ആവിഷ്‌കാര സ്വാതന്ത്ര്യത്തിനു പരിധിയുണ്ടെന്ന് സുപ്രീംകോടതി. ഭരണഘടന അനുസരിച്ചുമാത്രമേ ആവിഷ്‌കാര സ്വാതന്ത്ര്യം അനുവദിക്കാന്‍ കഴിയൂ. ആവിഷ്‌കാര സ്വാതന്ത്ര്യത്തിന്റെ പേരില്‍ ഗാന്ധിജി ഉള്‍പ്പെടെയുള്ള ചരിത്ര പുരുഷന്മാരെ അവഹേളിക്കുന്നത് അംഗീകരിക്കാന്‍ കഴിയില്ലെന്ന് സുപ്രീംകോടതി വ്യക്തമാക്കി.ഗാന്ധിജിയെ അവഹേളിച്ചുകൊണ്ട് കവിതയെഴുതിയ മറാത്തി കവി വസന്ത ദത്താത്രേയക്കും പ്രസാധകര്‍ക്കുമെതിരായ കേസ് റദ്ദാക്കണമെന്നാവശ്യപ്പെട്ട് സമര്‍പ്പിച്ച ഹര്‍ജി തീര്‍പ്പാക്കിക്കൊണ്ടാണ് സുപ്രീംകോടതി നിര്‍ണായക നിരീക്ഷണങ്ങള്‍ നടത്തിയത്. ആവിഷ്‌കാര സ്വാതന്ത്ര്യം ആരെയും അപമാനിക്കാനുള്ള ലൈസന്‍സ് അല്ലെന്ന് ജസ്റ്റിസ് ദീപക് മിശ്ര അധ്യക്ഷനായ ബെഞ്ച് നിരീക്ഷിച്ചു.
സാഹിത്യകാരന്മാരുടെ ആവിഷ്‌കാര സ്വാതന്ത്ര്യത്തെ മാനിക്കുമ്പോള്‍ തന്നെ അത് അതിരുവിടില്ലെന്ന് ഉറപ്പാക്കണം. ഇക്കാര്യത്തില്‍ സമൂഹ മനഃസാക്ഷിയുടെ നിലപാടു കൂടി കണക്കിലെടുക്കേണ്ടതുണ്ട്. നിങ്ങളുടെ അഭിപ്രായങ്ങളോട് യോജിപ്പില്ലെങ്കിലും അത് പ്രകടിപ്പിക്കാനുള്ള അവകാശത്തിനുവേണ്ടി മരിക്കാന്‍ വരെ തയാറാകുമെന്ന വോള്‍ട്ടയറുടെ വാക്കുകളും കോടതി വിധിന്യായത്തില്‍ ഉദ്ധരിച്ചു. ആവിഷ്‌കാര സ്വാതന്ത്ര്യത്തിന്റെ മറവില്‍ ചരിത്രപുരുഷന്മാരെ അശ്ലീല രീതിയില്‍ ചിത്രീകരിക്കുന്നത് അംഗീകരിക്കാനാവില്ലെന്ന് കോടതി വ്യക്തമാക്കി.

മഹാത്മാഗാന്ധിയുടെ ജീവിതത്തെ വിമര്‍ശനാത്മകമായി അപഗ്രഥിക്കുന്ന ഒട്ടേറെ പുസ്തകങ്ങള്‍ ഇറങ്ങിയിട്ടുണ്ട്. എന്നാല്‍ കേസിനാസ്പദമായ മറാത്തി കവിത ആ ഗണത്തില്‍ വരുന്നതല്ല. കവിതയിലെ ചില വാക്കുകള്‍ വിധിന്യായത്തില്‍ പരാമര്‍ശിക്കാന്‍ പോലും നിലവാരമില്ലാത്തതാണെന്നും കോടതി നിരീക്ഷിച്ചു. കവിതയെഴുതാനിടയായ സാഹചര്യവും വിശദീകരണങ്ങളും കവിക്ക് വിചാരണക്കോടതിക്കു മുന്നില്‍ അറിയിക്കാമെന്ന് കോടതി വ്യക്തമാക്കി. കവിത പ്രസിദ്ധീകരിച്ച് അടുത്ത ലക്കത്തില്‍ തന്നെ നിരുപാധികം മാപ്പു പറഞ്ഞതിനാല്‍ പ്രസാധകരെ കോടതി കേസില്‍ നിന്ന് ഒഴിവാക്കി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha