സുനന്ദപുഷ്‌കറിന്റെ ബ്ലാക്‌ബെറി ഫോണില്‍നിന്നും ട്വിറ്റര്‍ അക്കൗണ്ടില്‍നിന്നും നീക്കംചെയ്തിരുന്ന വിവരങ്ങള്‍ തിരികെ ലഭിച്ചതായി ഡല്‍ഹി പോലീസ് കമ്മീഷണര്‍ ബി.എസ് ബസ്സി അറിയിച്ചു. മുന്‍ കേന്ദ്രമന്ത്രി ശശി തരൂരിന്റെ ഭാര്യയായ സുനന്ദയുടെ മരണവുമായി ബന്ധപ്പെട്ട കേസ് അന്വേഷിക്കുന്ന ഡല്‍ഹി പോലീസിന്റെ പ്രത്യേകസംഘം ഈ വിവരങ്ങള്‍ പരിശോധിച്ചുവരികയാണ്. വിവരങ്ങള്‍ സ്വാഭാവികമായി ഇല്ലാതായതാണോ അതോ മനപ്പൂര്‍വം നീക്കം ചെയ്തതാണോ എന്നും പരിശോധിക്കുന്നുണ്ട്. എന്നാല്‍ അന്വേഷണത്തെ ഭയക്കുന്നില്ലെന്നും അന്വേഷണ സഘവുമായി സഹകരിക്കുമെന്നും ശശി തരൂര്‍ പറഞ്ഞു.സുനന്ദയുടേത് കൊലപാതകമാണെന്ന് വ്യക്തമാക്കുന്ന തെളിവുകളൊന്നും ഇതുവരെ ലഭിച്ചിട്ടില്ലെന്ന് ശശി തരൂര്‍ പറഞ്ഞു. സുനന്ദയുടെ കുടുംബം തന്നോടൊപ്പം നില്‍ക്കുന്നത് അതുകൊണ്ടാണെന്നും അദ്ദേഹം പറഞ്ഞു.
സുനന്ദയുടെ മരണവുമായി ബന്ധപ്പെട്ട് തരൂരിനെ പോലീസ് ചോദ്യം ചെയ്തിരുന്നു. തുടര്‍ന്നാണ് സുനന്ദയുടെ ലാപ്‌ടോപ്പും ഫോണും ഫൊറന്‍സിക് പരിശോധനയ്ക്ക് അയച്ചത്.
മൊബൈല്‍ഫോണ്‍ ഉള്‍പ്പെടെയുള്ള സുനന്ദയുടെ ഇലക്ട്രോണിക് ഉപകരണങ്ങള്‍ ഗുജറാത്തിലെ ഗാന്ധിനഗറിലുള്ള ഫൊറന്‍സിക് സയന്‍സ് ഡയറക്ടറേറ്റിലേക്ക് ഡല്‍ഹി പോലീസ് അയച്ചിരുന്നു. അവിടെ നിന്നുള്ള ഫൊറന്‍സിക് വിദഗ്ധരുടെ റിപ്പോര്‍ട്ട് ഒരാഴ്ചമുമ്പ് ലഭിച്ചതായി ബസ്സി പറഞ്ഞു.
2014 ജനവരി 17നാണ് സുനന്ദയെ (52) ഡല്‍ഹിയിലെ ലീല പാലസ് ഹോട്ടലില്‍ മരിച്ചനിലയില്‍ കണ്ടെത്തിയത്. ശശി തരൂരിന് പാക് മാധ്യമപ്രവര്‍ത്തക മെഹര്‍ തരാറുമായി ബന്ധമുണ്ടെന്ന് സുനന്ദ ആരോപിച്ചിരുന്നു. മെഹര്‍ തരാറിനെ ചോദ്യംചെയ്യാന്‍ പാക് ഹൈക്കമ്മീഷനെ ഡല്‍ഹി പോലീസ് സമീപിച്ചുവെന്ന വാര്‍ത്ത ബി.എസ് ബസ്സി തള്ളിയിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha