മുന്‍ സി.ബി.ഐ ഡയറക്ടര്‍ രഞ്ജിത് സിന്‍ഹയ്‌ക്കെതിരെ നിയമ നടപടി വേണമെന്ന് സുപ്രീം കോടതി. നിര്‍ണായക കേസുകളില്‍ അന്വേഷണം പുരോഗമിക്കവേ സി.ബി.ഐയുടെ തലപ്പത്തിരുന്ന സിന്‍ഹ നടത്തിയ ചില അനുചിത കൂടിക്കാഴ്ചകള്‍ അധികാരത്തിന്റെ ദുര്‍വിനിയോഗമാണെന്നും അതില്‍ അന്വേഷണം വേണമെന്നും കോടതി വ്യക്തമാക്കി. കല്‍ക്കരി പാടം ഇടപാട് കേസില്‍ രഞ്ജിത് സിന്‍ഹയുടെ നിലപാട് പരിശോധിക്കണമെന്ന് ആവശ്യപെപട്ട് സമര്‍പ്പിച്ച ഹര്‍ജിയിലാണ് കോടതി കൂടുതല്‍ അന്വേഷണം വേണമെന്ന് നിര്‍ദേശിച്ചത്.

ജസ്റ്റീസ് മദന്‍ ബി. ലോകൂര്‍ അധ്യക്ഷനായ ബെഞ്ചിന്റെതാണ് ഉത്തരവ്. അന്വേഷണത്തില്‍ കേന്ദ്ര വിജലന്‍സ് കമ്മിഷന്റെ സഹായം തേടണം. അന്വേഷണം സംബന്ധിച്ച് വിജിലന്‍സ് കമ്മിഷന്‍ ജൂലൈ ആറിനകം റിപ്പോര്‍ട്ട് സമര്‍പ്പിക്കണമെന്നും കോടതി നിര്‍ദേശിച്ചു. സിന്‍ഹയ്‌ക്കെതിരെ പ്രത്യേക സംഘത്തിന്റെ അന്വേഷണം വേണമെന്ന ആവശ്യപ്പെട്ട പ്രമുഖ അഭിഭാഷകനായ പ്രശാന്ത് ഭൂഷണ്‍ സമര്‍പ്പിച്ച ഹര്‍ജിയിലാണ് കോടതിയുടെ ഉത്തരവ്.

കഴിഞ്ഞ വര്‍ഷം ഡിസംബറിലാണ് സിന്‍ഹ വിരമിച്ചത്. ഇതിന് ഏതാനും ആഴ്ചകള്‍ക്കു മുന്‍പാണ് സിന്‍ഹ നടത്തിയ ചില കൂടിക്കാഴ്ചകള്‍ വിവാദമായത്. സ്‌പെക്ട്രം കേസില്‍ സി.ബി.ഐ അന്വേഷണം പുരോഗമിക്കുന്നതിനിടെ കേസിലുള്‍പ്പെട്ട ടെലികോം കമ്പനി പ്രതിനിധികളുമായി സിന്‍ഹ സ്വവസതിയില്‍ കൂടിക്കാഴ്ച നടത്തിയത് തെളിവു സഹിതം കോടതിയില്‍ എത്തിയിരുന്നു. ഇതേതുടര്‍ന്ന് അന്വേഷണ ചുമതലയില്‍ നിന്ന് സിന്‍ഹയെ കോടതി നീക്കുകയും ചെയ്തിരുന്നു.

ടെലികോം, കല്‍ക്കരി കേസുകളില്‍ ഉള്‍പ്പെട്ട കമ്പനി പ്രതിനിധികളുമായി സിന്‍ഹ വസതിയില്‍ കൂടിക്കാഴ്ച നടത്തിയതായ ഭൂഷണ്‍ നേരത്തെ കോടതിയില്‍ വ്യക്തമാക്കിയിരുന്നു. ഇതിനു തെളിവായി സന്ദര്‍ശക ഡയറിയും സിന്‍ഹയുടെ ഫോണ്‍ കോള്‍ രേഖകളും കോടതിയില്‍ സമര്‍പ്പിച്ചിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha