പതിനഞ്ച് ദിവസം മാത്രം പ്രായമുള്ള മകളെ കൊലപ്പെടുത്തിയ പിതാവ് അറസ്റ്റില്‍. തമിഴ്‌നാട്ട് വില്ലുപുരം ജില്ലയിലാണ് സംഭവം. പിതാവ് വരദരാജനെ പൊലീസ് അറസ്റ്റ് ചെയ്തു. ചോദ്യം ചെയ്യലില്‍ പ്രതി കുറ്റം സമ്മതിച്ചു. അമ്മയുടെ പരാതിയിലാണ് പോലീസ് പ്രതിയെ അറസ്റ്റ് ചെയ്തത്. അമ്മയ്‌ക്കൊപ്പം ഉറങ്ങുകയായിരുന്ന കുഞ്ഞിനെ ആരും അറിയാതെ എടത്തുകൊണ്ടു പോയി കൊലപ്പെടുത്തി കടല്‍ക്കരയില്‍ കുഴിച്ചിടുകയായിരുന്നു വരദരാജന്‍. പെണ്‍കുട്ടി ജനിച്ചത് മുതല്‍ കൊലപ്പെടുത്തുമെന്ന് ഇയാള്‍ ഭീഷണി മുഴക്കിയിരുന്നതായി ഭാര്യ പരാതിയില്‍ പറയുന്നു. ആണ്‍കുട്ടിയെയാണ് ഇയാള്‍ പ്രതീക്ഷിച്ചിരുന്നത്. കാര്യങ്ങള്‍ മറിച്ചായതോടെ വരദരാജന്‍ അസ്വസ്ഥനായിരുന്നെന്ന് ബന്ധുക്കള്‍ പറയുന്നു.

വരദരാജന്റെ ഭീഷണിയെ തുടര്‍ന്ന് കുട്ടിയുമായി ഭാര്യ സ്വന്തം വീട്ടിലേക്ക് പോയിരുന്നു. ഏതാനും ദിവസങ്ങള്‍ക്ക് ശേഷം ഭാര്യയുടെ വീട്ടിലെത്തി, അവരെ അനുനയിപ്പിച്ച് കൂട്ടിക്കൊണ്ട് വരുകയായിരുന്നു. കുഞ്ഞിനെ ഉപദ്രവിക്കില്ലെന്ന് വാക്കും കൊടുത്തിരുന്നു. പെണ്‍കുട്ടികള്‍ ബാധ്യതയാണെന്നാണ് ഇപ്പോഴും തമിഴ് ഗ്രാമങ്ങളില്‍ പലയിടങ്ങളിലും ഉളള വിശ്വാസം. ഇതേ ചൊല്ലി ദമ്പിതകള്‍ തമ്മില്‍ തര്‍ക്കങ്ങളും കേസുകളും ഉണ്ടാകാറുണ്ട്. ഉസലാംപെട്ടി എന്ന സ്ഥലത്താണ് തമിഴ്‌നാട്ടില്‍ ഏറ്റവും കൂടുതല്‍ പെണ്‍കുട്ടികള്‍ ജനിക്കുന്നത്. അവിടെ കുട്ടികള്‍ കൊല്ലപ്പെടുന്നത് പതിവായതോടെ ജയലളിത മുഖ്യമന്ത്രിയായിരുന്ന കാലത്ത് അമ്മത്തൊട്ടില്‍ പോലൊരു സംവിധാനം തുടങ്ങി. പെണ്‍മക്കളെ ഇഷ്ടമില്ലാത്തവര്‍ക്ക് അവിടെ ഉപേക്ഷിക്കാം. ആ സംവിധാനം കണ്ട് മനസ്സിലാക്കിയാണ് കേരളത്തില്‍ ശുശുക്ഷേമ സമിതികള്‍ക്ക് കീഴില്‍ അമ്മത്തൊട്ടിലുകള്‍ ആരംഭിച്ചത്.