ചവറ, കുട്ടനാട് നിയമസഭാ മണ്ഡലങ്ങളിലെ നിയമസഭാ ഉപതിരഞ്ഞെടുപ്പ് നവംബറില്‍ നടക്കുന്നതിനുള്ള സാധ്യത തെളിഞ്ഞു. ബിഹാര്‍ നിയമസഭാ തിരഞ്ഞെടുപ്പിനൊപ്പം ഇന്ത്യയിലെ 64 നിയമസഭകളില്‍ ഉപതിരഞ്ഞെടുപ്പ് നടത്തനാണ് തിരഞ്ഞെടുപ്പ് കമ്മീഷന്റെ തീരുമാനം. ബിഹാര്‍ തിരഞ്ഞെടുപ്പ് നവംബര്‍ 29ന് മുമ്പേ നടത്തനാണ് തിരഞ്ഞെടുപ്പ് കമ്മീഷന്‍ തീരുമാനിച്ചിരിക്കുന്നത്. ഉപതിരഞ്ഞെടുപ്പുകളുടെ തീയതി കമ്മീഷന്‍ പിന്നീട് തീരുമാനിക്കും.കോവിഡ് വ്യാപനത്തിന്‍രെ പശ്ചാത്തലത്തിലും തിരഞ്ഞെടുപ്പ് നടത്തുന്നതിന് പൂര്‍ണ സജ്ജമാണെന്ന് മുഖ്യ തെരഞ്ഞെടുപ്പ് കമ്മീഷ്ണര്‍ സുനില്‍ അറോറ പറഞ്ഞു.

ജൂലൈയില്‍ രാജ്യത്തെ ലോക്‌സഭാ, നിയമസഭാ ഉപതെരഞ്ഞെടുപ്പുകള്‍ മാറ്റിവെച്ചതായി തെരഞ്ഞെടുപ്പ് കമ്മീഷന്‍ അറിയിച്ചിരുന്നു. ഇതിനാണ് ഇപ്പോള്‍ മാറ്റമുണ്ടായിരിക്കുന്നത്. കോവിഡ് വ്യാപനത്തിന്റെ സാഹര്യത്തില്‍ തെരഞ്ഞെടുപ്പ് നടത്താന്‍ കഴിയില്ലെന്നാണ് അന്ന് തെരഞ്ഞെടുപ്പ് കമ്മീഷന്‍ യോഗത്തിലെ വിലയിരുത്തത്. സെപ്തംബര്‍ ഒമ്പതിനകം നടക്കേണ്ട തെരഞ്ഞെടുപ്പുകള്‍ എല്ലാം മാറ്റി വയ്ക്കാനാണ് തീരുമാനിച്ചത്. ആറ് മാസത്തില്‍ കൂടുതല്‍ കാലം ഒരു മണ്ഡലം ഒഴിച്ചിടരുതെന്നാണ് നിലവില്‍ നിയമം. ചവറയില്‍ നിയമപ്രകാരം സപ്തംബര്‍ ഏഴിനകം ഒഴിവ് നികത്തേണ്ടതുണ്ട്. എന്നാല്‍ നിയമ പ്രകാരമുള്ള ബാധ്യത നിറവേറ്റാനാവില്ലെന്ന് കമ്മീഷന്‍ വിലയിരുത്തി. കേന്ദ്രസര്‍ക്കാരും ഇതിനോട് യോജിച്ചിരുന്നു. തെരഞ്ഞെടുപ്പ് സാഹചര്യം അനുകൂലമാകുമ്പോള്‍ നടത്തുകയോ റദ്ദാക്കേണ്ടതുണ്ടെങ്കില്‍ അപ്പോള്‍ ആലോചിക്കാം എന്നുമാണ് അന്ന് ധാരണയാത്. കോവിഡ് വ്യാപനത്തിന്റെ പശ്ചാത്തലത്തില്‍ കര്‍ശന കോവിഡ് മാനദണ്ഡങ്ങള്‍ പാലിച്ചായിരിക്കും തിരഞ്ഞെടുപ്പുകള്‍ നടക്കുക. അധിക ഇ.വി.എം മെഷിനുകളും വിവിപാറ്റ് കളും അനുവദിക്കും. വോട്ടര്‍മാരുടെ ആരോഗ്യ സുരക്ഷക്ക് വേണ്ട മുന്‍ കരുതലും തിരഞ്ഞെടുപ്പ് കമ്മീഷന്‍ സ്വീകരികരിക്കുമെന്നും മുഖ്യ തെരഞ്ഞെടുപ്പ് കമ്മീഷന്‍ ഒരു ദേശീയ മാധ്യമത്തിന് നല്‍കിയ അഭിമുഖത്തില്‍ പറഞ്ഞു.

തോമസ് ചാണ്ടി, എന്‍. വിജയന്‍ പിള്ള എന്നിവരുടെ നിര്യാണത്തെ തുടര്‍ന്നാണ് കുട്ടനാട്, ചവറ മണ്ഡലങ്ങളില്‍ ഉപതെരഞ്ഞെടുപ്പുകള്‍ നടത്തേണ്ട സാഹചര്യമുണ്ടായത്. 2016 മെയില്‍ അധികാരമേറ്റ പിണറായി വിജയന്‍ സര്‍ക്കാരിന്റെ കാലാവധി 2021 മെയ് മാസത്തിലാകും അവസാനിക്കുക. നിയമസഭയുടെ കാലാവധി അവസാനിക്കാന്‍ ഒരു വര്‍ഷത്തില്‍ താഴെ മാത്രമുള്ള സമയത്ത് ഏതെങ്കിലും സീറ്റ് ഒഴിവ് വന്നാല്‍ അവിടെ പിന്നെ ഉപതെരഞ്ഞെടുപ്പ് നടത്തേണ്ടതില്ലെന്ന എന്ന തീരുമാനമെടുക്കാമെന്നും തെരഞ്ഞെടുപ്പ് കമ്മീഷന്‍ ചട്ടത്തിലുണ്ട്.