മുന്‍ റേഡിയോ ജോക്കി മടവൂര്‍ രാജേഷിനെ വെട്ടിക്കൊലപ്പെടുത്തിയ സംഭവത്തില്‍ എന്‍ജിനീയറിങ് വിദ്യാര്‍ഥി അറസ്​റ്റില്‍. ഓച്ചിറ മേമന വലിയകുളങ്ങര എം.എ കോര്‍ട്ടില്‍ യാസീന്‍ ആണ് (23) അറസ്​റ്റിലായത്. ഇതോടെ കേസില്‍ അറസ്​റ്റിലായവരുടെ എണ്ണം രണ്ടായി.

കേസിലെ മുഖ്യപ്രതികളായ അലിഭായി എന്ന മുഹമ്മദ് താലിഫ്, അപ്പുണ്ണി എന്നിവര്‍ ഉപയോഗിച്ചിരുന്ന കാര്‍ ബംഗളൂരുവില്‍നിന്ന്​ അടൂരിലെത്തിച്ചത് യാസീനായിരുന്നു. കൊലക്കു ശേഷം മടവൂരില്‍ പ്രതികള്‍ രക്ഷപ്പെട്ട കാറായിരുന്നു ഇത്. മടവൂരിലെ സി.സി ടി.വിയില്‍നിന്ന്​ കാറി​െന്‍റ ദൃശ്യങ്ങള്‍ പൊലീസിന് ലഭിച്ചതോടെയാണ് കാര്‍ ഉപേക്ഷിച്ച്‌ യാസീന്‍ ചെന്നൈയിലേക്ക് കടന്നത്.

സുഹൃത്തി​െന്‍റ എ.ടി.എം കാര്‍ഡ് തരപ്പെടുത്തി പ്രതികള്‍ക്ക് പണമിടപാട് നടത്താന്‍ സഹായിച്ചതും മറ്റൊരു പ്രതിയെ ചെന്നൈയില്‍ കൊണ്ടുപോയി താമസിപ്പിച്ചതും യാസീനായിരുന്നു. തുടര്‍ന്ന് ബംഗളൂരുവിലും ചെന്നൈയിലുമായി ഒളിവില്‍ കഴിഞ്ഞിരുന്ന യാസീനെ സൈബര്‍ സെല്ലി​െന്‍റ സഹായത്തോടെയാണ് ശനിയാഴ്ച പൊലീസ് സാഹസികമായി ചെന്നൈയില്‍നിന്ന്​ പിടികൂടിയത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

എന്നാല്‍, യാസീനൊപ്പം പിടികൂടിയ മറ്റൊരു എന്‍ജിനീയറിങ്​ വിദ്യാര്‍ഥിക്ക് കേസുമായി ബന്ധമില്ലെന്ന നിഗമനത്തിലാണ് പൊലീസ്​. കൊലപാതകം ആസൂത്രണം ചെയ്​​െതന്ന് സംശയിക്കുന്ന അലിഭായി കൊല്ലത്തു വരുന്നതിനു മുമ്ബ് ബംഗളൂരുവില്‍ എന്‍ജിനീയറിങ്​ കോളജിലെത്തി യാസീനെ കണ്ടിരുന്നു. കൊലപാതകത്തില്‍ യാസീന്‍ നേരിട്ട് പങ്കെടുത്തിട്ടില്ലെങ്കിലും ഗൂഢാലോചനയിലും കൊലയാളികളെ സഹായിക്കുന്നതിലും യാസീന് പങ്കുള്ളതായാണ് പൊലീസി‍​െന്‍റ കണ്ടെത്തല്‍.

കൊലയാളികള്‍ക്ക് താമസവും ആയുധങ്ങളും തരപ്പെടുത്തി നല്‍കിയെന്ന കുറ്റത്തിന് നേരത്തേ കൊല്ലം സ്വദേശി സനുവിനെ (33) അന്വേഷണ സംഘം അറസ്​റ്റ്​ ചെയ്തിരുന്നു. അതേസമയം, കേസില്‍ മുഖ്യപ്രതികളിലൊരാളായ 'സ്ഫടികം' എന്ന സ്വാതിയെ പൊലീസ് കസ്​റ്റഡിയിലെടുത്തതായി സൂചനയുണ്ട്. രഹസ്യകേന്ദ്രത്തില്‍ എത്തിച്ച്‌ ചോദ്യം ചെയ്തുവരുന്ന ഇയാളെക്കുറിച്ച്‌ കൂടുതല്‍ വിവരങ്ങള്‍ പൊലീസ് പുറത്തുവിട്ടിട്ടില്ല. സ്ഫടികത്തെ കൂടാതെ പത്തോളം പേര്‍ ഇപ്പോഴും പൊലീസ് കസ്​റ്റഡിയിലുണ്ട്.

ഖത്തറിലെ ബിസിനസുകാരനായ ഓച്ചിറ സ്വദേശിയുടെ ക്വട്ടേഷനാണ് കൊലപാതകത്തിന് പിന്നിലെന്ന ഉറച്ച വിശ്വാസത്തില്‍തന്നെയാണ് ഇപ്പോഴും പൊലീസ്. രാജേഷ് വധത്തില്‍ തനിക്ക് ബന്ധമില്ലെന്ന ഖത്തര്‍ വ്യവസായി സത്താറി​െന്‍റ വെളിപ്പെടുത്തല്‍ അന്വേഷണസംഘം മുഖവിലയ്​ക്കെടുത്തിട്ടില്ല. സത്താറിനോ പൊലീസ് സംശയിക്കുന്ന അലിഭായിക്കോ സംഭവത്തില്‍ പങ്കുണ്ടെന്ന് വിശ്വസിക്കുന്നില്ലെന്ന സത്താറി​െന്‍റ മുന്‍ ഭാര്യയുടെ വെളിപ്പെടുത്തലും പൊലീസ് തള്ളിക്കളഞ്ഞിട്ടുണ്ട്. തിരുവനന്തപുരം റൂറല്‍ എസ്.പി യുടെ നേതൃത്വത്തില്‍ അഞ്ച് പ്രത്യേക സംഘങ്ങളായി തിരിഞ്ഞാണ് അന്വേഷണം നടക്കുന്നത്.