ആഴ്ച്ചകള്ക്കുള്ളില് വാക്സിന് വിതരണം ചെയ്യുമെന്ന് പ്രധാനമന്ത്രി; ഇനി ലഭിക്കേണ്ടത് ഗവേഷകരുടെ അനുമതി; വില സംബന്ധിച്ച് ചര്ച്ചകള് പുരോഗമിക്കുന്നു; വാക്സിനേഷന് സംവിധാനത്തില് ലോകത്തിലെ തന്നെ ഏറ്റവും വലിയതും കാര്യക്ഷമവുമായ നെറ്റ് വര്ക്ക് ഇന്ത്യയില്
രാജ്യം കാത്തിയിരുന്ന പ്രഖ്യാപനവുമായി പ്രധാനമന്ത്രി നരേന്ദ്രമോദി രംഗത്ത്. കോവിഡിനെതിരെയുള്ള വാക്സിന് ഏതാനും ആഴ്ചകള്ക്കുള്ളില് വിതരണത്തിനായി തയ്യാറാവുമെന്ന് പ്രധാനമന്ത്രി രാജ്യത്തിന് ഇന്ന് ഉറപ്പു നല്കി. വാക്സിന് വില സംബന്ധിച്ച് സംസ്ഥാന സര്ക്കാരുകളുമായി കേന്ദ്രത്തിന്റെ ചര്ച്ച തുടരുകയാണെന്നും പ്രധാനമന്ത്രി നരേന്ദ്രമോദി സര്വകക്ഷി യോഗത്തില് പറഞ്ഞു.
വാക്സിന് വിതരണവുമായി ബന്ധപ്പെട്ട് കേന്ദ്ര-സംസ്ഥാന സര്ക്കാരുകള് ചേര്ന്നു പ്രവര്ത്തിക്കുകയാണെന്ന് അദ്ദേഹം യോഗത്തില് വ്യക്തമാക്കി. സംസ്ഥാന സര്ക്കാരുകളുടെ സഹായത്തോടെ വാക്സിന് സംഭരണത്തിനുള്ള സംവിധാനങ്ങള് പരിശോധിച്ചുവരികയാണ്. ഗവേഷകരില് നിന്ന് അനുമതി ലഭിച്ചാല് ഇന്ത്യയില് കോവിഡ് വാക്സിനേഷന് ആരംഭിക്കും. ആരോഗ്യപ്രവര്ത്തകര്, കോവിഡ് പ്രതിരോധപ്രവര്ത്തകര്, മറ്റ് രോഗങ്ങളാല് പ്രയാസമനുഭവിക്കുന്ന വയോജനങ്ങള് എന്നിവര്ക്കാവും ആദ്യഘട്ടത്തില് വാക്സിന് വിതരണം ചെയ്യുക. വാക്സിനേഷന് സംവിധാനത്തില് ലോകത്തിലെ തന്നെ ഏറ്റവും വലിയതും കാര്യക്ഷമവുമായ നെറ്റ്വര്ക്കാണ് ഇന്ത്യക്കുള്ളത്. ഇത് പൂര്ണമായും പ്രയോജനപ്പെടുത്തുമെന്നും പ്രധാനമന്ത്രി പറഞ്ഞു.
വിജയകരമായ ഒരു വാക്സിന് ഉടന് പുറത്തിറക്കാനാവുമെന്ന ആത്മവിശ്വാസത്തിലാണ് ഇന്ത്യയിലെ ഗവേഷകര്. ഏറ്റവും സുരക്ഷിതമായ വാക്സിന് മിതമായ നിരക്കില് നല്കാനാണ് ലോകരാജ്യങ്ങള് ശ്രമിക്കുന്നത്. ഇത് ലഭ്യമാക്കും എന്നതിനാലാണ് ലോകം ഇന്ത്യയെ നിരന്തരം നിരീക്ഷിക്കുന്നത്. എട്ടോളം വാക്സിനുകള് ഇന്ത്യയില് നിര്മിക്കുമെന്ന് ഉറപ്പ് ലഭിച്ചിട്ടുണ്ട്. ഇന്ത്യയില് നിന്നുള്ള മൂന്ന് വാക്സിനുകള് പരീക്ഷണത്തിന്റെ വിവിധ ഘട്ടങ്ങളിലാണുള്ളതെന്ന് പ്രധാനമന്ത്രി വ്യക്തമാക്കി. പ്രധാനമന്ത്രിയുടെ അധ്യക്ഷതയില് നടക്കുന്ന സര്വകക്ഷി യോഗത്തില് പ്രമുഖ രാഷ്ട്രീയ പാര്ട്ടികളുടെ പന്ത്രണ്ട് നേതാക്കളാണ് പങ്കെടുത്തത്. വാക്സിന് വിതരണം സംബന്ധിച്ച നിര്ദേശങ്ങള് എഴുതി തയ്യാറാക്കി നല്കാനും പ്രധാനമന്ത്രി നിര്ദേശിച്ചിട്ടുണ്ട്.
