മുംബൈ സ്‌ഫോടന പരമ്പര കേസിലെ പ്രതി യാക്കൂബ് മേമനെ തൂക്കിലേറ്റിയത് നിലവിലുള്ള നിയമപ്രകാരമാണെന്ന് വ്യക്തമാക്കിയ ബിജെപി, ഇതേസമയം വധശിക്ഷ തുടരേണ്ടതുണ്ടോ എന്നതിനെക്കുറിച്ചുള്ള ചര്‍ച്ച ചെയ്യാന്‍ സന്നദ്ധമാണെന്നും വ്യക്തമാക്കി. കേന്ദ്രമന്ത്രി നിര്‍മല സീതാരാമനാണ് ഇക്കാര്യം അറിയിച്ചത്. എന്നാല്‍,വധശിക്ഷ നിര്‍ത്തലാക്കണമെന്ന ആവശ്യത്തെ പിന്തുണയ്ക്കുന്നതായി ബിജെപി എംപി വരുണ്‍ ഗാന്ധി ഒരു ലേഖനത്തില്‍ പറഞ്ഞു. കോണ്‍ഗ്രസ് നേതാക്കളായ ശശി തരൂരും ദിഗ്‌വിജയ് സിങ്ങും സിപിഎം ജനറല്‍ സെക്രട്ടറി സീതാറാം യച്ചൂരിയും വധശിക്ഷ നല്‍കുന്നതിനെ എതിര്‍ത്ത് നേരത്തെ രംഗത്തുവന്നിരുന്നു.വധശിക്ഷയ്ക്ക് വ്യക്തിപരമായി എതിരാണെന്ന് കേരള മുഖ്യമന്ത്രി ഉമ്മന്‍ ചാണ്ടിയും വ്യക്തമാക്കി.
വധ ശിക്ഷയെക്കുറിച്ച് വിവിധ പാര്‍ട്ടികള്‍ക്ക് വ്യത്യസ്ഥ അഭിപ്രകായമാണുള്ളത്. ചില രാഷ്ടീയ പാര്‍ട്ടികള്‍ പാര്‍ലമെന്റില്‍ തങ്ങളുടെ നിലപാട് വ്യക്തമാക്കുകയും ചെയ്തു. ഇതിനെ തുടര്‍ന്നാണ് ചര്‍ച്ചയാവാമെന്ന് ബിജെപി പ്രതികരിച്ചത്.
ഇതേസമയം, വധശിക്ഷ , ഭീകരത എന്നീ വിഷയങ്ങള്‍ ചിലര്‍ രാഷ്ട്രീയവല്‍ക്കരിക്കുന്നതില്‍ കേന്ദ്രമന്ത്രി വെങ്കയ്യ നായിഡു നിരാശ പ്രകടിപ്പിച്ചു.സ്‌ഫോടന പരമ്പര കേസ് പ്രതിയായ യാക്കൂബ് മേമനോട് അനുഭാവം പ്രകടിപ്പിക്കുന്നത് രാഷ്ട്രത്തോടുള്ള നന്ദികേടാണ്. വധശിക്ഷയെപ്പറ്റി ചര്‍ച്ച ആവാമെന്നും ഹൈദരാബാദില്‍ അദ്ദേഹം പറഞ്ഞു.
ഒരു ഭീകരന് വധശിക്ഷ നല്‍കുന്നത് എളുപ്പമാര്‍ഗമാണെന്നും എന്നാല്‍ ഇത് രക്തസാക്ഷികളെ സൃഷ്ടിക്കുമെന്നും വരുണ്‍ ഗാന്ധി ലേഖനത്തില്‍ അഭിപ്രായപ്പെട്ടു. ജീവപര്യന്തം തടവിലിടുന്നത് ഈ ആകര്‍ഷകത്വം കുറയ്ക്കും.വധശിക്ഷ വിധിക്കപ്പെടുന്നവരില്‍ 94 ശതമാനം ദലിതരോ ന്യൂനപക്ഷ സമുദായക്കാരോ ആണ്. വധശിക്ഷ ഒരു പരിഹാരമല്ല.നിയമത്തിനുമപ്പുറം മനുഷ്യാവകാശ പ്രശ്‌നമാണിത്.ഏറ്റവും വലിയ ജനാധിപത്യ രാജ്യത്ത് ഇത് ഒരു ക്രമക്കേടാണ്.ഇതിനു തിരുത്തല്‍ ആവശ്യമാണ്.
ജീവിച്ചിരിക്കുന്നവരില്‍ പലരും വധശിക്ഷ അര്‍ഹിക്കുന്നവരാണ്.മരിച്ചവരില്‍ പലരും ജീവിതം അര്‍ഹിക്കുന്നവരും. വധശിക്ഷ നിലനില്‍ക്കുന്ന 58 രാജ്യങ്ങളല്‍ ഒന്നാണ് ഇന്ത്യ. മാറിക്കൊണ്ടിരിക്കുന്ന ആഗോള സാഹചര്യം നാം മനസിലാക്കേണ്ടതുണ്ടെന്നും വരുണ്‍ ഗാന്ധി പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha