തമിഴ്‌നാട്ടില്‍ ഇന്നലെ 527 പോസിറ്റീവ് സ്ഥിരീകരിച്ചവരില്‍ വലിയൊരു വിഭാഗം കോയമ്‌ബേഡു മാര്‍ക്കറ്റുമായി ബന്ധപ്പെട്ടിരുന്നവരെന്ന് റിപ്പോര്‍ട്ട്. തമിഴ്‌നാട്ടിലെ നിരവധി ജില്ലകളിലായി വ്യാപിച്ചുകിടക്കുന്ന 7,500 പേര്‍ കൂടി മാര്‍ക്കറ്റില്‍ എത്തിയവരാണ്. അവരില്‍ ഭൂരിഭാഗവും മാര്‍ക്കറ്റിലെ തൊഴിലാളികളും പച്ചക്കറി വില്‍പ്പനക്കാരും ആണ്.

295 ഏക്കറില്‍ വ്യാപിച്ചുകിടക്കുന്ന കോയമ്‌ബേഡു മാര്‍ക്കറ്റ് മൂവായിരത്തിലധികം ഔറ്റ്‌ലേറ്റുകളാണ് ഉള്ളത്. അതില്‍ 200 ഓളം മാത്രമാണ് ഇപ്പോള്‍ പ്രവര്‍ത്തിക്കുന്നത്. ആഭ്യന്തര ഉപഭോക്താക്കള്‍ക്കായി അടുത്തിടെ കോയമ്‌ബേഡു മാര്‍ക്കറ്റ് അടച്ചതിനുശേഷം, ഈ തൊഴിലാളികളില്‍ പലരും ഉപജീവനമാര്‍ഗം നഷ്ടപ്പെടുകയും നാട്ടിലേക്ക് മടങ്ങുകയും ചെയ്തു. ഇതോടെ മറ്റിടങ്ങളിലേക്ക് അണുബാധ പടരുകയായിരുന്നു. ഈ 7,500 പേരുടെ എല്ലാ വിവരങ്ങളും പട്ടികയില്‍ ഉള്‍പ്പെടുത്തിയിട്ടുണ്ട്. ഇവരുടെയെല്ലാം സ്രവങ്ങള്‍ പരിശോധനയ്ക്കു വിധേയമാകുമെന്നു ഗ്രേറ്റര്‍ ചെന്നൈ കോര്‍പ്പറേഷന്‍ കമ്മീഷണര്‍ ജി പ്രകാശ് എന്‍ഡിടിവിയോട് പറഞ്ഞു.
ആദ്യത്തെ കേസ് റിപ്പോര്‍ട്ട് ചെയ്തയുടനെ മാര്‍ക്കറ്റ് അടച്ചുപൂട്ടിയിരുന്നെങ്കില്‍ ഇപ്പോഴുണ്ടായ വ്യാപനം ഒഴിവാക്കാമായിരുന്നെന്നു ആരോഗ്യ വിഭാഗം പറയുന്നു. ചെന്നൈയിലേക്കും മറ്റ് ജില്ലകളിലേക്കുമുള്ള പ്രധാന വിതരണ മാര്‍ഗമാണിത്. ഇത് ലക്ഷക്കണക്കിന് കര്‍ഷകരുടെ ഉപജീവന മാര്‍ഗ്ഗമാണ്. അതിനാലാണ് ഞങ്ങള്‍ക്ക് വിപണി അടച്ചുപൂട്ടാന്‍ കഴിയാത്തതെന്നു പ്രകാശ് പറഞ്ഞു. ചൊവ്വാഴ്ച രാവിലെ കേന്ദ്ര ആരോഗ്യ മന്ത്രാലയത്തിന്റെ കണക്കുകള്‍ പ്രകാരം 31 മരണങ്ങള്‍ ഉള്‍പ്പെടെ 3,550 കൊറോണ വൈറസ് കേസുകള്‍ തമിഴ്‌നാട്ടില്‍ റിപ്പോര്‍ട്ട് ചെയ്തിട്ടുണ്ട്. . ദ്രുതഗതിയില്‍ പരിശോധനയാണ് കഴിഞ്ഞയാഴ്ച സംസ്ഥാനത്ത് നടന്നത്. ഇതോടെയാണ് കേസുകളുടെ എണ്ണം കുത്തനെ ഉയര്‍ന്നതെന്ന് തമിഴ്‌നാട് ദുരിതാശ്വാസ കമ്മീഷണറും ചെന്നൈ കോര്‍പ്പറേഷന്റെ സ്‌പെഷ്യല്‍ നോഡല്‍ ഓഫീസറുമായ ഡോ. ജെ. രാധാകൃഷ്ണന്‍ പറഞ്ഞു.