നിരന്തരം സര്ക്കാരിനെ വിമര്ശിച്ച് നടത്തുന്ന മനുഷ്യാവകാശ കമ്മീഷന് ഇടപെടലുകള്ക്ക് ഉടന് വിരാമമിടാന് സര്ക്കാര്; ഈമാസം 30നു വിരമിക്കുന്ന ഹൈക്കോടതി ചീഫ് ജസ്റ്റിസ് ആന്റണി ഡൊമിനിക്കിനെ സംസ്ഥാന മനുഷ്യാവകാശ കമ്മിഷന് അധ്യക്ഷനായി നിയമിക്കുമെന്നു സൂചന
പ്രതിപക്ഷത്തിന്റെ റോളിലേക്ക് മനുഷ്യാവകാശ കമ്മീഷന് മാറിയെന്ന അഭിപ്രായം ശക്തമായതോടെ ശക്തമായ നീക്കള്ക്കൊരുങ്ങി സര്ക്കാര്. ഈ മാസം 30നു വിരമിക്കുന്ന ഹൈക്കോടതി ചീഫ് ജസ്റ്റിസ് ആന്റണി ഡൊമിനിക്കിനെ സംസ്ഥാന മനുഷ്യാവകാശ കമ്മിഷന് അധ്യക്ഷനായി നിയമിക്കുമെന്നാണ് സൂചന. ഇതുസംബന്ധിച്ചു സര്ക്കാര്തലത്തില് ധാരണയായി.
മനുഷ്യാവകാശ കമ്മിഷന് ആക്ടിങ് ചെയര്മാന് പി. മോഹനദാസും സര്ക്കാരുമായി നിരന്തരം കൊമ്പുകോര്ക്കുന്ന പശ്ചാത്തലത്തിലാണു സ്ഥാനമാറ്റത്തിനു വഴിതെളിഞ്ഞത്. മുഖ്യമന്ത്രി പിണറായി വിജയനും പി. മോഹനദാസുമായി അടുത്തിടെ വാക്പോരില് ഏര്പ്പെട്ടിരുന്നു. മനുഷ്യാവകാശ കമ്മിഷന് ആ പണി ചെയ്താല് മതിയെന്നായിരുന്നു മുഖ്യമന്ത്രിയുടെ മുന്നറിയിപ്പ്.
ജസ്റ്റിസ് ജെ.ബി. കോശി സ്ഥാനമൊഴിഞ്ഞതിനേത്തുടര്ന്ന് 2016 സെപ്റ്റംബര് നാലിനാണു മനുഷ്യാവകാശ കമ്മിഷന് ആക്ടിങ് ചെയര്മാനായി പി. മോഹനദാസ് നിയമിക്കപ്പെട്ടത്. ചീഫ് ജസ്റ്റിസ് പദവിയുള്ളയാള്ക്കായി ചെയര്മാന് കസേര ഒഴിച്ചിടുകയായിരുന്നു. ഭാഷാപ്രശ്നം കണക്കിലെടുത്താണ് ഇതര ഹൈക്കോടതികളിലെ മുന് ചീഫ് ജസ്റ്റിസുമാരെ പരിഗണിക്കാതിരുന്നത്. ഹൈക്കോടതി ചീഫ് ജസ്റ്റിസ് ആന്റണി ഡൊമിനിക് 30നു വിരമിച്ചശേഷം ജൂണ് ആദ്യവാരം മനുഷ്യാവകാശ കമ്മിഷന് അധ്യക്ഷപദവിയേല്ക്കും.
ഓഖി ദുരന്തം, വരാപ്പുഴ കസ്റ്റഡി മരണം, വിദേശവനിതയുടെ കൊലപാതകം തുടങ്ങി നിരവധി വിഷയങ്ങളില് കമ്മിഷന്റെ പരാമര്ശങ്ങള് സര്ക്കാരിനെ പ്രതിക്കൂട്ടിലാക്കിയിരുന്നു. വരാപ്പുഴ കേസില് ആരോപണവിധേയനായ മുന് എസ്.പി. എ.വി. ജോര്ജിനെ പോലീസ് അക്കാഡമിയില് അഡീഷണല് ഡയറക്ടറായി നിയമിച്ചതിനെയും മോഹനദാസ് വിമര്ശിച്ചു.
കോവളത്തു കൊല്ലപ്പെട്ട വിദേശവനിതയുടെ സംസ്കാരം തടയാന് ചീഫ് സെക്രട്ടറിക്കും ഡി.ജി.പിക്കും നിര്ദേശം നല്കിയ കമ്മിഷന്, ബലാത്സംഗത്തിനിരയായ യുവതിയുടെ പേര് ഉത്തരവില് പരാമര്ശിക്കുകയും ചെയ്തു. മനുഷ്യത്വം തീണ്ടാത്ത കമ്മിഷനായി മനുഷ്യാവകാശ കമ്മിഷന് മാറിയെന്നു മന്ത്രി കടകംപള്ളി സുരേന്ദ്രനും ആരോപിച്ചിരുന്നു. ജസ്റ്റിസ് ആന്റണി ഡൊമിനിക് ചെയര്മാനായാലും കമ്മിഷന് അംഗമായി മോഹനദാസ് തുടരും.
https://www.facebook.com/Malayalivartha
