സര്ക്കാര് ഡോക്ടര്മാരുടേയും സര്ക്കാര് മെഡിക്കല് കോളേജുകളിലെ അദ്ധ്യാപകരുടേയും പെന്ഷന് പ്രായം ഉയര്ത്താന് തീരുമാനം
സര്ക്കാര് ഡോക്ടര്മാരുടേയും സര്ക്കാര് മെഡിക്കല് കോളേജുകളിലെ അദ്ധ്യാപകരുടേയും പെന്ഷന് പ്രായം ഉയര്ത്താനും തീരുമാനമായി. ഡയറക്ടര് ഒഫ് ഹെല്ത്ത് സര്വീസിന് കീഴില് വരുന്ന ഡോക്ടര്മാരുടെ പ്രായം 56ല് നിന്നും അറുപതായി വര്ദ്ധിപ്പിക്കാന് മന്ത്രിസഭായോഗം തീരുമാനിച്ചു. ഡയറക്ടര് ഒഫ് മെഡിക്കല് എഡ്യുക്കേഷനു കീഴില്വരുന്ന മെഡിക്കല് കോളേജ് അദ്ധ്യാപകരുടെ പെന്ഷന് പ്രായം അറുപതില് നിന്നും അറുപത്തിരണ്ടായും വര്ദ്ധിപ്പിക്കും.
ആരോഗ്യ മേഖലയില് പരിചയസമ്പന്നരായ ഡോക്ടര്മാരുടെ ദൗര്ലഭ്യം പലപ്പോഴും പ്രശ്നമായി വരാറുണ്ട്. ഇതുകൂടി കണക്കിലെടുത്താണ് ഇപ്പോഴത്തെ തീരുമാനം. അദ്ധ്യാപികമാരുടെ ക്ഷാമം കൂടി പരിഹരിക്കുന്നതിനാണ് സര്ക്കാര് ഇത്തരം തീരുമാനങ്ങളില് എത്തിച്ചേര്ന്നതെന്നും മന്ത്രിസഭ തീരുമാനങ്ങള് വിശദീകരിച്ചുകൊണ്ട് മുഖ്യമന്ത്രി പിണറായി വിജയന് പറഞ്ഞു.
പട്ടികജാതി പട്ടിക വര്ഗ വിഭാഗങ്ങള്ക്കും മറ്റു പിന്നോക്കം നില്ക്കുന്ന വിഭാഗങ്ങള്ക്കും സര്ക്കാര് ഉദ്യോഗങ്ങളില് ഇപ്പോള് നിലനില്ക്കുന്ന സംവരണം തുടരണമെന്നാണ് സര്ക്കാരിന്റെ പ്രഖ്യാപിത നിലപാട്. എന്നാല്, ഈ സംവരണം തുടരുന്നതിനോടൊപ്പം തന്നെ മുന്നോക്ക വിഭാഗങ്ങളിലെ സാമ്പത്തികമായി പിന്നാക്കം നില്ക്കുന്നവര്ക്ക് ഒരു നിശ്ചിത ശതമാനം സംവരണം ഏര്പ്പെടുത്താനും കഴിയണം. ഭരണഘടനാഭേദഗതി ആവശ്യമുള്ള കാര്യമാണിത്.
എന്നാല് ഭരണഘടനാഭേദഗതി ഇല്ലാതെ നടപ്പാക്കാന് കഴിയുന്ന ചില മേഖലകളില് ഇത് നടപ്പാക്കാന് കഴിയണം എന്നാണ് സര്ക്കാര് ആഗ്രഹിക്കുന്നത്. അങ്ങനെ പരിശോധിക്കുമ്പോള് ദേവസ്വം നിയമനങ്ങളില് ഇത്തരത്തിലുള്ള നിലപാടുകള് സ്വീകരിക്കാനാകും. ദേവസ്വം നിയമനങ്ങളില് മറ്റ് മതവിഭാഗങ്ങള്ക്ക് ന്യൂനപക്ഷ മതവിഭാഗങ്ങള്ക്കുള്ള സംവരണമില്ല.ആ സംവരണം ഒഴിവായിക്കിടക്കും.
അതിനാല് ദേവസ്വം ബോര്ഡില് ഇത്തരത്തില് ഒഴിഞ്ഞുകിടക്കുന്ന ഭാഗം മുന്നോക്ക വിഭാഗത്തിലെ സാമ്പത്തികമായി പിന്നോക്കം നില്ക്കുന്ന വിഭാഗങ്ങള്ക്ക് ഒരു നിശ്ചിത ശതമാനം സംവരണമായി കൊടുക്കാവുന്നതാണ്. മുന്നോക്ക വിഭാഗത്തിലെ സാമ്പത്തികമായി പിന്നോക്കം നില്ക്കുന്നവര്ക്ക് പത്ത് ശതമാനം സംവരണം നല്കാമെന്നാണ് മന്ത്രിസഭ തീരുമാനിച്ചരിക്കുന്നത്. അതോടൊപ്പം തന്നെ ദേവസ്വം ബോര്ഡ് നിയമനങ്ങളില് പട്ടികജാതി പട്ടികവര്ഗക്കാരുടേയും ഈഴവരുടേയും മറ്റ് പിന്നോക്കവിഭാഗത്തിന്റേയും സംവരണത്തിന്റെ തോത് ഉയര്ത്താനും തീരുമാനിച്ചു.
ഈഴവര്ക്ക് നിലവിലുള്ള 14 ശതമാനമാണ് സംവരണം 17 ശതമാനമായി വര്ദ്ധിപ്പിക്കും. പട്ടികജാതി പട്ടികവര്ഗക്കാര്ക്കുള്ള പത്ത് ശതമാനം സംവരണം 12 ശതമാനമായും ഈഴവര് ഒഴികെയുള്ള പിന്നോക്ക വിഭാഗക്കാര്ക്ക് മൂന്ന് ശതമാനത്തില് നിന്നും ആറു ശതമാനമായി സംവരണം വര്ദ്ധിപ്പിക്കാനും തീരുമാനിച്ചു. രാജ്യത്ത് തന്നെ ആദ്യമായാണ് ഒരു സര്ക്കാര് ഇത്തരത്തില് നിലപാട് സ്വീകരിക്കുന്നത്. ഇതിനാവശ്യമായ ചട്ട ഭേദഗതികള് ഉടനെ തന്നെ കൊണ്ടുവരും. അതേസമയം തന്നെ പൊതുവെയുള്ള സര്ക്കാര് നിയമനങ്ങളില് സാമ്പത്തികമായി പിന്നോക്കം നില്ക്കുന്നവര്ക്ക് സംവരണം കൊണ്ടുവരാന് ഭരണഘടന ഭേദഗതികൊണ്ടുവരാനുള്ള സമ്മര്ദ്ദം സര്ക്കാരും എല്.ഡി.എഫും തുടര്ന്നും കേന്ദ്രത്തിന് മേല് ചെലുത്തുമെന്നും പിണറായി പറഞ്ഞു.
https://www.facebook.com/Malayalivartha
