ഇടുക്കിയിൽ എത്തുന്ന വിനോദ സഞ്ചാരികളെ ആകർഷിക്കുന്ന സുന്ദരി; സൗന്ദര്യോത്സവത്തിനായി അഞ്ചുരുളി ഒരുങ്ങുന്നു
ഇടുക്കിയുടെ സൗന്ദര്യവും കുളിര്മയും ആസ്വദിക്കാനെത്തുന്ന വിനോദസഞ്ചാരികളെ ഏറെ ആകര്ഷിക്കുന്ന സുന്ദരിയാണ് അഞ്ചുരുളി. അനന്ത വിസ്തൃതിയില് പരന്നുകിടക്കുന്ന ഇടുക്കി ജലാശയവും ജലാശയത്തെ ചൂഴ്ന്ന് നില്ക്കുന്ന കാനന ഭംഗിയും കല്യാണത്തണ്ട് മലനിരകളും ഇരട്ടയാര് ഡാമില് നിന്ന് ജലമെത്തിക്കുന്നതിനായി നിര്മ്മിച്ച അഞ്ചുരുളി ടണല്മുഖവും തടാക മദ്ധ്യത്തിലെ ഇടത്തുരുത്തും വിനോദസഞ്ചാരികളുടെ മനം കുളിര്പ്പിക്കുന്ന കാഴ്ചകളാണ്. ഈ മനോഹാരിത ആവോളം ആസ്വദിക്കാന് പഞ്ചായത്തിന്റെ നേതൃത്വത്തില് വിവിധ സംഘടനകളുടെ സഹകരണത്തോടെയും, പൊതുജനപങ്കാളിത്വത്തോടെയും സംഘടിപ്പിക്കുന്ന അഞ്ചുരുളി സൗന്ദര്യോത്സവത്തിന് ഈമാസം 16 ന് തിരിതെളിയും.
ഇതിനു മുന്നോടിയായി 501 അംഗ സംഘാടകസമിതി രൂപീകരിച്ചു. കക്കാട്ടുകടയിലെ സ്വാഗതസംഘം ഓഫീസ് റോഷി അഗസ്റ്റിന് എം.എല്.എ ഉദ്ഘാടനം ചെയ്തു. ഇടുക്കി താലൂക്കിന്റെ കിഴക്ക് സ്ഥിതി ചെയ്യുന്ന, കാര്ഷിക-കുടിയേറ്റ-ആദിവാസി ഗോത്രവിഭാഗ പൈതൃകങ്ങള് കുടികൊളളുന്ന കാഞ്ചിയാര് പഞ്ചായത്തിലാണ് അഞ്ചുരുളി വിനോദസഞ്ചാരകേന്ദ്രം സ്ഥിതിചെയ്യുന്നത്. വിശാലമായ ഇടുക്കി ജലാശയത്തിനുളളില് ഉരുളി കമഴ്ത്തിയതുപോലെ അഞ്ച് കുന്നുകള് സ്ഥിതി ചെയ്യുന്നതിനാലാണ് അഞ്ചുരുളി എന്ന പേര് ലഭിച്ചത്. ദിവസേന ആയിരകണക്കിനാളുകളാണ് അഞ്ചുരുളി വെളളച്ചാട്ടവും ഭംഗിയും ആസ്വദിക്കാനെത്തുന്നത്.
സൗന്ദര്യോത്സവത്തില് ആസ്വാദകര്ക്കായി നിരവധി പരിപാടികളാണ് സംഘാടകര് ഒരുക്കുന്നത്. ഹൈഡല് ടൂറിസവുമായി ബന്ധപ്പെട്ട് തടാകത്തില് ബോട്ടിംഗ്, കാര്ണിവല്, വടംവലി, വോളിബോള് ടൂര്ണമെന്റുകള്, കലാകായിക മത്സരങ്ങള്, ആയോധനകലകളുടെ പ്രദര്ശനം, കോഴിമല ആദിവാസി വിഭാഗത്തിന്റെ തനതുകലാരൂപമായ കൂത്ത്, വിവിധ വിഷയങ്ങളെ ആസ്പദമാക്കി സെമിനാറുകള്, കാര്ഷിക മേള, സാഹിത്യ, സാസ്കരിക പരിപാടികള്, വിവിധ മേഖലകളിലെ പ്രതിഭകളെ ആദരിക്കല്, കുട്ടികളുടെ കലാപരിപാടികള്, തുടങ്ങിയവക്കു പുറമെ അഞ്ചുരുളിയുടെ ആകാശകാഴ്ച സമ്മാനിക്കാന് ഹെലികോപ്ടര് യാത്രയും സജ്ജമാക്കുവാന് ശ്രമിക്കുന്നതായി സംഘാടകസമിതി ചെയര്മാനായ കാഞ്ചിയാര് പഞ്ചായത്ത് പ്രസിഡന്റ് മാത്യു ജോര്ജ് പറഞ്ഞു.
പരിപാടിയുടെ സുഗമമായ നടത്തിപ്പിന് 101 അംഗ എക്സിക്യൂട്ടീവ് സമിതി, 50 പേരടങ്ങുന്ന ഭാരവാഹികള്, കൂടാതെ പ്രോഗ്രാം, ഫിനാന്സ്, സ്റ്റേജ്, ഗതാഗതം, ബോട്ടിംഗ്, കലാകായികം, ഭക്ഷണം, അടിസ്ഥാനസൗകര്യം തുടങ്ങി 16 സബ്കമ്മറ്റികളെയും തിരഞ്ഞെടുത്തു. പഞ്ചായത്ത് വൈസ് പ്രസിഡണ്ട് വിജയകുമാരി ജയകുമാര് കണ്വീനറും വികസനകാര്യ സ്റ്റാന്റിംഗ് കമ്മറ്റി ചെയര്മാന് കെ.എന്.ബിനു ട്രഷററുമാണ്. ഫെസ്റ്റുമായി ബന്ധപ്പെട്ട് അഞ്ചുരുളിയില് സുരക്ഷാസംവിധാനവും ലൈറ്റ്, വാഹന പാര്ക്കിംഗ് സൗകര്യവും ഒരുക്കുമെന്ന് അദ്ദേഹം പറഞ്ഞു.
https://www.facebook.com/Malayalivartha
