ഒന്നരയേക്കര് ഭൂമിയുള്ള ബാബുവിന്റെ മൃതദേഹം സംസ്കരിക്കാന് കഴിയാതെ നാട്ടുകാര് ആലപ്പുഴ മെഡിക്കല് കോളജ് ഉപരോധിച്ചു, ഭീഷണിയുമായി പൊലീസ്
മഴ പെയ്താല് കുട്ടനാട്ടുകാരുടെ ജീവിതം ദുരിതത്തിലാകും. കുടിക്കാന് നല്ല വെള്ളം പോലും കിട്ടാത്ത സ്ഥിതിയാകും. സ്വന്തമായി ഭൂമിയുണ്ടെങ്കിലും ആരെങ്കിലും മരിച്ചാല് സംസ്കരിക്കാനാവാത്ത അവസ്ഥയും ഇവിടെ പുതുമയല്ല. കുട്ടനാട്ടിലെ ആര് ബ്ളോക്ക് നിവാസികള് വര്ഷങ്ങളായി അനുഭവിക്കുന്ന ഈ അവസ്ഥയ്ക്ക് ജില്ലാ ഭരണകൂടം ഇതുവരെ പരിഹാരം കണ്ടെത്തിയില്ല. ഇതേ തുടര്ന്ന് ബുധനാഴ്ച ആലപ്പുഴ മെഡിക്കല് കോളജില് മരിച്ച ആര് ബ്ളോക്ക് സ്വദേശിയുടെ മൃതദേഹവുമായി നാട്ടുകാരും പഞ്ചായത്ത് പ്രസിഡന്റും ഉള്പ്പെടെ പ്രതിഷേധം നടത്തി. സ്വന്തമായി ഒരേക്കര് ഭൂമിയും വീടുമുള്ളയാളാണ് മരിച്ച പാലപത്ര വീട്ടില് ബാബു. പനി ബാധിച്ചാണ് ബാബുവിനെ മെഡിക്കല് കോളജില് പ്രവേശിപ്പിച്ചത്. ഇവിടെ എത്തിച്ച ശേഷം ഹൃദയാഘാദം വന്നാണ് മരിച്ചതെന്ന് ആശുപത്രി അധികൃതര് പറഞ്ഞു.
ആര്. ബ്ളോക്കില് മൃതദേഹം സംസ്കരിക്കാനുള്ള സൗകര്യമില്ലെന്ന് ജില്ലാ ഭരണകൂടത്തെ അറിയിച്ചിരുന്നു. എന്നാല് ഒരു മണിക്കൂര് കഴിഞ്ഞിട്ടും ഉദ്യോഗസ്ഥരടക്കമുള്ളവര് സ്ഥലത്തെത്തുകയോ, ഫോണ് വിളിച്ച് കാര്യങ്ങള് അന്വേഷിക്കുകയോ ചെയ്തില്ല. ഇതോടെ നാട്ടുകാര് ക്ഷുഭിതരായി. ജില്ലാ ഭരണകൂടം ഇടപെട്ടാല് മാത്രമേ മൃതദേഹം ഏറ്റൂവാങ്ങൂ എന്ന് നാട്ടുകാരും ജനപ്രതിനിധികളും ആവര്ത്തിച്ച് വ്യക്തമാക്കി. മരണം നടന്ന് ഒന്നര മണിക്കൂറിന് ശേഷവും മൃതദേഹം അത്യാഹിതവിഭാഗത്തില് തന്നെ കിടത്തി. ഇതോടെ മൃതദേഹം നീക്കണമെന്ന് പൊലീസും ആശുപത്രി അധികൃതരും ആവശ്യപ്പെട്ടു. നാട്ടുകാര് വഴങ്ങിയില്ല. ജില്ലാ ഭരണകൂടം ഇടപെടാതെ മൃതദേഹം മാറ്റില്ലെന്നും പൊലീസിനെ ഉപയോഗിച്ച് ബലം പ്രയോഗിച്ച് തങ്ങളെ ഒഴിപ്പിക്കാന് ശ്രമിച്ചാല് മരണം വരെ സമരം തുടരുമെന്ന് നാട്ടുകാര് അറിയിച്ചു. അപ്പോഴേക്കും നാട്ടിലെ പഞ്ചായത്ത് പ്രസിഡന്റും സ്ഥലത്തെത്തി. മൃതദേഹവുമായി ക്യാഷ്വാലിറ്റിക്ക് മുന്നില് സമരം നടത്താന് തീരുമാനിച്ചു.
അധികാരികളുടെ ഭാഗത്ത് നിന്ന് മര്യാദയില്ലാത്ത സമീപനമാണ് ഉണ്ടായതെന്ന് ആര്. ബ്ളോക്ക് ഡിവിഷനിലെ ബ്ളോക്ക് പഞ്ചായത്ത് അംഗം ചൂണ്ടാക്കാട്ടി. ഒരു മനുഷ്യന് മരിച്ചുകഴിഞ്ഞാല് സംസ്കരിക്കുക എന്നത് സാമൂഹ്യനീതിയാണ്. അത് പോലും നിഷേധിച്ചിരിക്കുകയാണ്. ഇതിനെതിരെ മനുഷ്യാവകാശ കമ്മിഷന് പരാതി നല്കുമെന്നും അദ്ദേഹം വ്യക്തമാക്കി. വര്ഷങ്ങളായി ആര് ബ്ളോക്ക് നിവാസികള് ഈ ദുരിതം അനുഭവിക്കുന്നു. ശാശ്വതപരിഹാരം വേണമെന്ന് നാട്ടുകാര് ആവശ്യപ്പെട്ടു. സംഭവം വിവാദമായതോടെ ജില്ലാ ഭരണകൂടം ഉണര്ന്ന് പ്രവര്ത്തിച്ചു. മൃതദേഹം താല്ക്കാലിക സംവിധാനം ഉപയോഗിച്ച്, വെള്ളത്തിന് മുകളില് വെച്ച് സംസ്കരിക്കുന്നതിനുള്ള സൗകര്യവും അതിന് വേണ്ട സാമ്പത്തിക സഹായവും നല്കി. ഇതോടെ നാട്ടുകാര് സമരപരിപാടികള് അവസാനിപ്പിച്ചെങ്കിലും പ്രശ്നത്തിന് ശാശ്വതപരിഹാരം കാണുന്നത് വരെ സമരം തുടരുമെന്ന് അവര് വ്യക്തമാക്കി.
https://www.facebook.com/Malayalivartha
