മായാവതിയെ കാണാനില്ല? എവിടെപ്പോയെന്ന് അറിയാതെ പാർട്ടി പ്രവർത്തകർ, തെരഞ്ഞെടുപ്പ് അടുത്തിട്ടും ഉത്തർപ്രദേശിൽ പാർട്ടി കടന്നു പോകുന്നത് വൻ പ്രതിസന്ധിയിൽ, അമർഷം പ്രകടിപ്പിച്ച് പാർട്ടി പ്രവർത്തകർ
നിയമസഭ തെരഞ്ഞെടുപ്പിന്റെ തീയതി പ്രഖ്യാപിച്ചിട്ടില്ലെങ്കിലും ഉത്തർ പ്രദേശിൽ പ്രധാന പാർട്ടികളെല്ലാം പ്രചാരണ രംഗത്ത് ഇറങ്ങിക്കഴിഞ്ഞു. ബിജെപി, കോൺഗ്രസ് പാർട്ടികളുടെയൊക്കെ തലമൂത്ത നേതാക്കൾ സംസ്ഥാനത്ത് പ്രചാരണ പ്രവർത്തനങ്ങൾക്ക് ചുക്കാൻ പിടിക്കുന്നുമുണ്ട്. എന്നാൽ യുപിയിലെ പ്രധാന രാഷ്ട്രീയ പാർട്ടികളിലൊന്നായ ബഹുജൻ സമാജ് പാർട്ടിയുടെ (ബിഎസ്പി) നേതാവും മുൻ മുഖ്യമന്ത്രിയുമായ മായാവതിയെ ഒരിടത്തും കാണാനില്ല.
അതുമാത്രമല്ല ബിഎസ്പി ഇതുവരെ പ്രചാരണ പ്രവർത്തനങ്ങൾക്ക് തുടക്കം കുറിച്ചിട്ടുമില്ല. പ്രവർത്തകരാകട്ടെ ഇതിൽ കടുത്ത അമർഷത്തിലുമാണ്. ഡിസംബർ 30ന് പടിഞ്ഞാറൻ ഉത്തർപ്രദേശിലെ മൊറാദാബാദിൽ പൊതുയോഗത്തെ അഭിസംബോധന ചെയ്തു കൊണ്ടാണ് കേന്ദ്ര ആഭ്യന്തരമന്ത്രി അമിത് ഷാ ആണ് മായാവതിയുടെ അസാന്നിധ്യത്തെക്കുറിച്ച് ആദ്യം പരാമർശിച്ചത്.
സഹോദരി, തെരഞ്ഞെടുപ്പ് വന്നിരിക്കുന്നു, ദയവായി പുറത്തുവരൂ. നിങ്ങൾ പ്രചാരണം നടത്തിയില്ലെന്ന് പിന്നീട് പറയരുത് എന്നായിരുന്നു അമിത് ഷാ പരിഹസിച്ചത്. അതേസമയം ഉത്തർപ്രദേശിന്റെ ചുമതലയുള്ള കോൺഗ്രസ് ജനറൽ സെക്രട്ടറി പ്രിയങ്ക ഗാന്ധിയും മായാവതിയുടെ അസാന്നിദ്ധ്യത്തെ കുറിച്ച് പറഞ്ഞിരുന്നു. എന്നാൽ വിഷയം വലിയ ചർച്ചകൾക്ക് വഴി തുറന്നിട്ടും ഒന്നും പ്രതികരിക്കാതെയിരിക്കുകയാണ് മായാവതി.
ഒക്ടോബറിൽ പാർട്ടി സ്ഥാപകൻ കാൻഷിറാമിന്റെ ചരമവാർഷിക ദിനത്തോടനുബന്ധിച്ച് ലക്നൗവിലെ പൊതുപരിപാടിയിലാണ് മായാവതി അവസാനമായി പങ്കെടുത്തത്. സോഷ്യൽ മീഡിയയിലും ഇപ്പോൾ അത്ര സജീവമല്ല. എന്നാൽ മായാവതിയുടെ അസാന്നിദ്ധ്യം പലവിധ രാഷ്ട്രീയ അഭ്യൂഹങ്ങൾക്കും ഇടയാക്കിയിരിക്കുകയാണ്. ദളിത് വോട്ടുകൾ ലക്ഷ്യം വച്ച് ബിജെപിയാണ് മായാവതിയെ രംഗത്തിറക്കാത്തതെന്ന ആരോപണവുമുയരുന്നുണ്ട്.
എന്നാൽ ഇതുവരെ സംസ്ഥാനത്ത് ഇല്ലാത്ത പ്രതിസന്ധിയിലൂടെയാണ് കടന്നുപോകുന്നത്. പാർട്ടിയുടെ ഒട്ടുമിക്ക നിയമസഭ അംഗങ്ങളും പാർട്ടിയിൽ നിന്ന് പുറത്തുപോകുകയോ സസ്പെൻഡ് ചെയ്യപ്പെടുകയോ മറ്റ് പാർട്ടികളിലേക്ക് ചുവടു മാറുകയോ ചെയ്തിട്ടുണ്ട്. 2020 ഒക്ടോബറിൽ ഹത്രാസിൽ 19 കാരിയായ ദളിത് യുവതിയെ കൂട്ടബലാത്സംഗം ചെയ്ത് കൊലപ്പെടുത്തിയ സംഭവത്തിൽ മൗനം പാലിച്ച മായാവതിയുടെ നിലപാടിൽ പ്രതിഷേധിച്ച് പ്രവർത്തകർ മായാവതിയുടെ കോലം കത്തിച്ചിരുന്നു.
https://www.facebook.com/Malayalivartha