ഒടുവില്‍ എല്ലാ പൂജകള്‍ക്കും ഫലം കണ്ടു. ശ്രീപത്മനാഭ സ്വാമിയെ കാണാന്‍ തമിഴ്‌നാട് മുന്‍ മുഖ്യമന്ത്രി ജയലളിത നേരിട്ടെത്തുമെന്ന് ഉറപ്പായി. അനധികൃത സ്വത്തു സമ്പാദനക്കേസില്‍ ജയലളിതയെ ശിക്ഷിച്ച കീഴ്‌കോടതി വിധി റദ്ദാക്കണമെന്ന് ആവശ്യപ്പെട്ട് തമിഴ്‌നാട് മുഴുവനും പ്രാര്‍ത്ഥനയിലും വഴിപാടിലുമായിരുന്നു. തമിഴ് ജനത വഴിപ്പാട് ചെയ്തതു വെറുതെയായില്ല. അതിന് ഫലം കണ്ടു. പത്മനാഭ സ്വാമി ക്ഷേത്രത്തിലും തലൈവിക്ക് പ്രത്യേക പൂജകള്‍ നടന്നു. വിധി അനുകൂലമായതോടെ ശ്രീപത്മനാഭനെ കാണാന്‍ എത്തിയേപറ്റുകയുള്ളൂവെന്ന് തലൈവി തീരുമാനിക്കുകയായിരുന്നു.
മുഖ്യമന്ത്രിയായി സത്യപ്രതിജ്ഞ ചെയ്ത ശേഷം മാത്രമായിരിക്കും ക്ഷേത്രത്തില്‍ സന്ദര്‍ശനം നടത്തുക. സന്‍ര്‍ശന തീയതി പിന്നീട് അറിയിക്കുമെന്നാണ് അറിയുന്നത്. എ.ഐ.ഡി.എം.കെ ആസ്ഥാനത്തു നിന്ന് ഇന്നലെ ക്ഷേത്രം പി.ആര്‍ ഒ യെ ബന്ധപ്പെട്ടാണ് ഇക്കാര്യമറിയിച്ചത്. കാഞ്ചി കാമകോടി മഠാധിപതി ജയേന്ദ്രസരസ്വതി ഇന്നലെ രാവിലെ ശ്രീപത്മനാഭസ്വാമി ക്ഷേത്രത്തില്‍ ദര്‍ശനത്തിനെത്തി. രാവിലെ 10 മണിയോടെ ക്ഷേത്രത്തിലെത്തിയ അദ്ദേഹത്തെ ക്ഷേത്ര ഭരണ സമിതി ഭാരവാഹികള്‍ ചേര്‍ന്നു സ്വീകരിച്ചു.
ദര്‍ശനത്തിന് ശേഷം നഗരത്തില്‍ മറ്റു ചില ചടങ്ങുകളിലും അദ്ദേഹം പങ്കെടുത്തു. വ്യോമസേനാ മേധാവി എയര്‍ ചീഫ് മാര്‍ഷല്‍ അരൂപ് റാഹയും ഇന്നലെ വൈകിട്ട് പത്‌നിക്കൊപ്പം ക്ഷേത്രദര്‍ശനത്തിനെത്തി. ദക്ഷിണ മേഖലാ വ്യോസേനാ ആസ്ഥാനത്ത് ഔദ്യോഗിക സന്ദര്‍ശനത്തിനെത്തിയതായിരുന്നു എയര്‍ ചീഫ് മാര്‍ഷല്‍. ജയലളിതയുടെ വിധിക്കെതിരെ കരുണാനിധി രംഗത്തെത്തിയിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha