മാധ്യമങ്ങള്‍ക്കെതിരെ ഡല്‍ഹിയിലെ എ.എ.പി സര്‍ക്കാര്‍ ഇറക്കിയ സര്‍ക്കുലര്‍ സുപ്രീംകോടതി റദ്ദാക്കി. മുഖ്യമന്ത്രി അരവിന്ദ് കെജ്‌രിവാളിനെയോ മന്ത്രിസഭയെയോ ഉദ്യോഗസ്ഥരെയോ അപമാനിക്കുന്ന വാര്‍ത്തകള്‍ പ്രസിദ്ധീകരിക്കുന്ന മാധ്യമങ്ങള്‍ക്കെതിരെ അപകീര്‍ത്തിക്കേസ് ഫയല്‍ ചെയ്യണമെന്നുള്ളതാണ് സര്‍ക്കുലര്‍. ഇതിനെതിരെ അഭിഭാഷകനായ അമിത് സിബല്‍ നല്‍കിയ ഹരജിയിലാണ് കോടതി നടപടി.
സര്‍ക്കുലറുമായി ബന്ധപ്പെട്ട് മുഖ്യമന്ത്രി അരവിന്ദ് കെജ് രിവാളിന്റെ നിലപാട് സുപ്രീംകോടതി ആരാഞ്ഞു. ആറ് ആഴ്ചക്കുള്ളില്‍ കെജ് രിവാള്‍ വിശദീകരണം നല്‍കണം. വിഷയത്തില്‍ കെജ് രിവാളിന് ഇരട്ടത്താപ്പാണോ എന്ന് കോടതി ചോദിച്ചു. മുമ്പ് കെജ് രിവാളിനെതിരെ അപകീര്‍ത്തി കേസുണ്ടായപ്പോള്‍ അദ്ദേഹം കോടതിയെ സമീപിച്ചു. എന്നാല്‍ ഇപ്പോള്‍ മാധ്യമങ്ങള്‍ക്കെതിരെ കെജ് രിവാള്‍ അപകീര്‍ത്തിക്കേസിന് ശ്രമിക്കുന്നുവെന്നും കോടതി വിമര്‍ശിച്ചു.

ഡല്‍ഹി സര്‍ക്കാറിന്റെ ഇന്‍ഫര്‍മേഷന്‍ ആന്‍ഡ് പബ്‌ളിസിറ്റി ഡിപാര്‍ട്ട്‌മെന്റാണ് ഈ മാസം ആറിന് സര്‍ക്കുലര്‍ ഇറക്കിയത്. ഡല്‍ഹി സര്‍ക്കാറുമായി ഔദ്യോഗികമായി ബന്ധപ്പെട്ട ഉദ്യോഗസ്ഥരടക്കമുള്ളവര്‍ക്കെതിരെ അപമാനിക്കുന്ന തരത്തില്‍ ഏതെങ്കിലും വാര്‍ത്തകള്‍ മാധ്യമങ്ങള്‍ നല്‍കുകയാണെങ്കില്‍ പ്രിന്‍സിപ്പല്‍ സെക്രട്ടറിക്ക് പരാതി നല്‍കാമെന്നാണ് സര്‍ക്കുലര്‍. പ്രൊസിക്യൂഷന്‍ ഡയറക്ടറുടെ അനുമതിക്കും നിയമവകുപ്പിന്റെ അംഗീകാരത്തിനും ശേഷം മാധ്യമങ്ങള്‍ക്കെതിരെ കേസെടുക്കാമെന്നും സര്‍ക്കുലറില്‍ പറയുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha