രാഹുല്‍ കൃഷ്ണയുടെ ഇടപാടില്‍ മൂന്ന് മില്യന്‍ ദിര്‍ഹത്തിന്റെ വായ്പാ തിരിച്ചടവുമായി ബന്ധപ്പെട്ട പരാതി ഡല്‍ഹിയിലെ ഉന്നതതലങ്ങളിലേക്ക്. ഡല്‍ഹിയിലെ യു.എ.ഇ. കോണ്‍സുലേറ്റ് ഇതു സംബന്ധിച്ചുള്ള വിശദവിവരങ്ങള്‍ തേടി. മുന്‍പ് രാഹുല്‍ കൃഷ്ണ നടത്തിയിരുന്ന പണമിടപാടു സ്ഥാപനം പിന്നീട് കൈമാറ്റം ചെയ്യുകയുണ്ടായി. പുതുതായി ഉടമസ്ഥതയിലുള്ള സ്‌പോണ്‍സര്‍ കുടിശ്ശിക ചെക്കുകളില്‍ കര്‍ശന നടപടികളുമായി മുന്നോട്ട് പോവുകയാണ്. ബിനോയി കോടിയേരി വായ്പയായി വാങ്ങിയ മൂന്ന് മില്യന്‍ ദിര്‍ഹത്തില്‍ രണ്ടു മില്യന്‍ തിരികെ രാഹുല്‍ കൃഷ്ണനു നല്കിയതായി തെളിയിക്കുന്ന രേഖകള്‍ ഇല്ലാത്തതാണ് ഇപ്പോള്‍ ബിനോയിക്കു വിനയായത്. 

തനിക്കു ബിനോയി പണം തിരിച്ചു നല്കിയ കാര്യം രാഹുല്‍ നിഷേധിക്കുന്നു. കമ്പനിയുമായി ബന്ധപ്പെട്ട തര്‍ക്കത്തില്‍ തന്റെ പേര് വലിച്ചിഴയ്ക്കുകയാണെന്ന് രാഹുല്‍ പറഞ്ഞു. ചവറ എം.എന്‍. വിജയന്‍പിള്ളയുടെ മകന്‍ ശ്രീജിത്തിനും ഇതേ കമ്പനി മൂന്നര മില്യന്‍ വായ്പയായി നല്കിയിരുന്നു. ഇതിലും തിരിച്ചടവുണ്ടായില്ല. താന്‍ പണം വാങ്ങിയില്ലെന്ന് വിജയന്‍പിള്ളയുടെ മകന്‍ അഡ്വ. ശ്രീജിത് വ്യക്തമാക്കി. തന്റെ അക്കൗണ്ടുകള്‍ പരിശോധിക്കാം. രാഹുല്‍ കൃഷ്ണ പല തട്ടിപ്പുകളും നടത്തിയിട്ടുണ്ട്. എന്നിട്ട് മാവേലിക്കര കോടതിയില്‍ സിവില്‍ കേസും നല്‍കിയിട്ടുണ്ട്. ബിനോയിയും രാഹുലും ശ്രിജിത്തും ബിസിനസ് നടത്തിയിരുന്നു. ചില തര്‍ക്കങ്ങളെ തുടര്‍ന്ന് പങ്ക് കച്ചവടം അവസാനിപ്പിച്ചെന്നാണ് അറിയുന്നത്. അതിന്റെ ഭാഗമായാണ് ശ്രീജിത്ത് ബ്ലാങ്ക് ചെക്കുകള്‍ നല്‍കിയത്. 

കോടിയേരി ബാലകൃഷ്ണന്റെ മകന്‍ ബിനോയി 13 കോടി നല്കാനുണ്ടെന്നാണ് കമ്പനിയുടെ നിലപാട്. എന്നാല്‍ താന്‍ രണ്ട് കോടിയില്‍ താഴെ മാത്രമാണ് കൊടുക്കാനുള്ളതെന്ന് ബിനോയ് പറയുന്നു. ചെക്കു മടങ്ങിയ വിവരം കാണിച്ച് കമ്പനി ദുബായ് കോടതിയെ സമീപിച്ചെന്നാണ് പരാതിക്കാരന്‍ പറയുന്നത്. അങ്ങനെയൊരു കാര്യം ഇതുവരെ തന്റെ ശ്രദ്ധയില്‍ പെട്ടില്ലെന്ന് ബിനോയി പറഞ്ഞു. ബിസിനസ്സ് പങ്കാളിയുടെ ചതിവില്‍പെട്ടാണ് തനിക്ക് ഈ അബദ്ധം പറ്റിയതെന്ന് ബിനോയി വ്യക്തമാക്കി. ദുബായി കോടതിയില്‍ 60,000 ദിര്‍ഹം പിഴയടച്ച് കേസില്‍ തീര്‍പ്പാക്കിയതാണ്. വീണ്ടും തന്നെ ബ്ലാക്‌മെയില്‍ ചെയ്തു പണം തട്ടാനുള്ള ശ്രമമാണ് ഇപ്പോള്‍ നടക്കുന്നതെന്നും ബിനോയ് ആരോപിച്ചു.