ഗുജറാത്ത് ഉപതെരഞ്ഞെടുപ്പില്‍ ബി.ജെ.പിക്ക് തകര്‍പ്പന്‍ വിജയം. ബി.ജെ.പി സ്ഥാനാര്‍ഥി കുംവര്‍ജി ബവാലിയാണ് കോണ്‍ഗ്രസിന്റെ അവ്‌സറിനെ 19000ലധികം വോട്ടുകളുടെ ഭൂരിപക്ഷത്തില്‍ പരാജയപ്പെടുത്തിയത്. ഗുജറാത്തിലെ ജസ്ദാണ്‍ മണ്ഡലത്തിലെ കോണ്‍ഗ്രസ് എം.എല്‍.എ ആയിരുന്ന കുംവര്‍ജി ബാവലിയ രാജിവെച്ച് ബി.ജെ.പി.യില്‍ ചേര്‍ന്നതോടെയാണ് ഉപതിരഞ്ഞെടുപ്പിന് കളമൊരുങ്ങിയത്. ബി.ജെ.പിയില്‍ ചേര്‍ന്നതോടെ കുംവര്‍ജി ബാവലിയക്ക് ജലവിഭവ വകുപ്പു മന്ത്രിസ്ഥാനവും ലഭിച്ചിരുന്നു. ബാവലിയയുടെ വിജയത്തോടെ ഗുജറാത്ത് നിയമസഭയില്‍ ബി.ജെ.പിയുടെ അംഗബലം നൂറായി. ഒ.ബി.സി വിഭാഗത്തില്‍ ഉള്‍പ്പെടുന്ന കോലി സമുദായത്തിന് നിര്‍ണായക സ്വാധീനമുള്ള മണ്ഡലമാണ് ജസ്ദാണ്‍. കോലി സമുദായ നേതാവു കൂടിയാണ് ബാവലിയ. ജസ്ദാണില്‍ നിന്ന് കോണ്‍ഗ്രസ് പ്രതിനിധിയായി ബാവലിയ അഞ്ചുവട്ടം നിയമസഭയിലെത്തിയിട്ടുണ്ട്.

മണ്ഡലം രൂപീകരിച്ച ശേഷം നടന്ന 14 തെരഞ്ഞെടുപ്പുകളില്‍ ഒമ്ബതിലും കോണ്‍ഗ്രസായിരുന്നു ജയിച്ചിരുന്നത്. നാലുതവണ സ്വതന്ത്രരും ഒറ്റത്തവണ ബി.ജെ.പി.യും ജയിച്ചു. കോണ്‍ഗ്രസിന്റെ ഒമ്ബതു വിജയങ്ങളില്‍ അഞ്ചും കുംവര്‍ജി ബാവലിയയിലൂടെയായിരുന്നു. ബാവലിയ ലോക്‌സഭാംഗമായപ്പോള്‍ വന്ന ഒരു ഉപതെരഞ്ഞെടുപ്പില്‍ മാത്രമാണ് ബി.ജെ.പിക്ക് ജയിക്കാനായത്.

1960ല്‍ സംസ്ഥാന രൂപീകരണത്തിനു ശേഷം മണ്ഡലത്തില്‍ ബിജെപിയുടെ മൂന്നാമത്തെ മാത്രം ജയമാണ് ഇത്. രാജ്‌കോട്ട് ജില്ലയിലെ സീറ്റിലേക്ക് ഡിസംബര്‍ 20നാണ് വോട്ടെടുപ്പ് നടന്നത്. 71.27 ശതമാനമായിരുന്നു പോളിങ്. മധ്യപ്രദേശ്, രാജസ്ഥാന്‍, ഛത്തീസ്ഗഡ് തിരഞ്ഞെടുപ്പുകളിലെ തോല്‍വിയുടെ പശ്ചാത്തലത്തില്‍ ബിജെപിക്ക് അഭിമാന പോരാട്ടമായിരുന്നു ഗുജറാത്തിലേത്. 2019ലെ ലോക്‌സഭാ തിരഞ്ഞെടുപ്പില്‍ ബിജെപി ഗുജറാത്തില്‍ 26 സീറ്റുകളും നേടുമെന്ന് മുഖ്യമന്ത്രി വിജയ് രൂപാണി പറഞ്ഞു. പ്രധാനമന്ത്രി നരേന്ദ്രമോദിയെ ജനങ്ങള്‍ വീണ്ടും അധികാരത്തിലേറ്റുമെന്നും രൂപാണി അവകാശപ്പെട്ടു.