കണ്ണൂര്‍ പിണറായിയില്‍ മുഖ്യമന്ത്രി പിണറായി വിജയന്റെ വീടിന് സമീപം കാലുകളും തലയും വെട്ടിമാറ്റിയ നിലയില്‍ പൂച്ചകളുടെ മൃതദേഹം കണ്ടെത്തിയ സംഭവത്തില്‍ പോലീസും രഹസ്യാന്വേഷണ വിഭാഗവും അന്വേഷണം തുടങ്ങി. ഇത് അക്രമിസംഘത്തിന്റെ പരിശീലനമാണെന്നുള്ള ഞെട്ടിപ്പിക്കുന്ന വിവരമാണ് പുറത്തുവരുന്നത്.

ഇങ്ങനെ വെട്ടി തള്ളുന്ന പട്ടികളും പൂച്ചകളും ചോരവാര്‍ന്ന് തെരുവില്‍ പിടഞ്ഞു ചാവുന്നു. മറ്റ് ചിലത് ചത്ത് ജീവിക്കുന്നു. മൃഗസ്നേഹികള്‍ക്ക് സഹിക്കാന്‍ പറ്റാത്ത കാഴ്ചയാണിത്. തെരുവ് നായകളെ കൊല്ലണമെന്ന ആവശ്യം മുന്‍പ് വന്‍ സംഘര്‍ഷം തന്നെ ഉണ്ടാക്കിയിരുന്നു. മൃഗസ്നേഹികള്‍ ഒന്നടങ്കം എതിര്‍ത്തുകൊണ്ട് രംഗത്തുവന്നത് വന്‍ ചര്‍ച്ചകള്‍ക്ക് വഴിവെച്ചിരുന്നു..dogഎന്നാലിവിടെ ഒരു കാരുണ്യവുമില്ലാതെയാണ് മിണ്ടാപ്രാണികളെ കൊന്നിടുന്നത്. ഓലയമ്പലം ടൗണിനടുത്ത് വ്യാഴാഴ്ച രാവിലെ കാണപ്പെട്ട ഒരു പൂച്ചയുടെ ദൃശ്യം കരളലിയിപ്പിക്കുന്നതായിരുന്നു.

നാല് കാലുകളും വെട്ടിമാറ്റപ്പെട്ട പൂച്ച പിന്നീട് പിടഞ്ഞു ചത്തു. മറ്റൊരു കാഴ്ച ആശുപത്രി റോഡിലായിരുന്നു. ഇന്നലെ രാവിലെ ആശുപത്രി റോഡില്‍ ഒരു കാല് അറുത്തുമാറ്റിയ നിലയില്‍ പൂച്ച ചത്തുകിടക്കുന്നു. ഏതാനും മാസം മുമ്പ് ഈ പരിസരങ്ങളില്‍ ഒന്നിലേറെ നായ്ക്കളെ ഇതേ രീതിയില്‍ കാലുകള്‍ അറുത്തുമാറ്റിയിരുന്നു. സംഭവം സംബന്ധിച്ച് പോലീസ് അന്വേഷണം തുടങ്ങിയിട്ടുണ്ട്. മൃഗസംരക്ഷണ സേനയും പിണറായിലെത്തി അന്വേഷണം ആരംഭിച്ചിട്ടുണ്ട്. ഇതിനുപിന്നിലുള്ള തീവ്രമത രാഷ്ട്രീയ സംഘടനകളെയും പോലീസ് അന്വേഷിക്കുകയാണ്.

മുഖ്യമന്ത്രിയുടെ വീട് സ്ഥിതി ചെയ്യുന്നതിന് അരക്കിലോമീറ്റര്‍ അകലയാണ് ദുരൂഹതയുയര്‍ത്തിയ തരത്തില്‍ പൂച്ചകളുടെ ജഡങ്ങള്‍ കണ്ടെത്തിയത്. 24 മണിക്കൂറും പോലീസ് നിരീക്ഷണമുള്ള പ്രദേശത്താണ് ഇത്തരത്തിലുള്ള സംഭവം അരങ്ങേറിയിട്ടുള്ളത്. 30ന് പിണറായിയില്‍ പോലീസ് സ്റ്റേഷന്‍ നിലവില്‍ വരാനിരിക്കെ നിര്‍ദ്ദിഷ്ട പോലീസ് സ്റ്റേഷന്റെ തൊട്ടടുത്താണ് ദുരൂഹതയുയര്‍ത്തുന്ന സംഭവം നടന്നിരിക്കുന്നത്.

പിണറായി ഓലയമ്ബലം പെട്രോള്‍ പമ്ബിന് സമീപത്താണ് വ്യാഴാഴ്ച പുലര്‍ച്ചെ നാല് കാലുകള്‍ വെട്ടിമാറ്റിയ നിലയില്‍ പൂച്ചയുടെ ജഡം കണ്ടെത്തിയത്. പിണറായി ആരോഗ്യ കേന്ദ്രത്തിനു സമീപത്തായിട്ടാണ് വെള്ളിയാഴ്ച രാവിലെ രണ്ട് കാലുകള്‍ക്കും തലയ്ക്കും വെട്ടേറ്റ നിലയിലും പൂച്ചയുടെ ജഡം കണ്ടെത്തിയത്. വിവരമറിഞ്ഞ് ധര്‍മ്മടം പോലീസ് സ്ഥലത്തെത്തുകയും അന്വേഷണം നടത്തുകയും ചെയ്തു. സംഭവത്തെക്കുറിച്ച് രഹസ്യാന്വേഷണ ഉദ്യോഗസ്ഥര്‍ റിപ്പോര്‍ട്ട് തേടിയിട്ടുണ്ടെന്നാണ് അറിയുന്നത്.