തെക്കന്‍ കശ്മീരിലെ അനന്തനാഗിലെ പൊലീസ് ആസ്ഥാനത്തിനു സമീപം അതീവസുരക്ഷാമേഖലയില്‍ ഗ്രനേഡ് ആക്രണം. ഡെപ്യൂട്ടി കമീഷണറുടെ ഓഫീസിന് തൊട്ടടുത്തുണ്ടായ സ്‌ഫോടനത്തില്‍ ട്രാഫിക് പൊലീസുകാരന്‍ ഉള്‍പ്പെടെ 14 പേര്‍ക്ക് പരിക്കേറ്റിട്ടുണ്ട് പൊലീസ് ആസ്ഥാനത്തേക്ക് എറിഞ്ഞ ഗ്രനേഡ് ലക്ഷ്യം തെറ്റി റോഡില്‍ പതിച്ച് പൊട്ടിത്തെറിച്ചു. പരിക്കേറ്റവരില്‍ പ്രാദേശിക പത്രപ്രവര്‍ത്തകനുമുണ്ട്. എല്ലാവരെയും ആശുപത്രിയില്‍ പ്രവേശിപ്പിച്ചു.

സംസ്ഥാനത്തിന്റെ പ്രത്യേക പദവി റദ്ദാക്കിയശേഷം കശ്മീരില്‍ നടക്കുന്ന രണ്ടാമത്തെ ഗ്രനേഡ് ആക്രമണമാണിത്. പ്രദേശം സുരക്ഷാസേനയുടെ നിയന്ത്രണത്തിലാണ്. ആക്രമണത്തിന്റെ ഉത്തരവാദിത്തം ഭീകരസംഘടനകളൊന്നും ഏറ്റെടുത്തിട്ടില്ല.