കേരളത്തിലെ മന്ത്രിമാരുടെയും എം.എല്‍.എമാരുടെയും ശമ്പളവർധനയ്ക്ക് മന്ത്രിസഭയോഗം അംഗീകാരം നല്‍കി. മാര്‍ച്ച്‌​ 20ന് മന്ത്രിമാരുടെയും നിയമസഭാംഗങ്ങളുടെ ശമ്പളവും ബത്തയും വര്‍ധിപ്പിക്കുന്നതിനുള്ള ബില്‍ നിയമസഭ പരിഗണിക്കും. സബ്​ജക്​ട്​ കമ്മിറ്റി പരിശോധനക്കുശേഷം മാര്‍ച്ച്‌​ 27ന്​ വീണ്ടും സഭ പരിഗണിച്ച്‌​ പാസാക്കും. ഏപ്രില്‍ മുതലാണ് ശമ്പളവര്‍ധന പ്രാബല്യത്തില്‍ വരുന്നത്. മന്ത്രിമാരുടെ ശമ്പളം 55,012 രൂപയില്‍നിന്ന് 90,000 രൂപയായും എം.എല്‍.എമാരുടേത് 39,500 രൂപയില്‍നിന്ന് 70,000 രൂപയായും ഉയര്‍ത്താനാണ്​ നിര്‍ദേശം. ഇതി​ന്റെ കരട്​ ബില്ലിനു​​ മന്ത്രിസഭ അംഗീകാരം നല്‍കുകയും ചെയ്തു.

മന്ത്രിമാരുടെ യാത്രാബത്ത കിലോമീറ്ററിന് 10 രൂപയില്‍നിന്ന് 15 രൂപയാക്കി ഉയര്‍ത്തുകയും ചെയ്തിട്ടുണ്ട്. എം.എല്‍.എമാരുടെ യാത്രാബത്ത കിലോമീറ്റര്‍ നിരക്ക് 12 രൂപയാക്കി ഉയര്‍ത്തും. ശമ്പളവര്‍ധനയെക്കുറിച്ച്‌​ പഠിക്കാന്‍ ഒരുവര്‍ഷം മുമ്പാണ്​ സര്‍ക്കാര്‍ സമിതിയെ നിയോഗിച്ചത്. സമിതി നിര്‍ദേശം ഏതാനും ആഴ്ചകളായി മന്ത്രിസഭയുടെ പരിഗണനയിലായിരുന്നു. മന്ത്രിമാരുടെയും ജനപ്രതിനിധികളുടെയും ശമ്പളവും ബത്തയും കൂട്ടുന്നത്​ സംബന്ധിച്ച്‌​ ജസ്​റ്റിസ്​​ ​ജെയിംസ്​ കമ്മിറ്റി ശുപാര്‍ശ ചെയ്തതിലും കുറഞ്ഞ തുകയാണ് മന്ത്രിസഭ അംഗീകരിച്ചത്. മന്ത്രിമാരുടെ ശമ്പളം 1.43 ലക്ഷം രൂപയാക്കി ഉയര്‍ത്തണമെന്നായിരുന്നു ജെയിംസിന്റെ ശുപാർശ. ഇതില്‍ 53,000 രൂപയുടെ കുറവ്​ വരുത്തിയാണ്​ 90,000 രൂപ ശമ്പളം നല്‍കാന്‍ തീരുമാനിച്ചത്.