ഈ ആര്‍മിക്കാര്‍ക്ക് ബിഗ് സല്യൂട്ട് ...ഭാരതാംബയ്ക്ക് കാവലായി നിൽക്കുന്ന സൈനികർ അമ്മയാകാൻ പോകുന്ന സ്ത്രീയ്ക്ക് പ്രതികൂല കാലാവസ്ഥയിലും സംരക്ഷണമൊരുക്കിയ വീഡിയോ ആണ് ഇപ്പോൾ സമൂഹ മാധ്യമങ്ങളിൽ നിറയുന്നത് .. അരയോളം പൊക്കത്തില്‍ മഞ്ഞുപുതഞ്ഞ വഴിയിലൂടെ പൂര്‍ണഗര്‍ഭിണിയെ ചുമലിലേറ്റി സൈനികര്‍ രണ്ട് കിലോമീറ്ററോളം നടന്നു ആശുപത്രിയിലാക്കി

കനത്ത മഞ്ഞില്‍ റോഡാകെ മഞ്ഞ് വീണ് മൂടിയതോടെ വാഹന സൗകര്യം ഇല്ലാതായി. ഇതോടെ മുട്ടോളം മഞ്ഞ് ഉണ്ടായിരുന്നിട്ടും രണ്ട് കിലോമീറ്ററോളം ഗർഭിണിയേയും ചുമന്ന് നടന്ന് സൈനികർ ആശുപത്രിയിലെത്തിക്കുകയായിരുന്നു . ചൊവ്വാഴ്ച രാത്രിയാണ് സംഭവം.

കുപ്‌വാരയിലെ കരൽപുരയിലുള്ള സൈനികരെ തേടി വടക്കൻ കശ്മീരിലെ ടാങ്മാർഹ് പ്രദേശത്തെ ഗ്രാമത്തിൽ നിന്നാണ് ഫോൺ കോൾ എത്തുന്നത്. പ്രദേശത്ത് മഞ്ഞു വീഴ്ച രൂക്ഷമാണെന്നും പ്രസവ വേദന തുടങ്ങിയ തന്റെ ഭാര്യയെ ആശുപത്രിയിലെത്തിക്കണമെന്നും അഭ്യർത്ഥിച്ചാണ് ഭർത്താവ് സൈനികരെ വിളിക്കുന്നത്.

ഉടൻ തന്നെ ഒരു ആരോഗ്യ പ്രവർത്തകനേയും കൂട്ടി സൈനികർ ഇവരുടെ അടുത്തേക്ക് എത്തുകയായിരുന്നു. സൈനിക ക്യാമ്പിൽ നിന്ന് ഏകദേശം അഞ്ച് കിലോമീറ്ററോളം സഞ്ചരിച്ചാണ് ഇവർ വീട്ടിലെത്തിയത്.

പ്രാഥമിക പരിശോധനയ്ക്ക് ശേഷം യുവതിയെ സ്‌ട്രെച്ചറിൽ കിടത്തി രണ്ട് കിലോമീറ്ററോളം മഞ്ഞിലൂടെ നടന്ന് അടുത്തുള്ള ആശുപത്രിയിലെത്തിക്കുകയായിരുന്നു. ആശുപത്രിയിലെത്തിയ യുവതി ആൺകുഞ്ഞിന് ജന്മം നൽകുകയും ചെയ്തു