മരുന്നുകളുടെ വില നിശ്ചയിക്കുന്നതില്‍ ജി.എസ്.ടി കൗണ്‍സിലിന് പറ്റിയ വീഴ്ചയില്‍ മരുന്ന് കമ്പനികള്‍ കൊള്ള കൊയ്ത്ത് നടത്തുന്നു. ജി.എസ്.ടി വന്നപ്പോള്‍ 73 ശതമാനം മരുന്നുകളുടെയും വില കുതിച്ചു.
സംസ്ഥാനത്ത് ഏറ്റവും കൂടുതല്‍ വില്‍ക്കുന്ന മരുന്നുകള്‍ ജി.എസ്.ടി ലിസ്റ്റില്‍ പെടാത്തതാണ് വില വര്‍ദ്ധിപ്പിച്ചത്. ജി.എസ്.ടിക്ക് മുമ്പത്തേക്കാള്‍ 10 ശതമാനം വരെയാണ് വര്‍ദ്ധന. അതേസമയം 27 ശതമാനം മരുന്നുകള്‍ക്ക് അഞ്ച് ശതമാനം വിലകുറഞ്ഞു. അധികമാരും വാങ്ങാത്തതും സുലഭമല്ലാത്തതുമായ മരുന്നുകള്‍ക്കാണ് വില ഇടിഞ്ഞത്.

വില നിശ്ചയിക്കാന്‍ ജി.എസ്.ടി കൗണ്‍സില്‍ തിരഞ്ഞെടുത്ത വില വിവരപ്പട്ടികയാണ് വിനയായത്. മാര്‍ക്കറ്റില്‍ വില്‍ക്കുന്ന മരുന്നുകളുടെ വില നിശ്ചയിക്കുന്നത് നാഷണല്‍ ഫാര്‍മസി െ്രെപസിംഗ് അതോറിട്ടിയാണ്. എന്നാല്‍ വര്‍ഷങ്ങള്‍ക്ക് മുമ്പ് സെന്‍ട്രല്‍ എക്‌സൈസ് ആന്‍ഡ് കസ്റ്റംസ് തയ്യാറാക്കിയ പട്ടിക വച്ചാണ് ജി.എസ്.ടി കൗണ്‍സില്‍ വിലയിട്ടത്. ഈ പട്ടികയിലെ മരുന്നുകള്‍ക്കാണ് അഞ്ച് ശതമാനം ജി.എസ്.ടി ഏര്‍പ്പെടുത്തിയത്. അതിലെ 27 ശതമാനം മരുന്നുകള്‍ക്കാണ് വില കുറഞ്ഞത്. ഈ പട്ടികയില്‍ പെടാത്ത മരുന്നുകള്‍ക്ക് വലിയ വില ഈടാക്കുന്നു. നാഷണല്‍ ഫാര്‍മസി െ്രെപസിംഗ് അതോറിട്ടി മരുന്നുകളുടെ വില കൂടെക്കൂടെ പുതുക്കും.

വേദന സംഹാരിയായ ഉപയോഗിച്ചിരുന്ന മരുന്നാണ് ഐബ്രൂപ്രൂഫിന്‍. ഇത് 5 ശതമാനം നികുതിയില്‍ ജി.എസ്.ടി പട്ടികയില്‍ വന്നപ്പോള്‍ മരുന്ന് കമ്പനികള്‍ ഡൈക്‌ളോ ഫിനാസോവ, അസിക്ലോ ഫിനാസോവ എന്നീ മരുന്നുകളിറക്കി. ഇത് രണ്ടും ജി.എസ്.ടിക്ക് പുറത്താണെന്ന് മാത്രമല്ല, മാര്‍ക്കറ്റില്‍ സുലഭവുമാണ്. പഴയ മരുന്ന് കിട്ടാനുമില്ല. ഫലത്തില്‍ ജി.എസ്.ടി പട്ടികയില്‍ വന്ന മരുന്നിനെ തകിടം മറിച്ചതോടെ പുതിയ മരുന്നുകള്‍ക്ക് ഡിമാന്‍ഡായി, വിലയുംകൂടി

കേരള മാര്‍ക്കറ്റാണ് ഇന്ത്യയിലെ മരുന്ന് വില്പനയില്‍ ഏറ്റവും മുന്നില്‍. വാര്‍ഷിക വിറ്റ് വരവ് 10 ശതമാനവും ഉപയോഗം 12 ശതമാനവുമാണെന്നാണ് കണക്ക്. സൈനികര്‍ക്ക് അടക്കമുള്ളവര്‍ക്ക് സൗജന്യമായി കിട്ടുന്ന മരുന്നുകളുണ്ട്. അതൊന്നും വിറ്റ് വരവില്‍പ്പെടില്ല. അതാണ് വിറ്റ് വരവും ഉപയോഗവും തമ്മില്‍ അന്തരമുണ്ടായത്.

ഇന്ത്യയുടെ വിസ്തീര്‍ണ്ണത്തിന്റെ ഒരു ശതമാനം മാത്രമുള്ള കേരളത്തില്‍ മാത്രം വില്‍ക്കുന്നത് മൊത്തം മരുന്നിന്റെ 10 ശതമാനമാണ്. മറ്റൊരു സംസ്ഥാനത്തും ഇത്രയും മരുന്ന് വിറ്റഴിക്കുന്നില്ല. കേരളത്തില്‍ വിലകൂടാന്‍ കാരണവും ഇത് തന്നെ.കാന്‍സര്‍, ഹൃദ്രോഗം തുടങ്ങിയവയുടേതുള്‍പ്പെടെ ജീവന്‍ രക്ഷാ മരുന്നുകള്‍ക്കെല്ലാം 10 ശതമാനം വരെയാണ് വര്‍ദ്ധനവ്‌