ഹൃദയാഘാതം മൂലം മരണപ്പെട്ട ഭാര്യയുടെ മൃതദേഹം കിലോമീറ്ററോളം ചുമന്ന് ശ്മശാനത്തിൽ എത്തിച്ച് അന്ത്യകർമ്മകങ്ങൾ ചെയ്ത് ഭർത്താവ്. തെലങ്കാനയിലെ കാമറെഡ്‌ഡി നഗരത്തിലാണ്​ ദാരുണമായ സംഭവം നടന്നത്.

ഭാര്യയുടെ മൃതദേഹം ചുമലിലേറ്റി ഭര്‍ത്താവ്​ നടക്കുന്ന ദൃശ്യങ്ങള്‍ നിമിഷനേരങ്ങൾക്കകം സമൂഹമാധ്യമങ്ങളില്‍ പ്രചരിച്ചു. നാഗലക്ഷ്​മിയും ഭര്‍ത്താവ്​ സ്വാമിയും കാമറെഡ്ഡി റെയില്‍വേ സ്​റ്റേഷന്​ സമീപമായിരുന്നു താമസിച്ചിരുന്നത്. ഭിക്ഷയെടുത്താണ്​ ഇരുവരും ജീവിച്ചിരുന്നത്​. പെട്ടന്ന്​ സുഖമില്ലാതായ നാഗലക്ഷ്​മി തിങ്കളാഴ്ച മരണപ്പെടുകയായിരുന്നു. ഹൃദയാഘാതമായിരുന്നു​ മരണാകാരണം.

നാഗലക്ഷ്​മിയുടെ അന്ത്യകര്‍മങ്ങള്‍ ചെയ്യുന്നതിനായി റെയില്‍വേ പൊലീസ്​ 2500 രൂപ സ്വാമിക്ക്​ നൽകുകയും ചെയ്തതാണ്. എന്നാല്‍ സ്വകാര്യവാഹനങ്ങളോ ആംബുലന്‍സോ ലഭിക്കാത്തതിനാൽ ഭാര്യയുടെ മൃതദേഹം ശ്​മശാനത്തിലെത്തിക്കാന്‍ സ്വാമിക്ക്​ കഴിഞ്ഞില്ല. നാഗലക്ഷ്​മി കോവിഡ്​ ബാധിച്ചാണ്​ മരിച്ചതെന്ന്​ പറഞ്ഞായിരുന്നു വാഹനങ്ങൾ നിഷേധിച്ചത്.

വാഹനങ്ങൾ ലഭിക്കാത്തതിനാൽ മണിക്കൂറുകള്‍ കാത്തുനിന്ന​തിന്​ ശേഷം ഭാര്യയുടെ മൃതദേഹം സ്വാമി ചു​മലിലേറ്റി നടക്കുകയായിരുന്നു. ശ്​മശാനത്തിലെത്തിച്ച്‌​ സ്വാമിതന്നെ അന്ത്യകര്‍മങ്ങള്‍ നടത്തുകയും ചെയ്​തു. സംഭവത്തിന്‍റെ മൊബൈല്‍ വിഡിയോ ദൃശ്യങ്ങളും സി.സി.ടി.വി ദൃശ്യങ്ങളും സമൂഹമാധ്യമങ്ങളില്‍ വന്‍തോതില്‍ പ്രചരിക്കുകയാണിപ്പോൾ.