അദാനി ഗ്രൂപ്പിനെതിരായ അപകീര്ത്തി പരാമര്ശം നടത്തിയ മാധ്യമപ്രവര്ത്തകന് ഒരു വര്ഷം തടവ്
അദാനി ഗ്രൂപ്പിനെതിരെ അപകീര്ത്തികരമായ പരാമര്ശങ്ങള് നടത്തിയെന്ന കേസില് സ്വതന്ത്ര മാധ്യമപ്രവര്ത്തകന് രവി നായര് കുറ്റക്കാരനാണെന്ന് കോടതി. അദാനി എന്റര്പ്രൈസസ് ലിമിറ്റഡ് നല്കിയ ക്രിമിനല് മാനനഷ്ടക്കേസിലാണ് ഗാന്ധിനഗറിലെ മന്സ മജിസ്ട്രേറ്റ് കോടതി ശിക്ഷ വിധിച്ചത്. ഒരു വര്ഷത്തെ തടവും പിഴയുമാണ് കോടതി ഉത്തരവിട്ടത്.
അദാനി ഗ്രൂപ്പിന്റെയും ഉപകമ്പനികളുടെയും സല്പ്പേരിന് കളങ്കമുണ്ടാക്കുന്ന തരത്തില് തെറ്റായ വിവരങ്ങള് എക്സില് പ്രചരിപ്പിച്ചു എന്നാണ് കമ്പനിയുടെ പരാതി. രവി നായര് പങ്കുവെച്ച ട്വീറ്റുകള് വസ്തുതാവിരുദ്ധമാണെന്നും, നിക്ഷേപകരുടെയും പൊതുജനങ്ങളുടെയും ഇടയില് കമ്പനിയുടെ വിശ്വാസ്യത തകര്ക്കാന് ബോധപൂര്വ്വം നടത്തിയ ശ്രമമാണെന്നും അദാനി ഗ്രൂപ്പ് കോടതിയില് വാദിച്ചു. ഇത് കേവലം വിമര്ശനമല്ല, മറിച്ച് ക്രിമിനല് ഗൂഢാലോചനയുടെ ഭാഗമാണെന്ന കമ്പനിയുടെ വാദം കോടതി അംഗീകരിക്കുകയായിരുന്നു.
ദീര്ഘകാലം നീണ്ടുനിന്ന വിചാരണക്കൊടുവിലാണ് രവി നായര്ക്കെതിരായ കുറ്റങ്ങള് തെളിയിക്കപ്പെട്ടതായി കോടതി നിരീക്ഷിച്ചത്. ക്രിമിനല് മാനനഷ്ടം തെളിഞ്ഞതോടെ ഒരു വര്ഷം തടവ് അനുഭവിക്കാന് കോടതി ഉത്തരവിട്ടു. പാലക്കാട് സ്വദേശിയായ രവി നായര് ഡല്ഹി കേന്ദ്രമായാണ് പ്രവര്ത്തനങ്ങള് നടത്തുന്നത്. റഫാല് ഇടപാടിലും അദാനി ഗ്രൂപ്പിനെതിരായ അന്വേഷണാത്മക റിപ്പോര്ട്ടുകളിലും അദ്ദേഹം നേരത്തെ സജീവമായിരുന്നു.
വിധിക്ക് പിന്നാലെ ഗാന്ധിനഗര് ജില്ലാ കോടതിയെ സമീപിക്കാനാണ് രവി നായരുടെ തീരുമാനം. താന് പങ്കുവെച്ചത് മറ്റ് പ്രമുഖ മാധ്യമങ്ങളില് നേരത്തെ വന്ന വാര്ത്തകള് മാത്രമാണെന്നും അത് ക്രിമിനല് കുറ്റമായി കാണാനാവില്ലെന്നുമാണ് അദ്ദേഹത്തിന്റെ നിലപാട്. കേസില് കൂടുതല് നിയമനടപടികളുമായി മുന്നോട്ട് പോകാനാണ് രവി നായരും അദ്ദേഹത്തിന്റെ അഭിഭാഷകരും തീരുമാനിച്ചിരിക്കുന്നത്.
https://www.facebook.com/Malayalivartha
