ജയിലിനുള്ളില് ഫോണ് ഉപയോഗിച്ചിട്ടില്ലെന്ന് കൊടി സുനി, സ്വര്ണക്കവര്ച്ച ആസൂത്രണവുമായി ബന്ധമില്ല, കാക്ക രഞ്ജിത്തിനെ അറിയാമെന്നും ജയിലില് വച്ചു കണ്ടിട്ടുണ്ടെന്നും സുനി
സ്വര്ണക്കവര്ച്ച ആസൂത്രണവുമായി തനിക്ക് ബന്ധമില്ലെന്ന് കൊടി സുനി.ജയിലിനുള്ളില് ഫോണ് ഉപയോഗിച്ചിട്ടില്ലെന്നും കാക്ക രഞ്ജിത്തിനെ ഒരുവട്ടം പോലും വിളിച്ചിട്ടില്ലെന്നും കൊടി സുനി പറഞ്ഞു.ടി.പി. ചന്ദ്രശേഖരന് വധക്കേസില് ജീവപര്യന്തം തടവുശിക്ഷയനുഭവിക്കുന്ന കൊടി സുനിയെ അന്വേഷണ സംഘം വിയ്യൂര് സെന്ട്രല് ജയിലിലെത്തിയാണു ചോദ്യം ചെയ്തത്.
ജയില് ജീവനക്കാരെ മാറ്റിനിര്ത്തി പൊലീസ് നടത്തിയ ചോദ്യം ചെയ്യലിനെ നേരിടാന് ഒരുങ്ങി നില്ക്കുകയായിരുന്നു സുനി. കാക്ക രഞ്ജിത്തിനെ ജയിലില് വച്ചു കണ്ടു പരിചയമുണ്ടെന്നു സമ്മതിച്ചെങ്കിലും മറ്റാരോപണങ്ങളെല്ലാം സുനി നിഷേധിച്ചിട്ടുണ്ട്.രഞ്ജിത്തിനെ ഫോണില് വിളിക്കുകയോ സ്വര്ണക്കവര്ച്ചയ്ക്കു നിര്ദേശങ്ങള് നല്കുകയോ ചെയ്തിട്ടില്ലെന്നും സുനി പറഞ്ഞു.
രഞ്ജിത്തിന്റെ ഫോണിലേക്കു സുനി വിളിച്ചതിന്റെ തെളിവുകള് പൊലീസ് നിരത്തിയെങ്കിലും അതു തന്റെ നമ്പറല്ലെന്നും ഒന്നും അറിയില്ലെന്നുമായിരുന്നു മറുപടി. സുനിയുടെ സെല്ലും പരിസരവും പരിശോധിക്കാന് കോടതി അനുവദിച്ചിട്ടില്ലാത്തതിനാല് ഫോണും സിം കാര്ഡുമൊന്നും കണ്ടെടുക്കാനായിട്ടില്ല.
ചെറുവണ്ണൂര് സിഐ പി.രാജേഷിന്റെ നേതൃത്വത്തില് നല്ലളം എസ്ഐ എസ്.ബി.കൈലാസ് നാഥും സംഘവുമാണു സുനിയെ ചോദ്യം ചയ്തത്. ചോദ്യം ചെയ്യല് രണ്ടു മണിക്കൂറിലേറെ നീണ്ടുനിന്നു.
സുനിയില് നിന്നറിയാനുള്ള കാര്യങ്ങള് സംബന്ധിച്ച് അന്വേഷണ സംഘം ചോദ്യാവലി തയാറാക്കിയിരുന്നു. 2016 ജൂലൈ 16നു തലശേരി സ്വദേശി ഇസ്മായിലിനെ നല്ലളത്തു കാര് തടഞ്ഞു നിര്ത്തി മൂന്നരക്കിലോ സ്വര്ണമടങ്ങിയ ബാഗ് കവര്ന്നെന്നാണു കേസ്.
കൊടി സുനി കവര്ച്ച ആസൂത്രണം ചെയ്ത സംഭവത്തില് ആര്എംപി നേതാവ് കെ.കെ. രമ ഹൈക്കോടതിയെ സമീപിക്കുമെന്ന് വാര്ത്തകളുണ്ടായിരുന്നു. ജയിലിലെ നിയമവിരുദ്ധ പ്രവര്ത്തനങ്ങള് കോടതിയുടെ ശ്രദ്ധയില്പ്പെടുത്താന് കൂടിയാണ് ഹൈക്കോടതിയില് ഹര്ജി ഫയല് ചെയ്യുന്നതെന്നും രമ പറഞ്ഞു.
ജയിലില് കഴിയുന്ന ക്രമിനല് കേസ് പ്രതികള് പുറത്തുള്ള കവര്ച്ച ആസൂത്രണം ചെയ്യുന്നത് നിസാര സംഭവമല്ല. സംസ്ഥാന സര്ക്കാര് ഇടപെടുമെന്ന് കരുതുന്നില്ല.ക്രിമിനല് കേസ് പ്രതികള്ക്ക് എല്ലാ സഹായവും ചെയ്തു കൊടുക്കുന്ന സര്ക്കാരാണു കേരളം ഭരിക്കുന്നതെന്നും അവര് പറഞ്ഞു.
ജയിലിനുള്ളില് പ്രതികള്ക്ക് സഹായം നല്കുന്നത് ജയില് ഉദ്യോഗസ്ഥര് തന്നെയാണെന്നും രമ കുറ്റപ്പെടുത്തുന്നു.നേരത്തെ ജയിലിനുള്ളിലെ നിയമവിരുദ്ധ പ്രവര്ത്തനങ്ങള് ചൂണ്ടിക്കാട്ടി ഡിജിപിക്ക് ആര്എംപി പരാതി നല്കിയിരുന്നു.
https://www.facebook.com/Malayalivartha