സാരണക്കാര്ക്ക് ലഭ്യമാകുന്ന തരത്തില് വാക്സിന് വിതരണം നടത്തണമെന്ന് പ്രതിപക്ഷ പാര്ട്ടികള് യോഗത്തില് ആവശ്യപ്പെട്ടു. എന്ന് കോവിഡ് സൗജനമായി നല്കുമെന്ന് സര്ക്കാര് യോഗത്തില് വ്യകത്മാക്കുമെന്ന് പ്രതീക്ഷിക്കുന്നുവെന്ന് യോഗത്തിന് മുന്പ് രാഹുല്ഗാന്ധി ട്വീറ്റ് ചെയ്തു. സര്വകക്ഷി യോഗത്തില് കേന്ദ്രമന്ത്രിമാരായ അമിത് ഷാ, രാജ് നാഥ് സിങ്,ഹര്ഷവര്ധന് എന്നിവരും പങ്കെടുത്തു.
നേരത്തെ കോവിഡ് വാക്സിന് എല്ലാവര്ക്കും നല്കുമെന്ന പ്രധാനമന്ത്രിയുടെ വാഗ്ദാനം ആരോഗ്യ വകുപ്പ് തിരിത്തിയിരുന്നു. വാക്സീന് എല്ലാവര്ക്കും നല്കേണ്ടതില്ലെന്ന ലോകാരോഗ്യ സംഘടനയുടെ മാനദണ്ഡം ചൂണ്ടിക്കാട്ടിയാണ് കേന്ദ്ര ആരോഗ്യമന്ത്രാലയം പുതിയ നിലപാട് സ്വീകരിച്ചത്. ഇതിനെതിരെ വ്യാപക പ്രതിഷേധമാണ് ഉയര്ന്ന്. വാക്സിന് എല്ലാവര്ക്കും ലഭിക്കുമോ ഇല്ലയോ എന്ന കാര്യം പ്രധാനമന്ത്രി വ്യക്തമായി പറയണമെന്ന് രാഹുല് ഗാന്ധി ആവശ്യപ്പെടുകയും ചെയ്തു.
നിലവില് ഓക്സ്ഫഡിന്റെ കോവിഷീല്ഡ് വാക്സിനും റഷ്യയുടെ സ്പുട്നിക് വിയും സെറം ഇന്സ്റ്റിറ്റ്യൂട്ടിന്റെ ക്ലിനിക്കല് ട്രയല് ഘട്ടത്തിലാണ്. ഇന്ത്യയിലെ കോവിഡ് വാക്സിനുകളുടെ പരീക്ഷണം അന്തിമ ഘട്ടത്തിലാണെന്ന് നേരത്തെ തന്നെ ഡല്ഹി എയിംസ് ഡയറക്ടര് ഡോ. രണ്ദീപ് ഗുലേറിയ അറിയിച്ചിയിരുന്നു. ഡിസംബര് അവസാനമോ ജനുവരി ആദ്യമോ ഇതില് ഏതെങ്കിലും വാക്സിന് അധികൃതരുടെ അടിയന്തര അംഗീകാരം ലഭിക്കുമെന്നാണ് പ്രതീക്ഷിക്കുന്നതെന്നും അദ്ദേഹം പറഞ്ഞു. പരീക്ഷണം നടക്കുന്ന വാക്സിനുകള് സുരക്ഷിതവും കാര്യക്ഷമവുമാണെന്ന കാര്യത്തില് നിലവില് ആവശ്യത്തിന് തെളിവുകള് ലഭ്യമാണ്. രാജ്യത്തെ എണ്പതിനായിരത്തോളം പേരില് വാക്സിന് പരീക്ഷണം നടത്തിയിട്ടുണ്ട്. ആരിലും ഗുരുതരമായ പാര്ശ്വഫലങ്ങളൊന്നും കാണാന് സാധിച്ചില്ലെന്നും രണ്ദീപ് ഗുലേറിയ കൂട്ടിചേര്ത്തു.
https://www.facebook.com/Malayalivartha