റബർ വില സംസ്ഥാന സർക്കാർ പ്രഖ്യാപിച്ച താങ്ങുവിലയായ 200 രൂപയും കവിഞ്ഞ് 210രൂപയിലേക്ക് കുതിച്ചു. റബർ ബോർഡ് വില 207രൂപയാണെങ്കിലും ലഭ്യത കുറഞ്ഞതോടെ വ്യവസായികൾ 210 രൂപയ്‌ക്ക് വരെ വാങ്ങി.

ഇതിനിടെ ബാങ്കോക്ക് വില 196 രൂപയിലേക്ക് താഴ്ന്നു. അന്താരാഷ്ട്ര വില മറികടന്ന് ആഭ്യന്തര വില ഉയരുന്നതിൽ കർഷകർ സന്തോഷത്തിലാണ്. എന്നാൽ കടുത്ത വേനലിൽ ടാപ്പിംഗ് നിലച്ചതിനാൽ വില വർദ്ധനയുടെ നേട്ടം കർഷകർക്ക് ലഭിക്കുന്നില്ല.

തായ്ലൻഡിലും വിയറ്റ്നാമിലും ഉത്പാദനം കുറയുന്നതിനാൽ റബർ ക്ഷാമം രൂക്ഷമാകാനാണ് സാധ്യത. ഈ സാഹചര്യം മറികടക്കാൻ ടയർ ലോബി ആഭ്യന്തര വില ഇടിക്കാൻ ശ്രമം നടത്തുകയാണ്.