ഡല്ഹിയില് ജനജീവിതം ദുസ്സഹം... അന്തരീക്ഷ മലിനീകരണം രൂക്ഷമായ നിലയില്
ഡല്ഹിയിലെ അന്തരീക്ഷ മലിനീകരണം വീണ്ടും രൂക്ഷമായ നിലയില്. കേന്ദ്ര മലിനീകരണ നിയന്ത്രണ ബോര്ഡിന്റെ (സിപിസിബി) കണക്കുകള് പ്രകാരം ഇന്നലെ എയര് ക്വാളിറ്റി ഇന്ഡക്സ് (എക്യുഐ) 471 രേഖപ്പെടുത്തി. ശൈത്യം അതികഠിനമായി നില്ക്കുന്നതിനിടെയാണ് മലിനീകരണം ജനജീവിതം ദുഃസഹമാക്കിയിരിക്കുന്നത്.
മലിനീകരണം രൂക്ഷമായി തുടരുന്നതിനാല് ജനങ്ങള് പുറത്തിറങ്ങുന്നത് പരമാവധി ഒഴിവാക്കണമെന്നു സിപിസിബി നിര്ദേശിച്ചു. ഈ വര്ഷം ഇതു രണ്ടാമത്തെ തവണയാണ് ഡല്ഹിയിലെ അന്തരീക്ഷ മലിനീകരണം അതിരൂക്ഷമായ അവസ്ഥയിലേക്കു കടക്കുന്നത്. ദിപാവലി ആഘോഷങ്ങള്ക്കു ശേഷം നവംബര് എട്ടിനു എക്യുഐ 571 രേഖപ്പെടുത്തിയിരുന്നു.
പഞ്ചാബ്, ഹരിയാന, രാജസ്ഥാന് എന്നിവിടങ്ങളിലെ കൃഷിയിടങ്ങളില് തീയിടുന്നതിന്റെയും ദീപാവലി ആഘോഷങ്ങള്ക്ക് വ്യാപകമായി പടക്കം പൊട്ടിച്ചതും മൂലമായിരുന്നു അത്. ഇത്തവണ കാലാവസ്ഥയിലുള്ള വ്യതിയാനമാണ് കാരണമെന്നും അതിശൈത്യവും കാറ്റടിക്കുന്നതു കുറഞ്ഞതുമാണ് പ്രശ്നം രൂക്ഷമാക്കിയിരിക്കുന്നതെന്നും കാലാവസ്ഥ നിരീക്ഷണകേന്ദ്രം പറയുന്നു.
എക്യുഐ 50 മുതല് 100 വരെ രേഖപ്പെടുത്തുന്നതാണ് സാധാരണ നിലയില് മനുഷ്യ ജീവിതത്തിനു ഉപകരിക്കുന്നത്. ഇതു 450 കടന്നതോടെയാണ് അതീവരൂക്ഷമായ ഘട്ടമെന്നു വിലയിരുത്തി മലിനീകരണ നിയന്ത്രണ ബോര്ഡ് മുന്നറിയിപ്പ് നല്കിയത്. എക്യുഐ 500 കടന്നാല് ആരോഗ്യ അടിയന്തരാവസ്ഥ പുറപ്പെടുവിക്കേണ്ട നിലയിലെത്തും.
https://www.facebook.com/Malayalivartha