തെരഞ്ഞെടുപ്പു പ്രചരണാര്‍ഥം പ്രധാനമന്ത്രി നരേന്ദ്ര മോഡി ഇന്നു കശ്മീരിലെത്തും. കഴിഞ്ഞ ദിവസത്തെ തീവ്രവാദി ആക്രമണങ്ങളുടെ പശ്ചാത്തലത്തില്‍ മോഡിയുടെ സന്ദര്‍ശനത്തോടനുബന്ധിച്ച് കശ്മീരില്‍ കനത്ത സുരക്ഷാ സന്നാഹമാണ് ഏര്‍പ്പെടുത്തിയിരിക്കുന്നത്. മോഡിയുടെ പ്രസംഗ വേദിയായ കശ്മീരിലെ ഷേര്‍എ കശ്മീര്‍ ക്രിക്കറ്റ് സ്‌റ്റേഡിയത്തില്‍ ഹെലികോപ്ടര്‍ നിരീക്ഷണം അടക്കമുള്ള സംവിധാനങ്ങളാണ് ഇന്നലെ മുതല്‍ ഒരുക്കിയിരിക്കുന്നത്.
പോലീസ്, സി.ആര്‍.പി.എഫ്. ഉള്‍പ്പെടെയുള്ള സുരക്ഷാസേനകളെ ശ്രീനഗര്‍ പട്ടണത്തിലും പ്രാന്തപ്രദേശങ്ങളിലും വിന്യസിച്ചിട്ടുണ്ട്. പ്രത്യേക ചെക്‌പോസ്റ്റുകളും ബാരിക്കേഡുകളും സ്ഥാപിച്ച് വാഹനപരിശോധന കര്‍ശനമാക്കി. മോഡി സംബന്ധിക്കുന്ന പരിപാടിയില്‍ പങ്കെടുക്കാനെത്തുന്നവരെ കര്‍ശന പരിശോധനകള്‍ക്കു ശേഷമേ സ്‌റ്റേഡിയത്തിലേക്കു പ്രവേശിപ്പിക്കൂ. സംശയം തോന്നുന്നവരെ പോലീസും ഇന്റലിജന്‍സ് ഏജന്‍സികളും പ്രത്യേകം നിരീക്ഷിക്കും.
മോഡിയെ ലക്ഷ്യമിട്ട് ലഷ്‌കര്‍ ഇ തോയിബ തീവ്രവാദികള്‍ കാശ്മീരില്‍ സജീവമാണെന്നാണ് രഹസ്യാന്വേഷണ റിപ്പോര്‍ട്ട്. ഏതുവിധേനയും അട്ടിമറി നടത്തി കാശ്മീരിലെ തെരഞ്ഞെടുപ്പ് തടസ്സപ്പെടുത്തുകയാണ് ലക്ഷ്യമെന്നാണ് രഹസ്യാന്വേഷണ വിവരം. അതുകൊണ്ട് കൂടിയാണ് ഈ കരുതല്‍. എസ്പി.ജി കമാന്‍ഡോകളുടെ പൂര്‍ണ നിയന്ത്രണത്തിലാണ് സ്‌റ്റേഡിയം. പുറത്ത് 30 കമ്പനി അര്‍ദ്ധ സൈനികരെ വിന്യസിച്ചിട്ടുണ്ട്. സമീപത്തുള്ള കെട്ടിടങ്ങളില്‍ കമാന്‍ഡോകള്‍ നിലയുറപ്പിച്ചുകഴിഞ്ഞു. അക്രമികളെ കണ്ടമാത്രയില്‍ വെടിവയ്ക്കും. പലതവണ പരിശോധിച്ച ശേഷമേ റാലിയില്‍ പങ്കെടുക്കുന്നവരെ സ്‌റ്റേഡിയത്തിലേക്ക് കടത്തിവിടൂ.
ജനക്കൂട്ടത്തിലെ ചലനങ്ങള്‍ സി സി ടിവി കാമറകളും ബൈനാക്കുലറും ഉപയോഗിച്ച് നിരന്തരം നിരീക്ഷിക്കും. വേദിക്ക് സമീപമുള്ള ഹെലിപ്പാഡിലാണ് പ്രധാനമന്ത്രി ഇറങ്ങുക.
സ്‌റ്റേഡിയത്തിലേക്കുള്ള വഴികളും സേനയുടെ നിയന്ത്രണത്തിലേക്കാണ്. ഇതുവഴി മോദിയുടെ പ്രസംഗം കഴിയും വരെ വാഹനഗതാഗതം അനുവദിക്കില്ല. സ്‌ഫോടക വസ്തുക്കള്‍ കണ്ടെടുക്കാന്‍ പരിശീനം നേടിയ പട്ടികളും പരിശോധനകളില്‍ സജീവമാണ്. കാര്യക്ഷമമായ പരിശോധനയ്ക്ക് സ്‌റ്റേഡിയത്തിലേക്ക് എത്തുന്ന സ്ത്രീകള്‍ക്കും പുരുഷന്മാര്‍ക്കും പ്രത്യേകം കവാടങ്ങളും ഒരുക്കിയിട്ടുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha