ബിജെപിയ്‌ക്കെതിരെ ആഞ്ഞടിച്ച് കോണ്‍ഗ്രസ്. ആരോപണങ്ങളില്‍ കുടുങ്ങിയ മന്ത്രിമാരെ മാറ്റാന്‍ ബിജെപി തയാറായില്ലെങ്കില്‍ പാര്‍ട്ടി പ്രതിഷേധവുമായി മുന്നോട്ട് പോകുമെന്ന് കോണ്‍ഗ്രസ് അധ്യക്ഷ സോണിയ ഗാന്ധി പറഞ്ഞു. മന്‍ കീ ബാത് പ്രധാനമന്ത്രി സഹപ്രവര്‍ത്തകര്‍ക്കെതിരെ ആരോപണങ്ങള്‍ ഉയരുമ്പോള്‍ മൗന വ്രതത്തിലാണെന്നും സോണിയ പറഞ്ഞു.
പാര്‍ലമെന്റിലെ പ്രതിഷേധം ഒഴിവാക്കാന്‍ ഇന്നു സര്‍വകക്ഷിയോഗം ചേരാനിരിക്കെ കോണ്‍ഗ്രസ് എംപിമാരുടെ യോഗത്തിലാണ് സോണിയ ഇത്തരത്തിലൊരു നിലപാടെടുത്തത്. ഒരുവശത്ത് പ്രധാനമന്ത്രി നരേന്ദ്രമോദി, സര്‍ക്കാരിന്റെ സുതാര്യതയും ആര്‍ജവത്വവും ഉത്തരവാദിത്വവും തുടങ്ങി അവകാശവാദമുന്നയിക്കാനുള്ള ഒരവസരവും വിടില്ല. മറുവശത്ത് മന്ത്രിക്കും രണ്ടു മുഖ്യമന്ത്രിമാര്‍ക്കുമെതിരായ ആരോപണങ്ങളില്‍ മൗനം ഭജിക്കുന്നു. ഇതിനെ തുടര്‍ന്ന് സംശയം ഉണ്ടെന്നും സോണിയ വ്യക്തമാക്കി.
21 ദിന മഴക്കാല സമ്മേളനത്തിന്റെ പകുതിയും പ്രതിപക്ഷ പ്രതിഷേധത്തെത്തുടര്‍ന്ന് തടസ്സപ്പെട്ടിരുന്നു. ആരുടെയും രാജിയുണ്ടാകില്ലെന്ന് സര്‍ക്കാര്‍ വ്യക്തമാക്കിയിരുന്നു. പ്രധാനപ്പെട്ട 11 ബില്ലുകള്‍ സര്‍ക്കാരിന് പാര്‍ലമെന്റില്‍ പാസാക്കേണ്ടതുണ്ട്. ലളിത് മോദിയെ സഹായിച്ചെന്ന ആരോപണത്തില്‍ വിദേശകാര്യമന്ത്രി സുഷമ സ്വരാജ്, രാജസ്ഥാന്‍ മുഖ്യമന്ത്രി വസുന്ധര രാജെ, വ്യാപം കുംഭകോണത്തിന്റെപേരില്‍ മധ്യപ്രദേശ് മുഖ്യമന്ത്രി ശിവ്‌രാജ് സിങ് ചൗഹാന്‍ എന്നിവരുടെ രാജിക്കായാണ് പ്രതിപക്ഷം ശക്തമാക്കുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha