സ്ത്രീകളുടെ സ്വര്ണവും പണവും കവരുന്ന ആല്ബം നടന് അറസ്റ്റില്
ആല്ബം നടനെന്ന് സ്വയം പരിചയപ്പെടുത്തി സ്ത്രീകളുടെ സ്വര്ണവും, പണവും, മൊബൈല് ഫോണും കവരുന്ന വിരുതനെ കൊല്ലം സിറ്റി പൊലീസ് കമ്മീഷണര് അജീത ബേഗം ഐ.പി.എസിന് ലഭിച്ച രഹസ്യ വിവരത്തെത്തുടര്ന്ന് ഷാഡോ പൊലീസ് സംഘം അറസ്റ്റു ചെയ്തു.
കൊല്ലം തട്ടാമല സബീന മന്സിലില് ബഷീറിന്റെ മകന് തിത്തൈ സജീവ് എന്ന സജീവ് (39) ആണ് പൊലീസ് പിടിയിലായത്. കിളികൊല്ലൂര്, കൊട്ടിയം, ചാത്തന്നൂര്, കടയ്ക്കല് അഞ്ചല് എന്നീ പൊലീസ് സ്റ്റേഷനുകളിലായി നിരവധി മോഷണ കേസുകള്ക്കാണ് തുമ്പുണ്ടായത്. ആല്ബം നടന് എന്ന് സ്വയം പരിചയപ്പെടുത്തി സ്ത്രീകളുമായി അടുപ്പം സ്ഥാപിക്കുന്ന ഇയാള് യാതൊരു സംശയവും തോന്നാത്ത വിധം ആഭരണങ്ങള് വാങ്ങിനോക്കി, കുടിക്കാന് എന്തെങ്കിലും ആവശ്യപ്പെടും.
സ്ത്രീകള് അത് എടുക്കാന് പോകുന്ന തക്കം നോക്കി ആഭരണങ്ങളുമായി മുങ്ങുന്നതാണ് ഇയാളുടെ രീതി. ഈ സമയം വീട്ടിലുളള പണവും, മൊബൈല് ഫോണും കൈക്കലാക്കാനും ഇയാള് മറക്കില്ല. മൊബൈല് ഫോണിനെ പിന്തുടര്ന്ന് ഇയാളിലേക്കെത്തിയ പൊലീസ് സംഘത്തെ പല തവണ ഇയാള് വെട്ടിച്ച് കടന്നെങ്കിലും കഴിഞ്ഞ ദിവസം തന്ത്രപരമായി പൊലീസ് ഇയാളെ വലയിലാക്കുകയായിരുന്നു.
അഭിനയത്തിന്റെ ഇടവേളകളില് ഓട്ടോറിക്ഷാ ഡ്രൈവറായും, വസ്തു ബ്രോക്കറായും വേഷമിടുന്ന ഇയാള് സ്ത്രീകളെ വലയിലാക്കാനും, ഈ വഴി ഉപയോഗിച്ചു. മൂന്നോളം ആല്ബങ്ങളില് നായകനായി അഭിനയിച്ചുട്ടുളള ഇയാളുടെ 'ഇഷ്കിന് കനിയെ' എന്ന ആല്ബം യൂടൂബില് വൈറലാണ്. സാമുഹിക പ്രതിബദ്ധത വിളിച്ചോതുന്ന ഈ സംഗീത ആല്ബത്തില് നായകനായാണ് ഇയാള് പ്രത്യക്ഷപ്പെടുന്നത്.
കിളികൊല്ലൂര് പൊലീസ് സ്റ്റേഷനില് അറസ്റ്റ് ചെയ്ത് കോടതിയില് ഹാജരാക്കുന്ന ഇയാളെ കൂടുതല് കേസുകളില് ഉള്പ്പെട്ടിട്ടുണ്ടൊയെന്നറിയാന് കസ്റ്റഡിയില് വാങ്ങുമെന്നും പൊലീസ് അറിയിച്ചു.
കൊല്ലം അസിസ്റ്റന്റ് കമ്മീഷണര് ജോര്ജ് കോശി, കൊല്ലം സ്പെഷ്യല് ബ്രാഞ്ച് അസിസ്റ്റന്റ് കമ്മീഷണര് ഷിഹാബുദീന്, ഇരവിപുരം ഇന്സ്പെക്ടര് പങ്കജാക്ഷന്, ഷാഡോ പൊലീസ് എസ്.ഐ യൂ.പി.വിപിന് കുമാര്, കിളികൊല്ലൂര് എസ്.ഐ വിനോദ് ചന്ദ്രന്, ജുനിയര് എസ്.ഐ ദീപു, എസ്.ഐ.അനില് കുമാര്, ഷാഡോ പൊലീസു കാരായ ഹരിലാല്, വിനു, സജു, സീനു, മനു, റിബു, നിയാസ് (സൈബര് സെല്) എന്നിവരുടെ നേത്യത്വത്തിലുളള സംഘമാണ് പ്രതിയെ അറസ്റ്റ് ചെയ്തത്.
https://www.facebook.com/Malayalivartha
