവരം പുറത്തറിയിച്ചത്. ളാഹ മുതലുള്ള പൂങ്കാവനത്തില്‍ 47 കുടുംബങ്ങളിലായി 209 ആദിവാസികളാണു കഴിഞ്ഞ വര്‍ഷം വരെ ഉണ്ടായിരുന്നത്.