തല്‍ക്കാലം പുറത്തിരിക്കാം. പാര്‍ലമെന്റ് നടപടികള്‍ തടസപ്പെടുത്തിയ പ്രതിപക്ഷ എം.പിമാരെ അഞ്ചു ദിവസത്തേയ്ക്ക് സസ്‌പെന്റുചെയ്തു. ലോകസഭാ നടപടികള്‍ തടസപ്പെടുത്തിയ 25 കോണ്‍ഗ്രസ് എം.പിമാരെയാണ് സ്പീക്കര്‍ സുമിത്ര മഹാരാജന്‍ അഞ്ച് ദിവസത്തേയ്ക്ക് സസ്‌പെന്റുചെയ്തിരിക്കുന്നത്. കേരളത്തില്‍ നിന്നുള്ള എം.പിമാരായ കൊടിക്കുന്നില്‍ സുരേഷ്, കെ.സി വേണുഗോപാല്‍, എം.കെ രാഘവന്‍, മുല്ലപ്പള്ളി രാമചന്ദ്രന്‍ എന്നിവരും സസ്‌പെന്റ് ചെയ്യപ്പെട്ടിട്ടുണ്ട്. മുദ്രാവാക്യം വിളികളുമായി നടുത്തിലിറങ്ങുകയും നടുത്തളത്തില്‍ പ്ലക്കാര്‍ഡ് ഉയര്‍ത്തി പ്രതിഷേധിച്ചതിനുമാണ് നടപടി. വര്‍ഷകാല സമ്മേളനം തുടങ്ങിയതു മുതലുള്ള ലോകസഭാ നടപടികള്‍ പരിശോധിച്ച ശേഷമാണ് നടപടി.
പാര്‍ലമെന്റ് നടപടികള്‍ തടസപ്പെടുത്തിയാല്‍ സസ്‌പെന്റു ചെയ്യുന്നത് ഉള്‍പ്പെടെയുള്ള നടപടികളിലേയ്ക്ക് നീങ്ങുമെന്ന് കഴിഞ്ഞ കുറച്ചു ദിവസങ്ങളിലായി സ്പീക്കര്‍ മുന്നറിയിപ്പ് നല്‍കിയിരുന്നുവെങ്കിലും തികച്ചും അപ്രതീക്ഷിതമായാണ് സ്പീക്കറുടെ ഭാഗത്തു നിന്നും ഇന്ന് ഇത്തരത്തിലൊരു നീക്കം ഉണ്ടായത്. ഉച്ചകഴിഞ്ഞ് രണ്ടു മണിയോടെ ലോകസഭാ നടപടികള്‍ തുടങ്ങി ഒന്നര മണിക്കൂര്‍ പിന്നിട്ടപ്പോള്‍ പ്രതിപക്ഷ എം.പിമാര്‍ പ്രതിഷേധവുമായി രംഗത്തെത്തി. ഇതോടെ, നടുത്തളത്തില്‍ നിന്ന് പ്രതിഷേധിക്കുന്നവരുടെ ഒരു ലിസ്റ്റ് താന്‍ തയ്യാറാക്കിയിട്ടുണ്ടെന്ന് അറിയിച്ച സ്പീക്കര്‍ ഇവരുടെ പേരുകള്‍ വായിക്കുയും ഇവരെ അഞ്ചു ദിവസത്തേയ്ക്ക് സഭയില്‍ നിന്നും സസ്‌പെന്റുചെയ്യുന്നതായി അറിയിക്കുകയുമായിരുന്നു.
നടപടി ജനാധിപത്യ വിരുദ്ധമെന്ന് കൊടിക്കുന്നില്‍ സുരേഷ് എം.പി പ്രതികരിച്ചു. ജനാധിപത്യത്തിന്റെ കടയ്ക്കല്‍ കത്തിവയ്ക്കുന്ന നടപടിയ്‌ക്കെതിരെ ഒറ്റക്കെട്ടായി മുന്നോട്ടുപോകുമെന്ന് ആന്റോ ആന്റണി എം.പി പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha