രാജ്യതലസ്ഥനത്ത് കോവിഡ്​ രോഗികളുടെ എണ്ണത്തില്‍ വന്‍ വര്‍ധന രേഖപ്പെടുത്തുന്നതിനിടെ പ്രതികരണവുമായി ഡല്‍ഹി മുഖ്യമന്ത്രി അരവിന്ദ്​​ കെജ്​രിവാള്‍ രംഗത്ത് .ഡല്‍ഹിയില്‍ കോവിഡിന്റെ മൂന്നാം വ്യാപനമുണ്ടായെന്ന്​ മുഖ്യമന്ത്രി കെജ്​രിവാള്‍ പ്രതികരിച്ചു.

ഡല്‍ഹിയില്‍ കോവിഡ്​ രോഗികളുടെ എണ്ണം വര്‍ധിക്കുകയാണ്​. ഇത്​ മൂന്നാം വ്യാപനമാണെന്നാണ്​ ഞങ്ങള്‍ കരുതുന്നത്​. സ്ഥിതി സസൂക്ഷ്​മം നിരീക്ഷിക്കുകയാണ്​. ആശങ്കപ്പെടേണ്ട കാര്യമില്ല. ആവശ്യമായ നടപടികള്‍ സ്വീകരിക്കുമെന്ന്​ കെജ്​രിവാള്‍ പറഞ്ഞു.

ഡല്‍ഹിയില്‍ പ്രതിദിന കോവിഡ്​ രോഗികളുടെ എണ്ണം 6,000 കടന്നിരുന്നു. ചൊവ്വാഴ്​ചയാണ്​ രോഗികളുടെ എണ്ണം വീണ്ടും 6,000 കടന്നത്​. കഴിഞ്ഞ അഞ്ച്​ ദിവസവും 5,000ലധികം കോവിഡ്​ കേസുകള്‍ ഡല്‍ഹിയില്‍ റി​പ്പോര്‍ട്ട്​ ചെയ്​തിരുന്നു.
കോവിഡ്​ രോഗികള്‍ക്ക്​ ആവശ്യമായ കിടക്കകള്‍ ഡല്‍ഹിയിലുണ്ട്​. ഐ.സി.യു ബെഡുകളുടേയും വെന്‍റിലേറ്ററുകളുടേയും ക്ഷാമമാണ്​ അനുഭവപ്പെടുന്നത്​. സ്വകാര്യആശുപത്രികളുമായി ബന്ധപ്പെട്ട്​ ഇത്​ പരിഹരിക്കാനുള്ള നടപടികള്‍ തുടങ്ങിയെന്ന്​ കെജ്​രിവാള്‍ പറഞ്ഞു.