കൊറോണ നൽകിയ ദുരിതങ്ങൾ മറികടക്കാൻ തുനിഞ്ഞിറങ്ങി ഇന്ത്യ. ഏറെ പ്രതീക്ഷ നൽകുന്ന വാർത്തകളാണ് ഇപ്പോൾ പുറത്ത് വരുന്നത്. ഇന്ത്യയുടെ സമ്പദ് വ്യവസ്ഥയില്‍ വന്‍ കുതിച്ചുചാട്ടം ഉണ്ടാകുമെന്ന് ആവര്‍ത്തിച്ച്‌ ഐഎംഎഫ് രംഗത്ത് എത്തിയിരിക്കുകയാണ്. റിപ്പോർട്ടുകൾ അനുസരിച്ച് ഇന്ത്യ ഈ വര്‍ഷം 9.5 ശതമാനം വളര്‍ച്ച കൈവരിക്കുമെന്നാണ് ഐഎംഎഫ് സര്‍വ്വേ വ്യക്തമാക്കുന്നത്. കൂടാതെ അമേരിക്ക, യുകെ ഉള്‍പ്പെടെയുള്ള വികസിത രാജ്യങ്ങളെ പിന്തള്ളിക്കൊണ്ടാണ് ഇന്ത്യ ഇത്തവണ മുന്‍പന്തിയിൽ എത്തിയിരിക്കുന്നത്.

എന്നാൽ 2022 ല്‍ ഇത് 8.5 ശതമാനം ആയേക്കുമെന്നും സൂചനകളുണ്ട്. ആഗോള തലത്തില്‍ തന്നെ ഈ വര്‍ഷം 5.9 ശതമാനം വളര്‍ച്ച ഉണ്ടാകുമെന്നും പുതിയ റിപ്പോര്‍ട്ടുകള്‍ ചൂണ്ടിക്കാട്ടുന്നു. സാമ്പത്തിക വളര്‍ച്ചയില്‍ ഇന്ത്യയ്‌ക്ക് തൊട്ടുപിന്നാലെ ചൈനയാണ് നിൽക്കുന്നത്. 8 ശതമാനമാണ് ചൈനയിലെ ഈ വര്‍ഷത്തെ വളര്‍ച്ച എന്നത്. 2022 ഓടെ ഇത് 5.6 ആയി കുറയുമെന്നും സര്‍വ്വേ വ്യക്തമാക്കുന്നു.

അതോടൊപ്പം തന്നെ യുഎസില്‍ ഈ വര്‍ഷം 6 ശതമാനമാണ് വളര്‍ച്ചയെങ്കില്‍ അടുത്ത വര്‍ഷം അത് 5.2 ആയി കുറയാനാണ് സാധ്യത. എന്നാൽ 2022 ല്‍ ആഗോള തലത്തിലുള്ള സാമ്പത്തിക വളര്‍ച്ച 4.9 ശതമാനമാകുമെന്ന് കണക്കുകള്‍ ചൂണ്ടിക്കാണിക്കുന്നു. കൊറോണ മഹാമാരി സാമ്പത്തിക വ്യവസ്ഥയെ ആഗോളതലത്തില്‍ ബാധിച്ചിരിക്കുകയാണെന്ന് സാമ്പത്തിക വിദഗ്ധ ഗീത ഗോപിനാഥ് വ്യക്തമാക്കുകയുണ്ടായി.

അവികസിത രാജ്യങ്ങളെ ഇത് വളരെയേറെ ബാധിച്ചിട്ടുണ്ട്. മിക്ക രാജ്യങ്ങളിലേയും തൊഴില്‍ അവസരങ്ങള്‍ കുറഞ്ഞതോടെ ഈ മേഖലയിലെ തിരിച്ചുവരവ് വെല്ലുവിളിയായിരിക്കുകയാണ് എന്നും അവർ വ്യക്തമാക്കി. എന്നാല്‍ ചില ഉത്പന്നങ്ങളുടെ കയറ്റുമതി വര്‍ദ്ധിച്ചതായി ഗീത ഗോപിനാഥ് പറഞ്ഞു. 2024 ഓടെ സമ്പദ്വ്യവസ്ഥയില്‍ തിരിച്ചുവരവ് പ്രതീക്ഷിക്കാമെന്നാണ് വിലയിരുത്തപ്പെടുന്നത്.