പ്രതിശ്രുത വരനൊപ്പം നിന്ന് സെല്‍ഫിയെടുക്കുന്നതിനിടെ കിണറ്റില്‍ വീണ് യുവതിക്ക് ദാരുണാന്ത്യം. കിണറിന്റെ പടിയില്‍നിന്ന് പ്രതിശ്രുതവരനൊപ്പം 'സെല്‍ഫി'യെടുക്കുന്നതിനിടെയാണ് കിണറ്റിലേക്ക് വീണത്. ചെന്നൈ പട്ടാഭിറാം ഗാന്ധിനഗറില്‍ താമസിക്കുന്ന മേഴ്സി സ്റ്റെഫി(24) ആണ് മരിച്ചത്. യുവതിയെ രക്ഷിക്കാന്‍ ശ്രമിച്ച് വെള്ളത്തില്‍ വീണ പ്രതിശ്രുത വരന്‍ അപ്പു(24)വിനെ സ്വകാര്യാശുപത്രിയില്‍ പ്രവേശിപ്പിച്ചു. ഇരുവരുടെയും വിവാഹം ജനുവരിയില്‍ നടത്താനാണ് നിശ്ചയിച്ചിരുന്നത്. ഇവര്‍ ഒരുമിച്ച് സ്ഥലങ്ങള്‍ സന്ദര്‍ശിക്കുന്നത് പതിവായിരുന്നു.
കഴിഞ്ഞദിവസം വൈകീട്ട് ബൈക്കുമായെത്തിയ അപ്പു മേഴ്സിയുമൊത്ത് പുറത്തേക്കുപോയി. വണ്ടല്ലൂര്‍-മിഞ്ചൂര്‍ നാലുവരിപ്പാതയില്‍ വഴിയരികിലെ കൃഷിത്തോട്ടം കണ്ട മേഴ്സി ഫോട്ടോയെടുക്കാനായി ബൈക്ക് നിര്‍ത്താനാവശ്യപ്പെട്ടു. അവിടെയുണ്ടായിരുന്ന കിണറിന്റെ ഉള്ളിലേക്കിറങ്ങുന്ന പടിക്കെട്ടിലിരുന്ന് ഇരുവരും ചിത്രങ്ങളെടുത്തു. ഇതിനിടയിലാണ് നിലതെറ്റി മേഴ്സി കിണറ്റിലേക്ക് വീണത്. രക്ഷിക്കാനായി കൈനല്‍കിയ അപ്പുവും വെള്ളത്തിലേക്കു വീണു. ഇതിനകം മേഴ്സി വെള്ളത്തില്‍ മുങ്ങിത്താണിരുന്നു. നിലവിളി കേട്ടെത്തിയ കൃഷിക്കാര്‍ വെള്ളത്തില്‍നിന്ന് അപ്പുവിനെ രക്ഷിച്ച് കരയ്‌ക്കെത്തിച്ചു. നാട്ടുകാരുടെ തിരച്ചിലില്‍ കണ്ടെത്താനാകാത്തതിനാല്‍, അഗ്‌നിരക്ഷാസേന എത്തിയാണ് മേഴ്സിയുടെ മൃതദേഹം പുറത്തെടുത്തത്. മൃതദേഹം പരിശോധനയ്ക്കുശേഷം ബന്ധുക്കള്‍ക്ക് വിട്ടുകൊടുത്തു.